ၜဳကလေၚ် ၊ နိုဝမ်ပါ ၁၃
အပ္ဍဲတွဵရးမန် အကြာပွိုၚ်ဍုၚ်လ္ၚဵုတံမ္ဂး စနူတ္ၚဲအကြာတံဏံဂှ် ဂကောံအလဵုအသဳပၞာန် နူကဵုဌာနစုၚ်ပံၚ်ကောံ ပံက်လဝ်ကရောၚ်ပၞာန်ဇၞော် ၅ ဂကောံတုဲ ကၠောန်မံၚ်ပရေၚ်စန်ဒက် ဂေတ်ဂေၚ်စှ်ေနေဝ်တံရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ဂကောံရုၚ်ဌာနစုၚ်တံ ပံၚ်ကောံကဵုလဝ်ယၟု ကရောၚ်ပၞာန်ဇၞော် ၅ ဂကောံ တံဝွံ ပ္ဍဲနိုဝမ်ပါ ၁၁ ဂှ် ကၠောန်မံၚ်ပရေၚ်စန်ဒက် ဂေတ်ဂေၚ်စှ်ေနေဝ် ပ္ဍဲကဵုကွာန်ညံၚ်ပလေန် ပွိုၚ်ဍုၚ်ၜဳကလေၚ်ရ။
ကရောၚ်ပၞာန်ဇၞော် ၅ ဂကောံတံဝွံ သွက်ပရေၚ်ဂီုကၠီုအကြာဒေသ၊ ပရေၚ်လဒမ်သၞောဝ်ဓဝ်၊ ဍုၚ်ကွာန်ညံၚ်ဂွံၜိုဟ်သြိုဟ်သာယာ ကေုာံ တက်လဝ်က္ဍိုဟ်ခုတ်လဝ်ယၟု သွက်ဂွံသၠုၚ်အသိၚ် ပရေၚ်ဖောအ်ဗြဳ တောတက်ဂးတုဲ ကော်ဆဵုဂဗလဝ် ညးဍုၚ်ကွာန်တံရ။
သွက်ပရေၚ်ဂီုကၠီုကဵု အုပ်လဒမ်သၞောဝ်ဓဝ်တံဂှ် အလဵုအသဳပၞာန်ဟီုကီုလေဝ် ပရေၚ်ၜိုဟ်လလမ်အကြာဒေသဟွံမွဲတုဲ သွက်ဂွံသၠုၚ်အသိၚ် ပရေၚ်ဖောအ်ဗြဳတောတက်ဂှ် သ္ၚောဲမံၚ်ဏီရောၚ် ညးဒေသၜဳကလေၚ်မွဲတၠ ဟီုရ။
“အလဵုအသဳဏံ ဒှ်အလဵုအသဳ ညးဍုၚ်ကွာန်ရုဲစှ်လဝ် ဟွံသေၚ်တုဲ ၜိုတ်လဵုဟီုဟီု ပြေပြံၚ်ဟွံသေၚ်ပုဟ်။ ပဋိပက္ခံတံ နွံတၟာဂလိုၚ်ဏီ။ ရးနိဂီုဍုၚ်ဇၞော် ဟွံၜိုဟ်လလမ်မ္ဂး ဆလံမှလေဝ် ပြေပြံၚ်ကၠုၚ်မာန် ဟွံသေၚ်ပုဟ်” သာ်ဝွံ သ္ဂးရ။
တုဲပၠန် ညးဍုၚ်ကွာန်တံ ညံၚ်ဂွံပါကၠုၚ်လပါ်ညးတံဂှ် ၐိုန်ရ စှ်ေမံၚ်ပရေၚ်စန်ဒက်ကီုလေဝ် မၞိဟ်ဗွဲဂၠိုၚ်တံ ပရေၚ်စိုတ်လုပ်စဟွံမွဲ အတိုၚ်ညးတံဟီုလဝ်ဂှ် ကၠောန်ကဵုအာကွေံကွေံ ဟွံသေၚ်ပုဟ် ညးဆက်ဟီုရ။
မွဲလပါ်ပၠန် ပရေၚ်အုပ်လဒမ်သၞောဝ်ဓဝ်ညံၚ်ဂွံနွံ အလဵုအသဳပၞာန်ကဵု ကောန်ရဲတဝ်သွာတံ ဟီုဂးမံၚ်ကီုလေဝ် အလဵုညးတံဂှ်ပၠန် ရပ်ကေတ်မၞိဟ် သွက်ယိုက်ဝန်ပၞာန်၊ ရပ်မၞိဟ်အာတ်သြန်သၟးဟွံက ထ္ၜဟိုတ်ပရေၚ်မွဲမွဲသာ်တုဲ ဗက်သီကေတ်မံၚ် ကပေါတ်ညးဂမၠိုၚ်တံလေဝ် နွံမံၚ်ရောၚ်။
တုဲပၠန် သွက်ဍုၚ်ကွာန် ညံၚ်ဂွံၜိုဟ်သြိုဟ်ရာၚ်ဆာဲ ဟီုကီုလေဝ် နူလ္တူဍုၚ်ၜဳကလေၚ် စိုပ်ဒဵုကဵုဂၠံၚ်ဇၞော်ကၟိန်ဍုၚ်ဂှ် ဒှ်မံၚ်ပေါဲဗတိုက် မွဲဏှမွဲဏှကီု သွက်ဂွံသၠုၚ်အသိၚ် ကၠောန်အာ ပရေၚ်ဖောအ်ဗြဳ တောတက် ဟီုကီုလေဝ် ဂၠံၚ်လီုမံၚ်တံဂှ် ပလေဝ်ကဵုဟွံမွဲပုဟ် ညးဒေသတံ သ္ဂးရ။
ဒပ်ပၞာန်ဗမာ ပရေၚ်သီအဝဵုတုဲ အကြာဒပ်ပၞာန်ကဵု ဂကောံဇြဟတ်ပၠန်ဂးတံ ပေါဲဗတိုက်ကေၚ်ဒှ်လဝ် ဒဵုစိုပ်အကြာအရာပ်လ္တူဍုၚ်တံကီု ဟိုတ်နူဘဲဒဏ်လွဟ်ဇၞော် ဒပ်ပၞာန်ဗမာတုဲ ညးဒေသလၟိဟ်ကဵုလ္ၚီတံ ဒးပါဲမံၚ်ဘဲပၞာန် မဒှ်ရ။
ဂကောံဌာနစုၚ်တံပံၚ်ကောံတံ ကဵုလဝ်ယၟု ကရောၚ်ပၞာန်ဇၞော် ၅ ဂကောံတံဝွံ တုဲကၠုၚ်သၞာံ ၂၀၂၂ စနူလက်ထက်ကံၚ်သဳပၞာန်တုဲ တၚ်က္ဍိုပ်လိက် ပရေၚ်အုပ်ဓုပ်ဒေသန္တရ၊ ပရေၚ်ဂီုကၠီု၊ နကဵုက္ဍိုပ်လိက် ပရေၚ်အုပ်လဒမ်သၞောဝ်ဓဝ်တုဲ စှ်ေဂေတ်နေဝ် ကၠောန်လဝ်ပရေၚ်ထိၚ်ဒဝ်တိဍာ်တံ မဒှ်ရ။
ပရိုၚ်-သြၚ်လောန်တိုၚ်မ်
Photo – MOI