အပ္ဍဲတွဵုရးမန် ပကောံဂွံလဝ်ကောန်ပၞာန်တၟိ သွက်ယိုက်ဝန်ပၞာန် ၆၄၀၀ ပြၚ်

မတ်မလီု ၊ နိုဝင်ဘာ ၁၈

အပ္ဍဲတွဵုရးမန် သွက်ဂွံယိုက်ဂၠေၚ်ဝန်ပၞာန် ဘာပၞာန်လၟေၚ်ဂိတု ပံက်ကၠုၚ်လဝ် နူကဵုလၟေၚ် ၁ စိုပ်လၟေၚ် ၃၀ ဂှ် ပကောံဂွံလဝ် ကောန်ပၞာန်တၟိ ၆၄၀၀ ပြၚ်နွံမံၚ် အတိုၚ်တၚ်နၚ် ဌာန်ပရိုၚ် သြၚ်လောန်တိုၚ်မ် ပကောံဂွံလဝ်ဂှ် ဂွံတီရ။

ပ္ဍဲနိုဝမ်ပါ ၁၆ ဂှ် ပံက်လဝ်ဘာယိုက်ဝန်ပၞာန် လၟေၚ် ၃၀ ပ္ဍဲကဵုဘာလ္ၚတ်ကွတ် ပရေၚ်ပၞာန်တန်သၠုၚ် လၟိဟ် (၄) ဖျေံလဝ်သ္ဇိုၚ် ကွာန်ဝါကလဳ ပွိုၚ်ဍုၚ်ဇြပ်ဗုဂှ်ရ။

သွက်ဂွံတိုန်ဘာယိုက်ဝန်ပၞာန် လၟေၚ် ၃၀ ဂှ် ပကောံလဝ်သၟတ် အပ္ဍဲဒေသ ၜိုတ် ၂၀၀ တၠတံတုဲ ဗွဲမဂၠိုၚ်ဂှ်တှ်ေ ဒပ်ပၞာန်ဗမာတံ တံၚ်ပဝ်တာတုဲ ရပ်ဏာလဝ် အတေၚ်အဓ္ဓမတံ မဒှ်ရ။

ဗွဲကြဴဏံ အခိၚ်ဗ္တံ ရဲစဴကၠုၚ်နူပေါဲ စွံလဝ်ပွန်ကဵုသၟတ်တံတုဲ ဂကောံပၞာန်တံရပ်ပကောံကေတ်မံၚ် ကောန်ပၞာန်တံရဂှ် ညးဒေသမန်မွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။

“ကၠောန်လဝ်ဝိုၚ်ဝေၚ်တံ နွံမံၚ်။ သၟတ်တံ အခိၚ်စဴကၠုၚ်နူပေါဲဂှ် ဍေံတံတံၚ်ရပ်ပဝ်တာတံ နွံမံၚ်။ အကြာ ၃/၄ တ္ၚဲဏံရ ခယျနွံၜိုတ်အဝဲကောန်ၚာ် ၂ တၠ အခိၚ်ကၠုၚ်ပေါဲဂှ် မၚ်ရပ်ကေတ်နူဒၞာဲဂၠုဂၠုတုဲ တံၚ်ပတိုန်ဏာ လ္တူကွဳစက်” သာ်ဝွံ သ္ဂးရ။

တုဲပၠန် ပေါဲသဘၚ် အလဵုအသဳပၞာန်ကဵုလဝ်အခေါၚ်တံဂှ် ဒှ်မံၚ်ဒၞာဲ ဂွံပကောံကေတ်သၟတ်တံ သွက်ဂွံလုပ်ယိုက်ဝန်ပၞာန်တုဲ သၟတ်တံ ကောံတုဲအာကၠုၚ်မ္ဂး အကာဲအရာပရေၚ်ဂီုကၠီုဟွံမွဲ ဒှ်ကၠုၚ်မံၚ်ယျဂှ် ညးဆက်ဟီုရ။

မွဲလပါ်ဂှ်ပၠန် သ္ကိုပ်အုပ်ဓုပ်အရာပ်ကွာန် သၟဝ်အလဵုအသသဳပၞာန်တံပၠန် သၟတ်အာယုက် လုပ်ကၠုၚ်အဝေါၚ်ယိုက်ဂၠေၚ်ပရေၚ်ပၞာန်တံဂှ် ကော်ကဵုလိက်ရုၚ်၊ ကဵုဂၠံက်ကေတ်မာဲသၟးဟွံက သီုကဵုကၠုၚ်ကော်ကေတ် ဒဵုကဵုစိုပ်သ္ၚိ ဒှ်မံၚ်ရောၚ်။

တုဲပၠန်အခိၚ်ဗ္တံ ရဲတိတ်မ္ၚးသ္ၚိတံကီု၊ အခိၚ်အာကမၠောန် အခိၚ်ကလေၚ်စဴနူကမၠောန်၊ ညးဖံက်အမိၚ်ဒေသန္တရတံဂှ်လေဝ် ကောန်ရဲတဝ်သွာ ရဲဒပ်ပၞာန်တံ ဗက်ရပ်ကေတ်ပဝ်တာ အတေၚ်အဓ္ဓမတုဲ ပကောံကေတ်လဝ် သွက်ယိုက်ဝန်ပၞာန်တံ မဒှ်ရ။

ဒၞာဲလ္ၚဵုလ္ၚဵုတံမ္ဂး သွက်ဂွံပကောံကောန်ပၞာန်တၟိ ဂွံတိုန်ဘာပၞာန်ဂှ် သၞာဲဒါလ္ၚဵုတံလေဝ်ပါလုပ်ကီုတုဲ လဆောဝ်လဆောဝ်မ္ဂး သၞာဲဒါညးယိုက်ဝန်အလဵုအသဳတံ ကလေၚ်သွံရာန်စညးသ္ကံလေဝ် ကေၚ်ဒှ်ကၠုၚ်လဝ်နွံရ။

ပရိုၚ်-သြၚ်လောန်တိုၚ်မ်

Photo – Kawao Newsgroup

Leave a Reply

Your email address will not be published. Required fields are marked *