ပရေၚ်ဒပ်ပၞာန်ဗမာကြဳဗုမ် အမာတ်မန်လ္ၚဵုတံ အာအာတ်အရီုဗၚ် ဇရေၚ် နာယကစၠတ်ထဝ်

ရေဝ်၊ နိုဝမ်ပါ ၁၈

အပ္ဍဲကဵုဒၞာဲ တိဍာ်ဗော်ဍုၚ်မန်တၟိ ဒေါအ်လဝ်ပန်ပှော် ဒေသကၞောတ်ၜဳရေဝ်ဂှ် ဟိုတ်နူဒပ်ပၞာန်ဗမာ ကြဳဗုမ်တုဲ ညးဍုၚ်ကွာန်လ္ၚဵု ပရေၚ်ချိုတ်ဒးဝပ်နွံဂှ်ရ အမာတ်မန်လ္ၚဵုတံ အာအာတ်အရီုဗၚ် ဇရေၚ်နာယကစၠတ်ထဝ်ကၟိန်ဍုၚ် ဥူအံၚ်လေန်ဒွေရ။

ပေါဲဗတိုက်ဟွံမွဲကီုလေဝ် ပ္ဍဲဒေသကၞောတ်ၜဳရေဝ် ကွာန်ဟဠာန်ပါၚ်ကြုၚ် ကဵု ကွာန်ချေအ်ဍာ်တံဂှ် ပ္ဍဲနဝ်ဝမ်ပါ ၁၅ ကဵု ၁၆ ၜါတ္ၚဲဆက်ဆက် နူကဵုၜၚ်ကျာဒပ်ပၞာန်ဗမာ ကြဳဖျေံလဝ်ဗုမ် လၟိဟ်ဟွံအောန်နူကဵု ၂၀ မရ။

ဟိုတ်နူဒပ်ပၞာန်ဗမာကြဳဗုမ်တုဲ ကောန်ကွာန် နူကဵုၜါကွာန်ဏံ ၅ တၠ ချိုတ်အာ ၃၀ တၠပြၚ်ဒးဝပ်၊ ဗဒမ်ဂဥုဲၜါမ ကေုာံ သ္ၚိဌာန် ဟွံအောန်နူကဵု ၂၀ မ လီုလာ်ဆောံလေၚ်အာရ။

ပရူဒဒှ် ပရေၚ်ဒပ်ပၞာန်ဗမာကြဳလဝ်ဗုမ်ဂှ် နူကဵုအမာတ်ပွိုၚ်ဍုၚ်ရေဝ် ဒံက်တာ ဗညာအံၚ်မိုဝ်၊ မိမျေအ်တာန်၊ နာဲဆာန်တိ ကဵု အမာတ်ပွိုၚ်ဍုၚ်ၜါသွာၚ် နာဲယေဝ်ထောဋ်အံၚ်တံ အာပတိုန်ထ္ၜး အာတ်အရီုဗၚ် ဇရေၚ်နာယကစၠတ်ထဝ်ကၟိန်ဍုၚ် ဥူအံၚ်လေန်ဒွေရ။

ဟိုတ်နူဒပ်ပၞာန်ဗမာ ကြဳလဝ်ဗုမ် ပ္ဍဲဒေသကၞောတ်ၜဳရေဝ်ဂှ်ရ ကောန်ကွာန်ဗွဲမဂၠိုၚ် ပရေၚ်လီုလာ်ဆောံလေၚ် ဒးဝပ်ချိုတ်အာနွံတုဲ နူကဵုညးဆေၚ်စပ်တံ ညံၚ်ဂွံကေတ်ကဵုတာလျိုၚ်ကီု ဗွဲကြဴ ပရေၚ်ဗီုတံဏံ ညံၚ်ဟွံဂွံထပ်ဒှ်ပၠန် ပတိုန်ထ္ၜးလဝ်ရဂှ် ဒံက်တာဗညာအံၚ်မိုဝ် ချူလဝ် ပ္ဍဲမုက်လိက်ပရေၚ်မှာဇန် ညးရ။

ပၞာန်ကျာဒပ်ပၞာန်ဗမာ ထောံဖျေံဗုမ် ပ္ဍဲဒေသကၞောတ်ၜဳရေဝ်ဂှ်တှ်ေ တၚ်ရန်တၟံနွံနွံ ဗတိုက်ဏာလဝ် ရုၚ်ဂဥုဲတံဂှ်ကီု၊ ဒၞာဲသ္ၚိဌာန် ကောန်ကွာန်ကေုာံ စမြိုၚ်ဒၞာဲကပေါတ်ကောန်ကွာန် ကောန်အရာပ် တံတုဲ ဖံက်ပကဝ်ကၠောန်လဝ် ဒုဟ်ရာဇဝတ်ပၞာန်ရောၚ် ဂကောံဇြဟတ်ရာမည ဖိတ်ဒရေဝ်ခေတ်တၟိ NRFF လလောၚ်တြး ပတိတ်လဝ်နွံရ။

ဟိုတ်ဂှ်ရ ပရေၚ်ကေတ်အရေဝ် လ္တူဂကောံပၞာန်တံဂှ် နူကဵုဗော်ဍုၚ်မန်တၟိ ထေက်ကဵုဒးထ္ၜးအာတုဲ ပရေၚ်ဒေါအ်လဝ် ပန်ပှော်ကုအလဵုအသဳပၞာန် ပံၚ်တောဲကၠောန်အာမံၚ် နကဵုပရေၚ်ဍုၚ်ကွာန်တံဂှ် ထေက်ကဵုဒးကလေၚ်ချပ်ဗစာအာ ဇြိုဟ်ဟ်နက်က်ရောၚ် NRFF ထံက်ထ္ၜးရ။

ပ္ဍဲကဵုလိက်ကသုက်ပရေၚ်ဒေါအ်ပန်ပှော် NCA မ္ဂး ဒပ်ပၠတရဴပၠန်ဂတးမန် ဗော်ဍုၚ်မန်တၟိ ထပက်လဝ်စၟတ်တဲတုဲ တက်မံၚ်ကျာပရေၚ်ၜိုဟ်လလမ်ကဵု အလဵုအသဳပၞာန်တံရ။

ပ္ဍဲကဵုဒၞာဲတိဍာ်ဗော်ထိၚ်ချုက်လဝ် ဒေသကၞောတ်ၜဳရေဝ် ပရေၚ်ဒပ်ပၞာန်ဗမာကြဳလဝ်ဗုမ်ဂှ် နူလပါ်ဗဟဵုဗော်ဍုၚ်မန်တၟိ ဟွံပတိတ်ပရိုၚ်မွဲသာ် မံၚ်ဒၟံၚ်သ္ၚိတ်တ်ဖိုအ်ရ။

ပရိုၚ်-သြၚ်လောန်တိုၚ်မ်

Photo – MOI

Leave a Reply

Your email address will not be published. Required fields are marked *