မတ်မလီု ၊ နိုဝင်ဘာ ၁၉
ပ္ဍဲကဵုဒေသမန် အလဵုဇကု ခမဳသၚ်၊ ထပိုဲ ကေုာံ သဳလဗြဴမိန်တံဂှ် လ္ပဒဳကွဳစက် ကွဳလိုန်ဓါတ်ကေတ်တ်အိုတ်ညိဂှ် နူကဵုဌာနပံၚ်ကောံ အလဵုအသဳပၞာန်တံ ဗက်တာဒၞာ ကၠောန်ၜိုတ်မံၚ်အိုတ်ရ။
နကဵုအလဵုဇကု ခမဳသၚ် ထပိုဲ ကေုာံ သဳလဗြဴမိန်တံဂှ် လ္ပဒဳကွဳစက် ကွဳလိုန်ဓါတ် ကေတ်တ်အိုတ်ညိဂှ် စနူဂိတုနိုဝမ်ပါမံက်ဏံ နူကဵုတၠဂုဏ်အစာ ထိၚ်ဒဝ်စေဝ်ပၞောန်သင် ပွိုၚ်ဍုၚ်တံ စကဵုလဝ်သမ္တီ ဗက်ကဵုမံၚ်ပညာတံ ကၠောန်ကဵုလဝ်နွံရ။
ၜိုန်ရ ကၠောန်မံၚ်ပရေၚ်ကဵုပညာကီုလေဝ် ယဝ်ရ ခမဳသၚ် ၊ ထပိုဲ ကေုာံ သဳလဗြဴမိန်တံ ဒဳအာကွဳစက် ကွဳလိုန်ဓါတ်ကေတ်တ်မ္ဂး ဗီုပြၚ်လဵု ကေတ်အာအရေဝ်ရောၚ်ဂှ် နူကဵုအလဵုအသဳပၞာန် လလောၚ်တြးလဝ် ဟွံမွဲဏီပုဟ်။
နကဵုအလန်ပထမကိုပ်ကၠာ ကဵုအာပရေၚ်ပညာ လကျာ်ခၟဳသၚ်တံတုဲ ဂတနူဏံ ယဝ်ရသၚ်တံ ဒဳအာမ္ဂး သီကေတ်ထောံကွဳစက် နဒဒှ် ရးနိဂီုဍုၚ်ပိုၚ်ရောၚ် ပရေၚ်ဟီုဂးမံၚ်တံနွံမံၚ်ရောၚ်ဂှ် ညးဒေသၜဳကလေၚ်မွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ဍေံတံ အလန်ပထမ နကဵုပရေၚ်ကဵုပညာ ကၠောန်အာမံၚ် အကြာဖျာ အကြာဂၠံၚ်ပန်သွာၚ်တံ။ ဂတနူဏံ လ္ပဒဳရ ဟီုလဝ်။ ယဝ်ရဒဳမ္ဂး ကေတ်အရေဝ် သီုသီကေတ်ကွဳစက်ဏောၚ်။ သီကေတ်ကွဳစက် နကဵုဘဏ္ဍာဍုၚ်။ ကွဳစက်ခမဳသၚ်တံ ခမဳသၚ်တံ အခေါၚ်ဒဳဟွံမွဲပုဟ်။ ဒါယကာတံ ဒဳညိ” သာ်ဝွံ သ္ဂးရ။
နူကဵုရဲဌာနဆေၚ်စပ်တံ ဟီုမံၚ် အလဵုဇကုခမဳသၚ်တံ လ္ပဒဳကွဳစက် ကွဳလိုန်ဓါတ်ကေတ်တ်ညိ ကာလပရေၚ်ကဵုပညာ ဟီုကီုလေဝ် ကာလပရေၚ်ကဵုပညာဂှ် စနူကဵုစၟတ်တ္ၚဲလဵု တ္ၚဲလဵုကၠောန်အာရောဂှ် ဟီုလဝ် ချိုတ်တ်ပၠိုတ်တ်ဟွံမွဲပုဟ်။
