ဘာအၚ်၊ နိုဝမ်ပါ ၁၁
အပ္ဍဲကဵု ဗော်သွးကောန်ဂကူကရေၚ် KNU ၇ ခရိုၚ်ဂှ်မ္ဂး ထောံသ္ၚိဌာန် ဇာတိတုဲ ညးဒးပါဲမံၚ်ဘဲပၞာန် လၟိဟ် ၉ ကိုတ် ၄ လက်ပြၚ် နွံမံၚ်ရဂှ် ကမ္မတဳညးဒးထောံသ္ၚိဌာန် ဒၞာဲဝါဲအပ္ဍဲဍုၚ် CIDKP အပ္ဍဲလိက်ဒုၚ်စဳရေၚ် လလောၚ်တြးလဝ် ဂိတုနိုဝမ်ပါ ၆ ဂှ်ရ။
အပ္ဍဲခရိုၚ် KNU ၇ ခရိုၚ်ဏံ လၟိဟ်ညးဒဴပၞာန် ပ္ဍဲဂိတုအဝ်ဂတ်တေံ နွံမံၚ် မွဲပြကောတိကိုတ်တုဲ ပ္ဍဲဂိတုအံက်တဝ်ဗာဂှ် ယအ်စှ်ေစိုပ်အာ လၟိဟ်မၞိဟ် ၉ ကိုတ် ၄ လက်ပြၚ်အာနွံမံၚ် နူကဵု CIDKP လလောၚ်တြးလဝ်ရ။
ဒၞာဲပေါဲဗတိုက် ညိၚ်ဝတ်အာယာယဳလ္ၚဵုတံဂှ် ကၟိန်အိန်ထံၚ်လ္ၚဵု ကလေၚ်စဴစိုပ် ဇရေၚ်ကွာန်ဌာန်ဇာတိညးတံကီုလေဝ် ၜၚ်ကျာပၞာန် ထောံဗုမ်ကီု ဒပ်ပၞာန်ဗမာတံ ပန်ထဍိုၚ်မံၚ်ကဵု လွဟ်ဇၞော်တံဂှ်ရ ပရေၚ်ဂီုကၠီုညးဍုၚ်ကွာန်တံ လီုလာ်စာ်ထောၚ် ယုတ်ဒေက်အာတုဲ ပရေၚ်ပြံၚ်ဆုဲဒၞာဲဝါဲတံလေဝ် ဒှ်တိုန်ကၠုၚ်သၠဲသၠဲလးလးရဂှ် CIDKP ဟီုလဝ်ရ။
အတိုၚ်လၟိဟ်မၞိဟ်မဆုဲပြံၚ် ညးပါဲဘဲပၞာန် နကဵုလၟေၚ်ခရိုၚ်တံမ္ဂး အပ္ဍဲခရိုၚ်သဓီုဂှ် ၁၄၀,၀၀၀ ပြၚ်၊ ခရိုၚ်တံၚ်ဥု ၁၆၀,၀၀၀ ပြၚ်၊ ခရိုၚ်ဘာအၚ်ကြပ် ၄၀,၀၀၀၊ ခရိုၚ်ညံၚ်လေဝ်ပေန် ကြပ် ၁၄၀,၀၀၀၊ ခရိုၚ်ဗိက်-ထဝါဲ ၁၄၀,၀၀၀ ပြၚ်၊ ခရိုၚ်ဖာပန် ၈၄,၀၀၀ ပြၚ် ဆက်နွံအာ မံၚ်ရ။
အပ္ဍဲခရိုၚ်ဖာပန် တုဲကၠုၚ်ဂိတုအံက်တဝ်ပါကဵု နိုဝမ်ပါ ပထမအပတ်ဂှ် နူကဵုဒပ်ပၞာန်ဗမာ ၜၚ်ကျာကြဳဖျေံဗုမ် လ္တူကွာန်သ္ၚိဌာန် ညးဂမၠိုၚ်တံတုဲ ကောန်ၚာ်ကီု သီုမၞိဟ်အာယုက်ဇၞော်တံ ချိုတ်အာနွံတုဲ ရဲဒးဝပ်သၟးလေဝ် နွံမံၚ်ဗွဲမဂၠိုၚ်ကီုရောၚ်။
အကြာၜၚ်ကျာပၞာန် ကြဳဖျေံဗုမ်ဂှ်တှ်ေ သ္ၚိဌာန်၊ ဘာဗတောန်လိက်၊ ရုၚ်ကဵုဂဥုဲ၊ စမြိုၚ်ဒၞာဲပရေၚ်ဘာသာတံ ဒးအာဘဲနွံဗွဲမဂၠိုၚ်ရ။
အပ္ဍဲခရိုၚ်ဖာပန် ဟိုတ်နူဒပ်ပၞာန်ဗမာ ကြဳဖျေံမံၚ်ဗုမ် အတိုၚ်လၟေၚ်ၚ် တ္ၚဲနွံတုဲ ရဲကွာန်တံ ဟွံဂံၚ်ဆက်မံၚ်တန်တဴအာကီု အကြာဘဲအန္တရာဲ နာနာသာ်ဂှ် နကဵုစိုတ်ဖေက်တံ ဒးမံၚ်အာကဵု ဓဝ်သတိဇၞော်ဇၞော် အကြာဘဲအန္တရာဲတံရဂှ် နူကဵု CIDKP ဟီုပတိတ်လဝ်ရ။
အလုံဍုၚ်မွဲ ဟိုတ်နူဒပ်ပၞာန်ဗမာတံ ပန်မံၚ်ကဵုၜၚ်ကျာ ဒရုၚ် လွဟ်ဇၞော် ပရေၚ်ပကီုပရာတ်တံကီု၊ ရပ်ဂစိုတ်မံၚ်ညးဍုၚ်ကွာန် ကေုာံ ဖံက်ပကဝ်လဝ်အမှုရာဇဝတ်ပၞာန် ကၠောန်မံၚ်အရိုဟ်တ္ၚဲရဂှ် နူကဵု KNU လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – CJ