မတ်မလီု၊ နိုဝမ်ပါ ၁၁
အကြာအလဵုအသဳပၞာန် ပတေၚ်လဝ်ပရေၚ်ဂီုကၠီု လ္တူဍုၚ်မတ်မလီုဂှ် သ္ၚိအစာဂဥုဲသဝ်ဝန်မွဲတၠ ဒးကၠတ်ဖံက်ဏာတုဲ ထဝ်သြန်ဗိုတ် ကပေါတ်ရတ်တံသီုဖအိုတ် ၚုဟ်မးသြန်ကာလ ၁၁၆၀ ကိုတ်ပြၚ် ဒးဒုၚ်ကမၠတ်ဏာဂှ် ဂွံတီလဝ် နူကဵုလိက်စၟတ်သမ္တီ ဒပ်ဗၠာဲသၟိၚ်တံရ။
တုဲကၠုၚ်ဂိတုနဝ်ဝမ်ပါ ၈ ပယျာံဗ္တံ ပ္ဍဲသဳရိမျာင် အရာပ်ကုန်ကြုက် ပံက်လဝ်ဗဒမ်ဂဥုဲ နကဵုယၟု “လှိုၚ်လေန်” သ္ၚိအစာဂဥုဲသဝ်ဝန် ဒံက်တာနေလေၚ်အံၚ် ဒးဒုၚ်ကၠတ်ဖံက်ဏာ မဒှ်ရ။
အတိုၚ်ညးဒေသတံဟီုမ္ဂး တြုံကဵုဗြဴအစာဂဥုဲသဝ်ဝန်တံ ၂ တၠ အခိၚ်ဗ္တံ ၈ နာဍဳ ကၟာတ်ဗဒမ်ဂဥုဲတုဲ ကလေၚ်စိုပ်ကၠုၚ်သ္ၚိမှ ဒးကၠတ်ဖံက်ဏာဂှ် ဂွံတီကေတ် မဒှ်ကီုရ။
အပ္ဍဲကဵုသ္ၚိဌာန် ဒးကၠတ်ဖံက်ဂှ်တှ်ေ ထဝ်သေံလျိုၚ် ၂ ဒကေဝ် မဂွါမွဲတၞုၚ် ၚုဟ်မးကာလ ၁၉၆ ကိုတ်၊ သတ်ဇုက်မွဲမ ၁၃၀ ကိုတ်၊ ကံက်တဲ ထဝ်မဳလေန်ကဵု ကပေါတ်ထဝ်သြန်တၞဟ်ဟ်တံ ဒးကၠတ်ဏာရ။
အပ္ဍဲကဵုပရေၚ်ဖံက်ကၠတ်ဏံ သြန်စက္ခူတာန်မွဲဠက် ၂၀၀ ကိုတ် စွံလဝ် လ္တူထပ်သ္ၚိဍာ်ဂှ်လေဝ် ပါအာကီုရောၚ် ဂွံတီနူတၚ်နၚ် ဒပ်ဗၠာဲသၟိၚ်တံရ။
စပ်ကဵု ပရေၚ်ဖံက်ကၠတ်လဝ်သ္ၚိဏံတုဲ တေၚ်လဝ်အမှု ပ္ဍဲကဵုဗ္ဒိုပ်ဗၠာဲသၟိၚ် အရာပ်မုဟ်ပန် နကဵုရာဇသာတ်ဇၞော် ၝောံပိုဒ် ၃၈၀ ကီုလေဝ် ရပ်ဟွံဂွံဏီပုဟ်။
တုဲကၠုၚ်ဂိတုအဝ်ဂတ်တေံလေဝ် ပ္ဍဲဍုၚ်မတ်မလီု ဆေင်သွံကပေါတ် ဓါတ်လလဳ ကိုကိုညဳညဳ သ္ၚိအရာပ်ကုန်မြာင်(မယာန်ကုၚ်) ဒးဖံက်ကၠတ်တုဲ ကပေါတ်ၚုဟ်မး သြန်ကိုတ်မသုန်လက်ပြၚ် ဒးအာကမၠတ်ရ။
လ္တူဍုၚ်မတ်မလီု အလဵုအသဳပၞာန် ဂွံအုပ်ဓုပ်လဝ်ပေၚ်ၚ်ဂှ်တှ်ေ ပရေၚ်ဖံက်ကၠတ်သ္ၚိဌာန် ပရေၚ်ကၠတ်ဂၠံက်တံ ဒှ်မံၚ်မွဲဏှမွဲဏှ ကီုလေဝ် ထမံက်ပတိတ်ကေတ်ကၠုၚ်အရေဝ်မာန် ကြပ်ဟွံမွဲ အောန်ကွေံကွေံရဂှ် ညးဒေသတံဟီုတုဲ ဂွံတီရ။
ပရိုၚ်-သြၚ်လောန်တိုၚ်မ်
Photo – CJ