ဗာန်လဝ်သတေတ်ကာ ဘာလကျာ်တုဲ ညးဆေၚ်စပ်ကဵု ဘာလကျာ်တံဟေၚ် ဗက်ဍိုက်မံၚ် ကွဳစက်ဘာလကျာ်တံတုဲ ဗီုမိက်ဂွံဒဳဂှ်ဒဳအာမံၚ်တုဲ ကေတ်အရေဝ်ဍာံဍာံမ္ဂး ခိုဟ်ကွံကွေံရောၚ် ညးလတ္တူဍုၚ် မတ်မလီု မွဲတၠပၠန်ဂှ် ဟီုကဵု ဌာန်ပရိုၚ် သြၚ်လောန်တိုၚ်မ်ရ။
“ကွေံကွေံဂှ် ဘာလကျာ်မွဲ ကွဳစက်မွဲမဂှ် ရုံဂပ်ရ။ ဂၠိုၚ်အိုတ် လောန်အိုတ် ကွဳစက် ၂ မတှ် ရုံဂပ်ရုံဂပ်ဏောၚ်။ ဒုၚ်လဝ်ယၟုဘာလကျာ်တံ ဗာန်လဝ်သတေကာတံတုဲ ညးဆေၚ်စပ်မံၚ်ကဵု ဍေံတံရ ဍိုက်ကွဳစက် ဂကူစုၚ်တံဂၠိုၚ်မံၚ်။ တုဲပၠန် စဳပၞောန်ဂၠံၚ် စဳပၞောန်ကွဳစက်ယာန် ညံၚ်ကဵုဟွံမွဲပုဟ်။ ဗီုမိက်ဂွံကြန်ဂှ်ကြာန် ဗီုမိက်ဂွံဒဳဂှ် ဒဳ” သာ်ဝွံ သ္ဂးရ။
အပ္ဍဲအကြာဒေသတံမ္ဂး မဂၞန်ဆေၚ်စပ်ကဵုပရေၚ်သာသၞာ အရံၚ်ဍာ်မိတ် ဗဂပ်စုတ်လဝ်မဂၞန်တံဂှ် ဒှ်မံၚ်ကွဳစက်လိုၚ်သေန်ဟွံမွဲတံဂၠိုၚ်တုဲ သၚ်လ္ၚဵုတံဒဳကေတ်တ်လေဝ်နွံ ညးလ္ၚဵုဒုၚ်ယၟု ဘာလကျာ်တုဲ ဍိုက်မံၚ်ညံၚ်ရဴကွဳစက်သ္ၚိ ဒကာဘာတံဒုၚ်ယၟုတုဲ ကၠောန်ၜိုတ်လဝ်ရောၚ်။
အခိၚ်ကၠာတေံ ကွဳစက်ဗာန်စုတ်လဝ် မဂၞန်ဆေၚ်စပ်ကဵု ပရေၚ်သာသၞာမ္ဂး အပ္ဍဲဂိက်ကၚ်မူသာ်လေဝ်ဟွံစၟဳစၟတ် ကဵုဏာအခေါၚ်တုဲ ဟိုတ်နူဒဳကွဳစက်စောဝ်ပၞောန်ဟွံမွဲဂှ်ရ ဒှ်ကၠုၚ်ပရေၚ်ဟိုတ် နွံဗွဲမဂၠိုၚ်ဂှ် ဂွံဆဵုညာတ်လဝ်ရ။
ပ္ဍဲတွဵုရးမန် ဂိတုတုဲကၠုၚ်တေံ ညးတာလျိုၚ်တံ ရပ်လဝ်ကွဳစက် စကာမံၚ်လိုၚ်သေန်ဟွံမွဲတံဂှ်တုဲ နကဵုဘာလကျာ်တံ လ္ပဍိုက်ကွဳစက် လိုၚ်သေၚ်ဟွံမွဲညိဂှ်လေဝ် ကဵုလဝ်သတိနွံမံၚ်ရ။
ပရိုၚ်-သြၚ်လောန်တိုၚ်မ်
Photo – MOI

