မတ်မလီု၊ နိုဝမ်ပါ ၁၂
အလဵုအသဳဒပ်ပၞာန် အုပ်ဓုပ်ပကၚ်ရၚ်လဝ် ပ္ဍဲကဵုမဟာဍုၚ်ဇၞော်တွဵုရးမန် ဍုၚ်မတ်မလီုဂှ် ပရေၚ်ဖံက်သ္ၚိကၠတ်ဂၠံက်ပၠံၚ်ၜးတံ ဒှ်ဂၠိုၚ်တိုန်မံၚ်စေအ်အ်ရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
အပ္ဍဲဍုၚ်မတ်မလီု သ္ၚိသဝ်ဝန်အစာဂဥုဲ အရာပ်ကုန်ကြုက် ဒးဖံက်ကၠတ်လဝ် နိုဝမ်ပါ ၈ ဂှ် ကပေါတ်ထဝ်သြန်တံ ၁၁၀၀ ကိုတ်ပြၚ် ဒးဘဲကမၠတ် ကၠတ်အာရ။
တုဲပၠန် အပ္ဍဲနိုဝမ်ပါ ၇ ဂှ်လေဝ် လ္တူဍုၚ်မတ်မလီု အရာပ်ဒိုၚ်ဝန်ကွေၚ်ဂှ် ညးတာလျိုၚ်ရုၚ်ကဵုအထံက်ပၚ် ပရေၚ်သၞောဝ်ဓဝ်တွဵုရးမန်မွဲတၠ အဟိန်ကွာ်ဝေၚ်မံၚ်ဂၠံၚ်ဂှ် နူလပါ်လက်ကြဴ သၟတ်ၜါတၠ ပၠံၚ်ကေတ် မဂွါထဝ်(ဇုက်ထဝ်)ရ။
တုဲကၠုၚ် အံက်တဝ်ပါ ၁၉ တေံ ပ္ဍဲအရာပ်ကုန်ခရိုၚ်ပြေၚ် ဍုၚ်မတ်မလီု သ္ၚိမွဲမ ဒးဖံက်ကၠတ်တုဲ ထဝ်သြန် ကြပ် ၁၅၀၀ ကိုတ်တံပါအာ မဒှ်ရ။
အကြာဒေသ ပရေၚ်ကၠတ်ဂၠံက်ပၠံၚ်ၜး သာ်တံဏံ ၐိုန်ရဒှ်ဂၠိုၚ်တိုန်မံၚ်ကီုလေဝ် လ္တူညးကလိလောန်ဒုဟ်ဂှ် ရဲဒပ်ဗၠာဲသၟိၚ် အလဵုအသဳပၞာန် တံ ရပ်ဟွံဂွံဏီတုဲ ပရေၚ်ပါ်ပါဲအကြာညးဍုၚ်ကွာန်တံ သၠုၚ်တိုန်မံၚ် မဒှ်ရ။
ပရေၚ်ကၠတ်ဂၠံက်ပၠံၚ်ၜးတံဏံ ဒှ်ဂၠိုၚ်တိုန်ဟီုဂှ် ဟိုတ်နူပရေၚ်အုပ်လဒမ် သၞောဝ်ဓဝ်ဟွံမွဲတုဲ ညးတာလျိုၚ် ပရေၚ်အုပ်ဓုပ်ဍုၚ်တံ အုပ်ဓုပ်ပကၚ်ရၚ်ဍုၚ်ဟွံမာန်ပုဟ်ဂှ် ညးလ္တူဍုၚ်မတ်မလီုမွဲတၠ ဟီုဂးပါ်ပါဲလဝ်ရ။
“ပရေၚ်အုပ်လဒမ်သၞောဝ်ဓဝ်ဟွံမွဲတုဲ ပၠံၚ်ၜးကွဳလိုန်ဓါတ်တံ ထံက်သေနာတ်တုဲ ပၠံၚ်ကွဳလိုန်ဓါတ်၊ ပၠံၚ်ကေတ်သြန်၊ ဥပဒေ ဟွံမွဲပုဟ်။ ရဲပရေၚ်အုပ်ဓုပ်ဍုၚ် အခိၚ်လၟုဟ်ဏံပၠန် အုပ်ဓုပ်လ္တူဍုၚ်မာန် ခိုဟ်ဟ်ဟွံသေၚ်ပုဟ်။ အေဂှ်တှ်ေ ညးဂှ်တာလျိုၚ်နွံမံၚ်ရော ဒၞာဲလဵုဂွံဗက်အာဟီု ဟွံတီပုဟ်” သာ်ဝွံ သ္ဂးရ။
