အပ္ဍဲကဵုပလေဝ်သ္ဇိုၚ်သၞောဝ်ဥပဒေ တာလျိုၚ်ပိုဲ ၃ တၚ် ညံၚ်ဟွံယုတ်ဒေက်အာ နာယကစၠတ်ထဝ် ဗတိုက်ဖအောဝ်

နေဗျဳဒဝ် ၊ နိုဝမ်ပါ ၁၈

စပ်ကဵု ကမ္မတဳပံၚ်တောဲ ချူခၞံပလေဝ်အာသ္ဇိုၚ်သၞောဝ်ဥပဒေ ၂၀၀၈ မ္ဂး တာလျိုၚ်ပိုဲ ၃ တၚ် ညံၚ်ဟွံယုတ်ဒေက်အာ ရးနိဂီုဍုၚ် သွက်ဂွံဒှ်ဂုဏ်ဖဵုမာန် စွံပရေၚ်ဇြိုဟ်နက်တုဲ ကၠောန်အာညိဂှ် နာယကစၠတ်ထဝ် ကၟိန်ဍုၚ် ဥူအံၚ်လေန်ဒွေ ဗတိုက်ဖအောဝ်လဝ်ရ။

အပ္ဍဲကဵုသ္ဇိုၚ်သၞောဝ်ဥပဒေ တၚ် ၄၃ တၚ် ထေက်ကဵုဒးဗပေၚ်အာ ဂှ်ကီု စပ်ကဵုလိက်ကသုက်တၚ်တုပ်စိုတ်ကၟိန်ဍုၚ် ၁၊ ၂၊ ၃ တံတုဲ အဟိန်ဆဵုဂဗလဝ်ကဵု ကမ္မတဳလ္ၚတ်ပံၚ်တောဲ ပကောံတၚ်နၚ် ဥပဒေအပြောံ နိုဝမ်ပါ ၁၆ ဂှ် ဟီုဗကန်လဝ်ရောၚ်။

သ္ဇိုၚ်သၞောဝ်ဥပဒေဝွံ ဒှ်သၞောဝ်ဥပဒေ ရးနိဂီုဍုၚ်သၠုၚ်အိုတ်တုဲ ချူခၞံစုတ်လဝ် သၞောတ်ပရေၚ်အုပ်ဓုပ်၊ အခေါၚ်အရာကောန်ဍုၚ်တံ ကေုာံ ပရေၚ်ပါ်ပရအ်အဝဵုတံဂှ်ရ ဒှ်မံၚ်အတေၚ်ဆီ ဍုၚ်နိဂီုမွဲရောၚ် ညာတ်ကေတ်လဝ် သ္ဂးရ။

ဆဂး အကြာရဲပွဳဗွိုၚ်ပရေၚ်ဍုၚ်ကွာန်တံကဵု ဥပဒေတံဂှ် စပ်ကဵုပလေဝ်အာ သ္ဇိုၚ်သၞောဝ်ဥပဒေမ္ဂး လညာတ်ဗီုပြၚ်နာနာသာ် သဳကၠဳကယျာန်သွာတ် ညးသ္ကံနွံမံၚ်တုဲ တာလျိုၚ်ပိုဲ ၃ တၚ် ညံၚ်ဟွံဟုတ်ယုတ် ဒေက်စှ်ေအာ သ္ၚဳဂၠိပ်အိုတ်ညိဂှ် ဗတိုက်ဖအောဝ် ကဵုလဝ် ကမ္မတဳပံၚ်တောဲတံရ။

ပ္ဍဲကဵု တာလျိုၚ်ပိုဲ ၃ တၚ်မ္ဂး ကၟိန်ဍုၚ်ညံၚ်ဟွံဒကးပြးအာ၊ ပရေၚ်ညဳသၟဟ်ကောန်ဍုၚ်အရၚ် ညံၚ်ဟွံဒကးပြး၊ အဝဵုအာဏာ ပရေၚ်ပိုၚ်ပြဳ ညံၚ်ဂွံတန်ကြန်ခိုၚ်ကၠိုက် သွက်ဂွံစဵုဒၞာ သ္ဇိုၚ်မူရးနိဂီုဍုၚ် တံဂှ် နကဵုဒပ်ပၞာန် တာလျိုၚ်နွံရောၚ် ချူခၞံစုတ်လဝ် ပ္ဍဲကဵုသ္ဇိုၚ်သၞောဝ်ဥပဒေ မဒှ်ရ။

