နေဗျဳဒဝ် ၊ နိုဝမ်ပါ ၁၁
အပ္ဍဲကဵုအလဵုအသဳပၞာန် ထမံက်မံၚ်ရုပ်ရဴ လၟေၚ်ကမၠောန် ပရေၚ်ၜိုဟ်လလမ် ညးဍုၚ်ကွာန်တံညံၚ်ဂွံပါလုပ်ကၠုၚ် နကဵုဂကောံမှာဇန်တံဘိုၚ်ကဵုအရီုဗၚ်အိုတ်ညိဂှ် ကမ္မတဳညဳသၟဟ်ကောန်ဂကူ ပ္ညဳပ္ညပ်ထမံက်ရုပ်ရဴ ပရေၚ်ၜိုဟ်လလမ် NSPNC အလဵုအသဳပၞာန် စန်ဒက်ဟီုဂးကၠုၚ်ရ။
မူဝါဒ အလဵုအသဳပၞာန်ဖျေံလဝ်ဂှ်ဝွံ စပ်ကဵု NSPNC ကၠောန်ထမံက်မံၚ်ရုပ်ရဴ လၟေၚ်ကမၠောန်ပရေၚ်ၜိုဟ်လလမ်တံဂှ် ညံၚ်ဂွံဒှ်အရီုဗၚ် ရန်တၟံတုဲ ပ္ဍဲနေဗျဳဒဝ် နိုဝမ်ပါ ၉ ဂှ် ဆဵုဂဗလဝ်ဂကောံမှာဇန်တံရ။
အပ္ဍဲပေါဲဆဵုဂဗဏံ ဝန်ဇၞော်ပရေၚ်စဵုဒၞာ ဥက္ကဌ NSPNC ဒုသ္ကိုပ်ပၞာန်ဇၞော် ယာပျေအ်၊ ညးအုပ်ကာကေုာံ ညးပါလုပ် ကမ္မတဳကီု၊ နူကဵုဂကောံမှာဇန်နာနာ ဥက္ကဌ၊ ဒုဥက္ကဌ၊ ညးအုပ်ကာနာနာတံသၟးဟွံက တၠပညာ စီုသကီုပရေၚ်ဆေၚ်စပ်ကေုာံ ညးတာလျိုၚ်တံတိုန်စိုပ်လဝ်ရဂှ် အလဵုအသဳပၞာန် လလောၚ်ပတိတ်လဝ်ပရိုၚ်ရ။
ဟိုတ်နူ ဖဵုအဆက်ပရေၚ်သီအဝဵု ၂၀၂၁ တုဲ အပ္ဍဲဍုၚ်ပရေၚ်ကဏ္ဍနာနာ ဆုတ်ယောၚ်ကၠုၚ်မံၚ်ဂှ်တှ်ေ ဂကောံရပ်လွဟ်တံထပ်မံက်ကၠုၚ်တုဲ ပ္ဍဲကဵုဒေသပဋိပက္ခဂှ် ညးဍုၚ်ကွာန်တံဒုၚ်တဲဟွံမာန်၊ နွံမံၚ်ပၟိက်ကဵု ပရေၚ်ညိၚ်ဝပ်တံရောၚ် ဥက္ကဌ NSPNC ဟီုရ။
ဂကောံကောန်ဍုၚ်အရၚ် ရပ်လွဟ်လ္ၚဵုတံ သွက်ညးတံဂွံတန်တဴမာန် ကၠောန်ပတိတ်မံၚ်ဂဥုဲၜူမာဲဂှ်ကီု၊ ၜံက်ခါဲမံၚ် သယံဇာတသဘာဝ ၜက်ၜေတ်ပယျဵု ကၠောန်မံၚ်အမှုအရာနာနာ နကဵုပရေၚ်ကမၠောန် ဟွံလုပ်သၞောဝ်တံတုဲ စောဲစပ်ဒတူလိုၚ်ကၠုၚ်လဝ်ဂးရ။
