အပ္ဍဲမုဟ်ဍုၚ် ရဲဒပ်ဗၠာဲသၟိၚ် ၁ တၠကဵု ညးဒေသ ၁ တၠ ဒးဒုၚ်ပန်

မုဟ်ဍုၚ်၊ နိုဝမ်ပါ ၁၉

တွဵုရးမန် ပွိုၚ်ဍုၚ်မုဟ်ဍုၚ် ပ္ဍဲကဵုဍုၚ်ကမာဝက်ကဵု ပ္ဍဲဂၠံၚ်လုပ် ဘာဂြိုပ်ဖအံက်တံဂှ် ရဲဒပ်ဗၠာဲသၟိၚ် ၁ တၠကဵု ညးဒေသ ၁ တၠတံ ဒးဒုၚ်ပန်တုဲ ဒးအာဝပ်ဂှ် ဂွံတီနူကဵုညးဒေသတံရ။

ပ္ဍဲနိုဝမ်ပါ ၁၇ အခိၚ်သဝ်တ္ၚဲ ၆ နာဍဳဂှ် နူကဵုဗ္ဒိုပ်ဗၠာဲသၟိၚ်ကမာဝက် ကောန်ဒပ်ဗၠာဲသၟိၚ် သာန်လောန်ဥူ အခိၚ်ရာန်မံၚ်ဖျာ လက်ကရဴရုၚ်ဂဥုဲ ကရပ်ဗ္ဒိုပ်ဗၠာဲသၟိၚ်ဂှ် ရဲရပ်လွဟ်တံ ဍိုက်ကၠုၚ် ကွဳလိုန်ဓါတ်တုဲ ပန်စုတ်လဝ် သ္ဂးရ။

ပွိုၚ်မွဲတ္ၚဲဓဝ် အခိၚ်သဝ်တ္ၚဲဂှ်ရ ကောန်ကွာန်ဝက်ဒါ ကိုမျိုဝ်သူရအံၚ် နူကဵုကွာန်ကြုၚ်ဖါ် ဍိုက်ကွဳလိုန်ဓါတ် ကၠုၚ်လပါ်မုဟ်ဍုၚ် စိုပ်ဒၞာဲဂိက်သၞေဟ်ကၚ် အကြာဂၠံၚ်ဘာဂြိုပ်ဖအံက်ကြပ်စိုပ်ဂှ် ရဲရပ်လွဟ်တံ ဗက်ကၠုၚ်ကဵုကွဳစက် လပါ်လက်ကရဴတုဲ ပန်စုတ်လဝ် သ္ဂးရ။

ပွိုၚ်မွဲတ္ၚဲဓဝ် ညးဒးဒုၚ်ပန်လဝ် ဒးအာဝပ်သီု ၂ တၠတံဏံဂှ် အကာဲအရာဒးဒှ်ဒွိၚ်နွံမံၚ်တုဲ ညးဒေသဒးဒုၚ်ပန်ဂှ်တှ်ေ ရဲကၠောန်မံၚ်ကမၠောန်ရာဘာ ဓမ္မတာမွဲတၠရောၚ် ဂွံတီရ။

ညးဒးဒုၚ်ပန်ဏာ သီု ၂ တၠတံ ဒးလဝ်ဘဲဝပ်မကမ် ပ္ဍဲကဵုဗုၚ်၊ တဲ ကေုာံ လက်ကရဴတံတုဲ အကာာဲအရာ ဒဒှ်ဒဝိၚ်နွံဂှ်ရ ပလံၚ်လဝ်ရုၚ်ဂဥုဲဇၞော် ဍုၚ်မတ်မလီုရ။

ဒှ်လဝ်ပရေၚ်ပန်ဂစိုတ် သီု ၂ ဒၞာဲဏံဂှ် နူကဵုဂကောံလဵု မူဟိုတ် ကၠောန်လဝ်ဂှ်တှ်ေ ဒဵုကဵုနိုဝမ်ပါ ၁၈ ပတိတ်လဝ်ပရိုၚ်ဂှ် ဟွံမွဲဏီပုဟ်။

အပ္ဍဲနိုဝမ်ပါ ၈ ဂှ်ပၠန် ကောန်ကွာန်ဝက်ဒါ အာယုက် ၂၂ သၞာံ ထက်မြက်ဝေၚ် (ကော်) သနေဥူ အဟိန်အာမံၚ်လပါ် ကွာန်ကၞာလဵု အဃောစိုပ်ကၠုၚ်ကွာန်နာၚ်သၠုၚ်ဂှ် ရဲရပ်လွဟ်တံပန်တုဲ ဒးလဝ်ဝပ် ဇၞော်ကဵုဇြဟတ်နွံမံၚ်ရောၚ် ဂွံတီရ။

ပရိုၚ်-သြၚ်လောန်တိုၚ်မ်

Photo – Social Media

Leave a Reply

Your email address will not be published. Required fields are marked *