ပ္ဍဲကဵုဂလာန်လိက်သဝဏ် သမ္မတဍုၚ် ၄၃ တၚ်၊ ပ္ဍဲကဵုသဘၚ်သဳကၠဳ ကောန်ဂကူ အတိုၚ်ပရေၚ်တုပ်စိုတ်လိက်ကသုက် NCA တၚ်နၚ် ချုက်လဝ်လိက်ကသုက် တၚ်တုပ်စိုတ်ကၟိန်ဍုၚ် ၁၊၂၊ ၃ တံဂှ် ပလံၚ်ဗစိုပ်ကဵုလဝ် ဇရေၚ် စၠတ်ထဝ်ကၟိန်ဍုၚ်ရ။

လ္ၚတ်သ္ၚဳဂၠိပ်အာတၚ်နၚ်တံတုဲ ညံၚ်ဂွံကိက်ညဳကဵု အကာဲအရာ ဍုၚ်နိဂီု ပကတိဒှ်မံၚ်တံဂှ်တုဲ သွက်ဂွံပလေဝ်အာ နကဵုနဲကဲဥပဒေ စၠတ်ထဝ်တံမာန်ဂှ် ဒးဆက်ကၠောန်အာရောၚ် ဥူအံၚ်လေန်ဒွေ သီုကဵုဒှ်မံၚ် ဥက္ကဌစၠတ်ထဝ်ကောန်ဂကူ ဟီုလဝ်ရ။

ပြဟ်ဟ်ဏံ နူကဵုစၠတ်ထဝ်အလန်တတိယတေံ ပ္ဍဲကဵုလိက်ကသုက် တၚ်တုပ်စိုတ်ကၟိန်ဍုၚ် ရိုဟ်ကၞက်တၚ်နၚ် သဳကၠဳလဝ်ညးသ္ကံ သၠဲသၠဲလးလး နွံမံၚ်တံဂှ်ကီု တၚ်နၚ် ၄၃ တၚ်တံဂှ်ကီု ဒှ်တၚ်တၟေၚ်ဂှ် ညးဆက်ဟီုရ။

ဣဏံဂှ်တှ်ေ တုဲကၠုၚ်အလဵုအသဳၜါအဆက်တေံ ဒုၚ်သ္ဇိုၚ် တၚ်နၚ်ကဵုလဝ်ကသပ် နူကဵုစၠတ်ထဝ် အလန်ပထမကဵု အလန်ဒုတိယ တံဂှ်တုဲ ဗီုပြၚ်ထမံက်လဝ်ရုပ်ရဴတံဂှ် ဟီုလဴလဝ်ရ။

သွက်ဂွံချူခၞံပလေဝ်/ ထပ်ဗပေၚ်စုတ်အာတၚ်နၚ် သ္ဇိုၚ်သၞောဝ်ဥပဒေ ဂှ် သဳကၠဳကေတ်အာသွဟ် နူကဵုတၚ်နၚ် နွံလဝ်ခိုၚ်ၚ်ကၠိုက်က်တံတုဲ သွက်ဂွံကၠောန်အာ အတိုၚ်လၟေၚ်နဲကဲတံဏံမာန်ဂှ် နွံမံၚ်ပၟိက်ကဵု ဥပဒေအပြောံမွဲ မဒှ်ရ။

သွက်ပရေၚ်ဏံ တၚ်နၚ်သ္ဇိုၚ် ၄၃ တၚ်နွံမံၚ်ရရတုဲ ဒုၚ်သ္ဇိုၚ်ကေတ် တၚ်နၚ်ခိုဟ်ဟ်တံဏံ သွက်ဂွံချူခၞံအာ ဥပဒေမူအပြောံမာန် ဒးကဵုတာလျိုၚ် ပံက်လဝ် ကမ္မတဳပံၚ်တောဲရဂှ် သ္ဂးရ။