လ္တူလၟေၚ်ကမၠောန် ပရေၚ်ၜိုဟ်လလမ်ဏံ နကဵုဂကောံမှာဇန် နာနာတံ မိက်ဂွံကဵုပါလုပ်အာ မွဲအခန်မွဲကဏ္ဍကီုတုဲ ညးဍုၚ်ကွာန်တံ ညံၚ်ဂွံပံၚ်တောဲပါလုပ်ကၠုၚ် ယဝ်ရကဵုအရီုဗၚ်မ္ဂး ဂွံတိုန် ပရေၚ်ၜိုဟ်သြိုဟ်ညိၚ်ဝပ်တံ ဗွဲမပြဟ်မာန်ရောၚ် ဒုသ္ကိုပ်ပၞာန်ဇၞော်ယာပျေအ် ဟီုဂးစန်ဒက်လဝ်ရ။
စပ်ကဵုတက်ကျာသဳကၠဳပရေၚ်ၜိုဟ်လလမ်ကဵု ဂကောံမှာဇန်တံဂှ်တှ်ေ ဂကောံပၞာန် ဖံက်ပကဝ်ကၠောန်မံၚ် ပရေၚ်အခေါၚ်အရာမၞိဟ်အရိုဟ်တ္ၚဲတံ သွက်ဂွံဒှ်ပရေၚ်လုပ်သၞောဝ် သုၚ်စောဲအာမာန်ရောၚ် နူကဵုဖံၚ်ဒေယှေန် အခေါၚ်အရာမၞိဟ်ဍုၚ်မန် ပရိုဂရမ် ဒါရိုက်တာ နာဲအဲမန် ဟီုကဵုဌာန်ပရိုၚ် သြၚ်လောန်တိုၚ်မ်ရ။
“နူရဲလပါ်ဂကောံတံဏံ နကဵုပရေၚ်မၞိဟ် ပါလုပ်ရီုဗၚ်ကဵုအာ တပ်ပ်တးတးကီု သွက်ပရေၚ်ၜိုဟ်လလမ် အကြာကွာန်ဌာန်ဒေသ ပါလုပ်အာမွဲအခန်မွဲကဏ္ဍ ရန်တၟံခိုဟ်ဟ်တံနွံလေဝ် စကာသုၚ်စောဲယၟုညးတံ ဂကောံညးတံတုဲ နကဵုပရေၚ်ထံက်ဂလာန် သွက်ဍေံတံ ဂွံလုပ်သၞောဝ် ကေတ် Legitimacy ဂှ်ဏောၚ်။ ဣဏံဂှ် ပရေၚ်ဂွံဒးဂွိၚ်ဟွံသေၚ်ပုဟ်။ ကိစ္စဒှ်မံၚ် ကွေံကွေံရ” သာ်ဝွံ သ္ဂးရ။
ဂကောံပၞာန်ဝွံ စွံပွန်ကဵုညးဍုၚ်ကွာန်တံတုဲ ပန်ပှ်ောမံၚ်ဂှ်ကီု ကိစ္စကလေၚ်ဖျေံကဵုဒၞာဲဝါဲ သွက်ညးဍုၚ်ကွာန် ဒးဘဲဒဏ်ပၞာန်တံ အကာဲအရာပတိုန်ထ္ၜး ဗၠးဗၠးၜးၜး နွံ-ဟွံမွဲဂှ်လဝ် ညးမိက်ဂွံပတိတ်အာ တၚ်သၟာန်ကီုရ။
ဟိုတ်ဂှ်တုဲ အပ္ဍဲလၟေၚ်ကမၠောန်ပရေၚ်ၜိုဟ်လလမ် ဂကောံပၞာန်ဖျေံလဝ်မူဝါဒ ဗီုပြၚ်တုဲတုဲကၠုၚ်တေံ ညးဍုၚ်ကွာန်တံ ညံၚ်ဂွံဒုၚ်တဲဂှ် ဆၜိုတ်ကၠောန်ကဵုပရေၚ်စန်ဒက်သၟးရတှ်ေ ဂကောံမှာဇန်နာနာတံပါလုပ်မံၚ်ရောၚ် ဂွံဟီုမာန်ဂှ်တှ်ေ ဝါတ်ခါဲမံၚ်ရောၚ် နာဲအဲမန် ထံက်ထ္ၜးရ။
