ကျာ်ထဝ်၊ နိုဝမ်ပါ ၁၃
တွဵုရးမန် ပ္ဍဲပွိုၚ်ဍုၚ်ကျာ်ထဝ် ဒပ်ပၞာန်ဗမာကဵု ဒပ်ပၠန်ဂတးတံ အကြာပေါဲဗတိုက်ၐါလ္ပာ်ဒှ်လဝ်ဏံဂှ် ကရောၚ်ပၞာန်လ္ၚဵု ဂၠံၚ်ကၟာတ်မံၚ်ရဂှ် တမ်ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
စနူနိုဝမ်ပါ ၃ ဂှ် ပ္ဍဲပွိုၚ်ဍုၚ်ကျာ်ထဝ် နကဵုပရေၚ်လဝေၚ်ပၞာန်တၟေၚ် ဒပ်ပၞာန်ဗမာ ၁၂၀၀ ပြၚ်ၚ်တံ ပါ်လဝ် ၅ ကရောၚ်ပၞာန်တုဲ ထပက်လုပ်ကၠုၚ် ဒၞာဲဒပ်ပၠန်ဂတးတံဖျေံလဝ်သ္ဇိုၚ်ဂှ်ရ။
စိုပ်နိုဝမ်ပါ ၉ ဂှ်တှ်ေ ကရောၚ်ပၞာန်တံထပက်စိုပ်အာ အကြာပယျဵုတွဵုရးမန်ကဵု ရးဗဂေါတုဲ ပ္ဍဲနဝ်ပါ ၁၁ ဂှ် ကလေၚ်ဆုတ်ကၠုၚ် လ္ပာ်ကွာန်ဇြဳပျံၚ်(၅) ပွိုၚ်ဍာ်ကျာ်ထဝ် ဒၞာဲသ္ကိုပ်ဗျူဟာ ဂဇအ်ဖျေံလဝ်သ္ဇိုၚ်ဂှ်ရ။
အပ္ဍဲမွဲဒမြိပ်ဂၠံၚ်ကရောၚ်ပၞာန် ကလေၚ်ဆုတ်စဴဂှ်တှ်ေ ဂကောံမဟာမိတ်ဒပ်ပံၚ်ကောံပၠန်ဂတးတံ ဗက်ကြတ်ကၟာတ်ဆိုအ်ဗတိုက်ဂှ်ရ ပေါဲဗတိုက်အကြာၜါလပါ် ဒှ်တိုန်ဇၞော်ကဵုဇြဟတ်ရ။
ပြဟ်ဟ်ဏံ ကရောၚ်ပၞာန်ဗမာတံ ဂၠံၚ်ကၟာတ်မံၚ် ပ္ဍဲကြုၚ်ဒုန်ကလိ၊ ကွာန်ဝေန်ကာန်ကဵု ခမံက်ခွေတံတုဲ နူကဵုလပါ်ဒပ်ပၞာန်ဗမာ ထဍာၚ်ပန်မံၚ်ကဵုလွဟ်ဇၞော်ကီု သီုကဵုပၞာန်ကျာလဝ် ဒုၚ်ဒဝ်ကဵုလဝ် သ္ဂးရ။
ပ္ဍဲပရေၚ်လဝေၚ်ပၞာန်ကျာ်ထဝ်ဏံ သီဂွံလဝ် ရုၚ်ဌာန်ဂအုပ်ပၞာန် ရးတၟေၚ် အလဵုအသဳ NUGကီု၊ ဗဒိုပ်ဒပ်ကရေၚ် KNLA ၊ ဗဒိုပ်ဒၞာဲ ဒပ်ပၠန်ဂတးတံ ၁၁ ဒၞာဲဂှ် နူလပါ်ဒပ်ပၞာန် ပတိတ်လဝ်ပရိုၚ်ရ။
ဆဂးဂှ် နူလပါ်ဒပ်ပၞာန်ဗမာတံသီဂွံလဝ် ရုၚ်ဌာန်ဂအုပ်ရးတၟေၚ် အလဵုအသဳ NUG ဟွံသေၚ်၊ ပတိတ်လဝ်ပရိုၚ်ဗၠေတ်တ်ရောၚ်ဂှ် လပါ် NUG ဟီုပလန်လဝ်ကီုရ။
ပရိုၚ်-သြၚ်လောန်တိုၚ်မ်
Photo – Social Media