အပ္ဍဲကဵုစၠတ်ထဝ် ကမ္မတဳပံၚ်တောဲဝွံ ဒက်ပတန်လဝ် ညးစၞးနူကဵု ဗော်ပရေၚ်ကွာန် ဒပ်ပၞာန်တံတုဲ ယဝ်ရလညာတ်ပါ်ခြာ ညးသ္ကံ နွံကၠုၚ်မ္ဂး ရံၚ်အာမုက် ပရေၚ်ဂုဏ်ဖဵု ရးနိဂီုဍုၚ်ကဵု ညးဍုၚ်ကွာန်တံတုဲ မွဲလပါ်ကဵုမွဲလပါ် သ္ပအဲပရဲ ဂလာန်ပတေဟ်နွံနွံ သဳကၠဳအာညိဂှ် ဟီုလဴကဵုလဝ် ညးပါလုပ်ဂကောံကမ္မတဳတံရ။

ဆေၚ်စပ်ကဵုပလေဝ်သ္ဇိုၚ်သၞောဝ် ဥပဒေ၊ နဲကဲဥပဒေတံ သီုကဵုဥပဒေ ဒုၚ်ကေတ်ဆန္ဒအလုံဍုၚ်တံဂှ် ဒစးဒုၚ်လ္ၚတ်အာတုဲ နူကဵုပရေၚ် ဂိုတ်ဂစာန်လွဳပရာ ကမ္မတဳဏံမွဲအဆံၚ် သွက်ဂွံဒှ်အထံက်ပၚ် ပရေၚ်ညိၚ်ဝပ်ဍုၚ်ကေုာံ ပရေၚ်ဖောအ်ဗြဳမာန် တဲညဳကသုညဳ ပံၚ်တောဲကၠောန်အိုတ်ညိဂှ် ဗတိုက်ဖအောဝ်လဝ်ကီုရ။

ဒက်ပတန်လဝ် ကမ္မတဳပံၚ်တောဲဏံ နကဵုညးစၞးစၠတ်ထဝ် ညးဍုၚ်ကွာန် ၃၈ တၠ ကေုာံ ညးစၞးစၠတ်ထဝ်ကောန်ဂကူ ၃၈ တၠ၊ ညးစၞးဒပ်ပၞာန် ၁၄ တၠတံတုဲ နူကဵုဗော်ဗျဳခိုၚ်ဖျိုဝ်ဂှ် ကေတ်လဝ်တာလျိုၚ် ဥက္ကဌ၊ ဒုဥက္ကဌ၊ ညးအုပ်ကာ၊ ဖက်ဆောညးအုပ်ကာတံတုဲ သ္ကိုပ်သ္ကပၠမံၚ်တရဴရ။

သွက်ဂွံပလေဝ်သၞောဝ်သ္ဇိုၚ်ဥပဒေ ပ္ဍဲကဵု ၄၃ တၚ်ဂှ်တှ်ေ ဒစဵုဒစး ဗၠေၚ်မံၚ်နူကဵု သၞောတ်ဖိတ်ဒရေဝ်၊ ဍာ်ဒကေဝ်ဒဳမဝ်ကရေသဳ၊ အုပ်ဒလမ်သၞောဝ်ဓဝ်၊ အခေါၚ်အရာမၞိဟ်တံတုဲ သွက်သၞောတ်တၠအဝဵုပၞာန် ဒုၚ်သ္ဇိုၚ်သၞောဝ် ဒက်ပတန်ဍုၚ်ဟေၚ် ခိုၚ်ကၠိုက်အာမာန်ရောၚ် နူကဵုဂကောံ Spring Sprouts ကဵုလဝ်သတိကိုပ်ကၠာရောၚ်။

အလုံမွဲလၟေၚ်ပရောဒဒှ်တံဂှ် ယဝ်ရလ္ၚတ်ရံၚ်အာမ္ဂး ဒုၚ်သ္ဇိုၚ် သ္ပလဝ်ဗဟဵုကဵုဒပ်ပၞာန်တုဲ သၠဲပတိုန်လဝ်အာဏာစက် သမ္မတဂှ်ရ နူကဵုသၟဝ်က္ဍိုပ်လိက် ပရေၚ်ဖိတ်ဒရေဝ်ဂှ် ပလေဝ်စလဝ် သွက်အဝဵုပၞာန် ဂွံတန်ကြန်ခိုၚ်ဗိုန်အာရောၚ် ထံက်ထ္ၜးကဵုလဝ်ရ။

ပရိုၚ်-သြၚ်လောန်တိုၚ်မ်

Photo – MOI

Leave a Reply

Your email address will not be published. Required fields are marked *