အပ္ဍဲကဵုလၟေၚ်ကမၠောန်ပရေၚ်ၜိုဟ်လလမ် အလဵုအသဳပၞာန်ဂှ် ညးဍုၚ်ကွာန်တံကီု ဂကောံကောန်ဍုၚ်အရၚ်တံ ညံၚ်ဂွံထပ်ပါလုပ်ကၠုၚ်ဂှ် ကုဂကောံဗော်ပရေၚ်ဍုၚ်ကွာန်တံ ကေတ်အဆက်လုပ်ပ္ညဳပ္ညပ် အကြာဂှ်လေဝ် ကၠောန်လဝ်တုဲ လၟုဟ်ဏံပၠန် နူကဵုဂကောံမှာဇန်တံမွဲအဆံၚ် ဂစာန်ကၠောန်တိုန်ပရေၚ်စန်ဒက် လ္တူညးဍုၚ်ကွာန်တံ ပၠန်ရ။
အပ္ဍဲကဵုလက်ထက်ကံၚ်သဳပၞာန်ကဵု လက်ထက်အလဵုအသဳပၞာန်ဏံ စပ်ကဵုပရေၚ်ၜိုဟ်လလမ် မူဝါဒကၠောန်လဝ် မဟာဗျူဟာ ကေုာံ သွက်ဂွံကဵုအရီုဗၚ် ပရေၚ်ဗစာရဏာမၞိဟ်တံတုဲ ပ္ဍဲပေါဲဆဵုဂဗဏံ သောၚ်ကလးလဴထ္ၜးလဝ် မဒှ်ရ။
ဒုၚ်သ္ဇိုၚ်ကြက်ရှ်သာ လိက်ကသုက်ပရေၚ်ဒေါအ်ပန်ပှော်အလုံဍုၚ် NCA လ္တူအံၚ်ဇၞးလဝ်တံဂှ်တုဲ မူဝါဒဆေၚ်စပ်ကဵု လၟေၚ်ကမၠောန်ပရေၚ်ၜိုဟ်လလမ်တံဂှ်လေဝ် ဂကောံ NSPNC တံ ပတိုန်ထ္ၜးကဵုလဝ်ရောၚ်။
အပ္ဍဲလၟေၚ်ကမၠောန်ပရေၚ်ၜိုဟ်လလမ်ဂှ် ဂကောံမှာဇန်နာနာ ညံၚ်ဂွံပါလုပ်မာန်ဂှ် ကဵုအခေါၚ်ထေက်တုဲ သွက်ပရေၚ်ဖောအ်ဗြဳ ရးနိဂီုဍုၚ်ဂှ် ပၞော်ဂၠံၚ်ကူသာန်ဗၞိက်တံ အဓိကကိစ္စဇၞော်မံၚ်ဂှ်လေဝ် ညးတိုန်စိုပ်တံ သဳကၠဳကၠုၚ်လဝ် မဒှ်ရ။
တုဲပၠန် ပ္ဍဲကမၠောန်ပရေၚ်ၜိုဟ်လလမ်ဂှ်တှ်ေ ကၠောန်အာပရေၚ်ပတုဲဖဵု သွက်ညးဍုၚ်ကွာန်တုဲ ဂကောံမှာဇန်နာနာတံ ပါလုပ်မာန်ကီု ကမၠောန်ထမံက်မံၚ်ရုပ်ရဴပရေၚ်ၜိုဟ်လလမ် ပြဟ်ဟ်ဏံဂှ်တှ်ေ ညးဍုၚ်ကွာန်ဂမၠိုၚ် သွက်ဂွံတီညာတ်မာန် မိက်ဂွံကဵုကၠောန်အာ သ္ဂးရ။
မွဲလပါ်တေံပၠန် သွက်ပရေၚ်ၜိုဟ်လလမ်ဂးတုဲ သွက်ဂွံကလေၚ် သီကေတ် တိဍာ်ဂကောံကောန်ဍုၚ်အရၚ်ရပ်လွဟ် ထိၚ်ချုက်လဝ် တံဂှ် ကၠောန်သ္ပပရေၚ်လဝေၚ်ပၞာန် စွံပွန်ကဵုညးဍုၚ်ကွာန်တုဲ ဒပ်ပၞာန်ဗမာ ကြဳဗုမ်ဗတိုက်မံၚ် မဒှ်ရ။