တုဲပၠန် ပြဟ်ဟ်ဏံ ပရေၚ်ကၠတ်ဂၠံက်ပၠံၚ်ၜး ဒှ်ကၠုၚ်မ္ဂး အာတေၚ်စိုပ် ရုၚ်ဗၠာဲသၟိၚ်ဆေၚ်စပ်ကီုလေဝ် ရပ်ကဵုရဲကလိလောန်ဒုတ်တံ မာန်ဟွံမာန် ဟွံတီကီုလေဝ် သွက်ဂွံပံက်အမှုဒးကဵုမံၚ်သြန်တုဲ ဒးဂိၜါအလန်ဂှ် ညးဆက်ဟီုရ။
ဍုၚ်မတ်မလီုဂှ် ဒှ်ဍုၚ်ဇၞော် တွဵုရးမန်ကီုလေဝ် ကမၠောန်ကၟိတ်တံအောန်စှ်ေကၠုၚ် ပရေၚ်မံၚ်စံၚ်စသုၚ် ဝါတ်ကြေပ်ဂၠိုၚ်တိုန်ဂှ်ရ ပရေၚ်ကၠတ်ဂၠံက်ပၠံၚ်ၜးတံဏံ ဒှ်ဂၠိုၚ်တိုန်မံၚ်ဂှ် ညးဒေသမတ်မလီု မွဲတၠပၠန် ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ဍုၚ်မတ်မလီုဂှ် ဒှ်မဟာဍုၚ်ဇၞော်တွဵုရးမန်ဟီုကီုလေဝ် ကမၠောန်တံ ဝါတ်ကျာတ်ကၠုၚ်မံၚ်။ ပရေၚ်မံၚ်စံၚ်စသုၚ် ညးဍုၚ်ကွာန်တံ ဟွံပြေပြံၚ်ဒှ်ကၠုၚ်တုဲ ပရေၚ်ကၠတ်ဂၠံက်ပၠံၚ်ၜး ဒှ်ဂၠိုၚ်တိုန်ကၠုၚ်။ ဂၠိုၚ်တိုန်ကွေံကွေံဏောၚ်။ လၟုဟ်တှ် ကမၠတ်တံ ရဲပၠံၚ်စတံ ပဵုဂၠိုၚ်တိုန်” သာ်ဝွံ သ္ဂးရ။
မွဲလပါ်ပၠန် နူကဵုဒပ်ပၞာန်သီအဝဵုတေံ ပ္ဍဲဍုၚ်မတ်မလီုဂှ် ကိုန်အစဳဇန် Safe City ဂးတုဲ စကာသုၚ်စောဲ သြန်ဘဏ္ဍာညးဍုၚ်ကွာန် လၟိဟ်ကိုတ်ကဵုလ္ၚီ ဗွဲမဂၠိုၚ်တုဲ ဗက်ဂဇံက်စွံလဝ် ကေမ်မရာ CCTV လ္တူဍုၚ် ဒၞာဲသၠးလေဝ်ဟွံမွဲ ဗဂပ်စွံကဵုလဝ်ပေၚ်ၚ်ရောၚ်။
သီုကဵုဗက်ဂဇံက်စွံလဝ် ကေမ်မရာ CCTV လ္တူဍုၚ်သၟးဟွံက ထ္ၜးဟိုတ်ပရေၚ်ဂီုကၠီုတုဲ ဗက်ဂေတ်မံၚ်ကၚ်ဗဂေတ် ထ္ၜးမံၚ်ဇြဟတ်ကီုလေဝ် ကေၚ်ရပ်ဂွံလဝ် ညးကၠတ်ဂၠံက်ပၠံၚ်ၜးကဵု ရဲဒုဒရိုဟ်လ္ၚဵုတံ ညိညိညညဟေၚ်နွံရ။
အပ္ဍဲကဵုတွဵုရးမန် သၞာံဏံ စနူဂိတုဂျာန်နဝါရဳမံက်တေံ ဒဵုစိုပ်ဂိတု သိပ်တမ်ပါ ပွိုၚ် ၉ ဂိတုဏံ ပရေၚ်ကၠတ်ဒှ်လဝ် ၆၃ အမှုနွံတုဲ အပ္ဍဲဂှ် ရပ်ဂွံ ၂၉ အမှုဟေင်နွံ ၄၆% ပြင်ညိရနွံရောၚ် ဂွံတီလဝ်နူကဵု စၠတ်ထဝ်တွဵုရးမန်ရ။
ပရိုၚ်-သြၚ်လောန်တိုၚ်မ်
Photo – Social Media