ၜါသွာၚ် ၊ နိုဝင်ဘာ ၁၈
တွဵုရးမန် အကြာပွိုၚ်ဍုၚ်ၜါသွာၚ် ဂအာၚ်တိကွာန်ပိုၚ် (စားကျက်မြေ) တံဂှ် ၜက်ၜေတ်လုပ်သိုၚ်လဝ်သ္ၚိဌာန်တံဂှ်ရ ညံၚ်ဂွံပါဲတိတ်အာဂှ် နူကဵုရုၚ်သ္ကိုပ်ဌာန ပရေၚ်အုပ်ဓုပ်ပွိုၚ်ဍုၚ် ပလံၚ်ဗစိုပ်ကဵုလဝ် လိက်အမိၚ် (နို့တစ်စာ) ရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပ္ဍဲအကြာဂအာၚ်တိကွာန်ပိုၚ် (စားကျက်မြေ) ဂှ် ညးဒေသတံ အတိုၚ်ပၟိက်ဆန္ဒဇကုဇကု ၜက်ၜေတ်လုပ်သိုၚ်လဝ်သ္ၚိဌာန်၊ စမြိုၚ်ဒၟံၚ်၊ ကၟာၚ်ဒပ်၊ လုပ်တဵုလွဳစွံလဝ်တၞံဆုတံတုဲ စကာလဝ်ဗီုပြၚ်တၞဟ်ဟ် နွံမံၚ်ဂှ် စၟဳစၟတ်ဂၠိုက်ဂၠာဲဆဵုညာတ်လဝ် သ္ဂးရ။
အတိုၚ်လၟုဟ် ဗီုလုပ်ၜက်ၜေတ်ကၠောန်လဝ် ပ္ဍဲဂအာၚ်တိကွာန်ပိုၚ် (စားကျက်မြေ) တံဂှ် စနူအခိၚ်ဂွံလိက်အမိၚ်ဏံတုဲ ညံၚ်ဂွံကလေၚ်စွံအာ အတိုၚ်အကာဲအရာတမ်မူလတေံပၠန်၊ ယဝ်ဟွံဒဂေတ်ဗက်အာမ္ဂး ဆက်ကေတ်အာအရေဝ် နကဵုသၞောဝ်ဥပဒေ တန်ကြန်လၟုဟ်ရောၚ် ကဵုလဝ်သတိရ။
ဂအာၚ်တိကွာန်ပိုၚ် (စားကျက်မြေ) တံဂှ် နူကဵုသ္ကိုပ်အုပ်ဓုပ် အဆက်က်တေံ သွံစလဝ်တုဲ ကေတ်အရေဝ်ပရေၚ်ဏံမ္ဂး ဒးကေတ်အရေဝ် ညးတာလျိုၚ်ဂကောံကၠာတေံ အဆက်ဆက်တံ ကီုရောၚ် ညးစၞးအမာတ် ပွိုၚ်ဍုၚ်ကျာ်မြဟ် ဥူတဇြဝ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
စနူဂိတုနဝ်ဝမ်ပါဏံမံက်တုဲ လိက်အမိၚ် ညးသိုၚ်လဝ်လ္တူ ဂအာၚ်တိ ကွာန်ပိုၚ် (စားကျက်မြေ)တံ ညံၚ်ဂွံပါဲတိတ်အာဂှ် နူကဵုဌာနသ္ကိုပ် ပရေၚ်အုပ်ဓုပ် မွဲအဆံၚ် သ္ကိုပ်အုပ်ဓုပ်အရာပ်/ကွာန်ဆေၚ်စပ်တံ ဗက်ပလံၚ်ကဵုမံၚ် မဒှ်ရ။
အတိုၚ်ညးဒေသတံဟီုတှ်ေ သ္ၚိဒးဒုၚ်ပလံၚ်လဝ်လိက်အမိၚ် နွံမံၚ်လၟိဟ်ကဵုလ္ၚီ မဒှ်တုဲ ယဝ်ရ သ္ၚိဌာန်သိုၚ်လဝ် လ္တူဂအာၚ်တိ ကွာန်ပိုၚ် (စားကျက်မြေ) တံသီုဖအိုတ် ဒးပါဲမ္ဂး ပါဲနူသ္ၚိ လ္တူဍုၚ်ၜါသွာၚ် ဂရမ်နွံတံတုဲ ကွာန်ဗွဲမဂၠိုၚ် ဒးပါဲအာမာန်ရောၚ် သ္ဂးရ။
ထ္ၜးဟိုတ်ကဵု တိဂအာၚ်ကွာန်ပိုၚ် (စားကျက်မြေ)တံတုဲ အလဵုအသဳပၞာန် ကဵုညးဍုၚ်ကွာန်တံပါဲတိတ်အာဂှ် ညးဒေသတံ ပတိုန်ထ္ၜးလဝ်ကဵု ညးစၞးအမာတ်တံကီုလေဝ် ဗီုပြၚ်လဵုဖန်ဖက်အာ ရောဟီုဂှ် ဟွံဂွံတီဏီပုဟ် ညးဒေသတံ ဟီုရ။
အတိုၚ်စရၚ်လၟိဟ်မၞိဟ် သၞာံ ၂၀၂၄ မ္ဂး ပ္ဍဲပွိုၚ်ဍုၚ်ၜါသွာၚ်ဂှ် လ္တူဍုၚ်နွံမံၚ် ၃ အရာပ်၊ ဂအုံကွာန် ၄၄ နွံတုဲ လၟိဟ်မၞိဟ် မွဲကိုတ်ပြၚ်ၚ် တန်တဴမံၚ်စံၚ်မံၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media