စပ်ကဵုပရေၚ်ကြဳဗုမ် ယဝ်ရံၚ်နူလပါ်ဒပ်ပၞာန်မ္ဂး ကၠောန်သ္ပမံၚ် ပရေၚ်လဝေၚ်ပၞာန်ဂှ်တှ်ေ ဒှ်လဂါံဇိုၚ် သွက်ဂွံကွာ်အာပရေၚ်ၜိုဟ်လလမ်ရောၚ် ပ္ဍဲပေါဲသဳကၠဳရုၚ်ကမၠောန် အခန်ကၞာ NCA ပေၚ် ၁၁ သၞာံတုဲဂှ် ဒုသ္ကိုပ်ပၞာန်ဇၞော်ယာပျေအ် ဟီုဂးလဝ်ရောၚ်။
လ္တူအကာဲအရာဏံ ညးဍုၚ်ကွာန်တံ ဂွံပတေဟ်ကၠုၚ် ပရေၚ်ၜိုဟ်လလမ်ကီု သွက်ဂွံထ္ၜးသက်သဳ ကၠောန်မံၚ်သွက်ပရေၚ်ညိၚ်ဝပ် ၜိုဟ်သြိုဟ်ဍာံဍာံ နတဲဂှ်ဝါတ်ခါဲမံၚ် ဗွဲမလောန်ဏီရောၚ် ညးချဳဒရာၚ်အခေါၚ်အရာမၞိဟ်တံ ဟီုဂးပါ်ပါဲထံက်ထ္ၜးမံၚ်ရ။
ညးဍုၚ်ကွာန်ကောန်အရာပ်တံ ညံၚ်ဟွံဂွံဒးဘဲဝပ်ကီု အရီုဗၚ် ပရေၚ်ဗစာရဏာမၞိဟ်တံ ညံၚ်ဂွံစိုပ်အာ ဇရေၚ်ညးတံမာန်မ္ဂး ဂကောံမှာဇန်ဗၠးဗၠးၜးၜးတံကီု ဂကောံဇြဟတ်ပရေၚ်ဍုၚ်ကွာန် မဆေၚ်စပ်တံ အဓိပ္ပါယ်နွံနွံ သွက်ဂွံပါလုပ်အာဂှ် ရဲဂကောံပၞာန်တံ ဒးဒေါအ်ထောံ ပရေၚ်ဖံက်ပကဝ်အခေါၚ်အရာမၞိဟ်ကဵု ကၠောန်မံၚ် ရာဇဝတ်ပၞာန်တံ ပိုတ်တ်ဂှ် ပၟိက်ဇၞော်ကွေံကွေံရောၚ်။
ရးနိဂီုဍုၚ်ဂှ် ပတဝ်ဆုဲပြံၚ်အာမံၚ် လပါ်ပရေၚ်လီုလာ်သိုက်က်ဂှ်ရ ပရေၚ်ဍဵုဍိုက်ဖံက်ပကဝ်နာနာတံဂှ် ဒေါအ်ထောံမှ သွက်ဂွံအာပရေၚ်ၜိုဟ်လလမ်မာန်ဂှ် ကေတ်ဂလာန်ပတေဟ် ညးဍုၚ်ကွာန်တံဂွံမာန်ရောၚ် နာဲအဲမန် သ္ၚဳဂၠိပ်ရ။
“သီုကဵုပရေၚ်သီအဝဵု ကၟာတ်လဝ်ပရေၚ်ဍုၚ်ကွာန်တံတုဲ ဒှ်တိုန်အခက်အခုဲ ကိစ္စရပ်စပ်သောၚ်ကလးတံဂှ် ဍေံတံ မုလေဝ်ကၠောန်ဟွံမာန်ပုဟ်။ အကြာဏံ ပရေၚ်ဂလာန်ပတေဟ်နာနာ ယအ်စှ်ေအာတုဲ ရးနိဂီုဍုၚ်ဂှ်လေဝ် ဆုတ်စှ်ေဆုဲပြံၚ် ပတဝ်အာမံၚ် လပါ်ပရေၚ်လီုလာ်သိုက်က် အရိုဟ်တ္ၚဲရ။ ဟီုတှ်ေ ပ္ဍဲအကာဲအရာဏံ ပရေၚ်ဍဵုဍာ်ပျဲပျာံမံၚ်တံဂှ် ညံၚ်ဂွံဒေါအ်ထောံနတဲဂှ် နွံပၟိက်ကွေံကွေံ။ နူဂှ်တုဲမှ မွဲအဆံၚ်ပၠန် သွက်ဂွံအာကိစ္စပရေၚ်ၜိုဟ်လလန်ဂှ် ကေတ်ဂလာန်ပတေဟ် နူကဵုညးဍုၚ်ကွာန်တံ ဂွံမာန်ဏောၚ်” သာ်ဝွံ သ္ဂးရ။
အပ္ဍဲကဵုဂကောံမှာဇန် ဆဵုလဝ်ကဵု NSPNC ဂှ် ဂကောံဇိုၚ်ခရက်ဍာဲ ဍုၚ်ဗမာ၊ ဂကောံပရေၚ်ၜိုဟ်လလမ်၊ ပရေၚ်ဘာသာဂကူ၊ အခေါၚ်အရာ ညးဗြဴကဵု ကောန်ၚာ်၊ ပရေၚ်သၟတ်၊ ဂကောံဖံၚ်ဒေယှေန်၊ ဂကောံယေန်သၞာၚ် ဂကောံပရေၚ်ပိုန်ဒြပ်တံ ပါလုပ်ရ။
သွက်အရာဏံ ခါရကၠောန်အာကမၠောန် ပရေၚ်ပိုန်ဒြပ်မ္ဂး နကဵုဂကောံမှာဇန်တံ ဆက်စပ်ကဵုပရေၚ်ၜိုဟ်လလမ်တုဲ ညံၚ်ဂွံပံၚ်တောဲကၠောန်အာကဵု ပရေၚ်ပညာ၊ ထတ်ယုက်၊ ပရေၚ်မၞိဟ် တံ မဒှ်ရ။
သွက်ဂွံသၠုၚ်ပတိုန် အစောံစရာဲသၟတ်တံမာန်ဂှ် ညံၚ်ဂွံကၠောန်အာကဵု တန်ဗတောန်သၠုၚ်စရာဲတံတုဲ ဗက်ရီုဗၚ်ဗပေၚ်ကဵုဇြဟတ်ကီု ပရေၚ်ပဋိပက္ခတံဏံညံၚ်ဂွံဒေါအ် သွက်ဂွံထမံက်ကၠောန်အာ ပရေၚ်ၜိုဟ်လလမ်ဂှ် ဂကောံပရေၚ်ဘာသာတံလေဝ် ၜိုတ်သ္ပမာန်ဘိုၚ်ကၠောန်ညိဂှ် တက်လဝ်ကျာသဳကၠဳလဝ်ရ။
တုဲပၠန် ပ္ဍဲကဵုရးဒေသဇၞော်ကဵု တွဵုရးတံမ္ဂး သွက်ဂွံယှအ်ဖျေံပဋိပက္ခ ညံၚ်ဂွံဒက်ပတန်အာ ဓဝ်ၜိုဟ်လလမ်မာန် ကၠောန်အာပေါဲသဳကၠဳ ပရေၚ်ၜိုဟ်လလမ်ဖိုရမ်တံတုဲ ဘိုၚ်ဂစာန်အာအိုတ်ညိဂှ် အပ္ဍဲကဵုညးတိုန်စိုပ်လဝ်တံ သဳကၠဳကၠုၚ်လဝ်ဂှ် အလဵုအသဳပၞာန် ပတိတ်လဝ်ပရိုၚ်ရ။
ပရိုၚ်-သြၚ်လောန်တိုၚ်မ်
Photo – NSPNC