အမေရိကာန် ပန်ဗတိုက်လဝ် တ္ကအ်အဳရာန်တုဲ သွက်အရၚ်အန္တရာဲ ဍုၚ်ပ္ၚံက်ၜဳတံ ဒစးဒုၚ်ပလေဝ်စမံၚ်

တဳဟဳရာန် ၊ နိုဝမ်ပါ ၁၉

အမေရိကာန် ပန်ဗတိုက်ဏာ တ္ကအ်ကက် ဍုၚ်အဳရာန်တံ သွက်ဂွံစဵုဒၞာအာ အန္တရာဲ ဍုၚ်မဟာမိတ်တံဂှ် အမေရိကာန် ဒစးဒုၚ်ပလေဝ်စကဵုလဝ်တုဲ နူကဵုဍုၚ်ကူဝိက် ကလေၚ်ဆေဝ်ဒဝ် ပရေၚ်ဒရုၚ်တံ ဗတိုက်ကၠုၚ်မာန်ရဂှ် နူကဵုဝါယှေန်တာန် ဟီုရ။

ဗတိုက်လဝ် ဗ္ဒိုပ်ပၞာန်အမေရိကာန် ဖျေံသ္ဇိုၚ်ဍုၚ်ဗာရုၚ်မွဲဒၞာဲဂှ် အဳရာန် ဟီုပတိတ်လဝ်တုဲ ခြာပွိုၚ်မွဲတ္ၚဲ နိုဝမ်ပါ ၁၈ ပယျာံနူဂယးဂှ် ကြတ်ဗတိုက်ဖျေံဏာ ဘဲသၞအန္တရာဲကျာတံမာန်ယျဂှ် ဍုၚ်ဗာရုၚ် ဟီုရ။

စနူကဵု ဂိတုဖေဖဝ်ဝါရဳတေံ အမေရိကာန်ကဵု အေတ်သရေဝ်တံ စကၠောန်လဝ်ပေါဲပၞာန် အဳရာန်ဂှ် အကာဲအရာပရေၚ်ကြံၚ်မ္ၚိုဟ် ယအ်စှ်ေအာကီုလေဝ် အကြာၜါလပါ်ဂှ် ဗတိုက်မံၚ်ညးသ္ကံဖိုဟ်ဏီရောၚ်။

ဒုၚ်ပ္ၚံက်ၜဳ ဒုၚ်လဝ်တဲအမေရိကာန်တံ ဖျေံလဝ်သ္ဇိုၚ် ဒၞာဲစမြိုၚ်နာနာတံဂှ် တဳဟဳရာန် ကလေၚ်သၠုၚ်ပတိုန်အသိၚ်တုဲ ပလန်တဲ ဗတိုက်မံၚ်ရ။

ပရေၚ်စဵုဒၞာဘဲပၞာန်ကျာ ဇကုတံဂှ် ဒဒုၚ်ဇီုကပိုက်လဝ်ကဵု ဘဲအန္တရာဲဒရုၚ်တံဂှ် ကလေၚ်ပန်ဖျေံလဝ် ဒပ်ပၞာန်ကူဝိက် ဟီုလဝ်တုဲ အတိုၚ်ကဵုလဝ်ကသပ် ပရေၚ်ဗၠးဘဲအန္တရာဲပၞာန်ကျာဂှ် ညးဍုၚ်ကွာန်တံ ဒဂေတ်ဗက်အိုတ်ညိ ဗတိုက်ဖအောဝ်လဝ်ရ။

အမေရိကာန် ပန်ဗတိုက်ဏာလဝ် တ္ကအ်ကက် ဍုၚ်အဳရာန်တံဂှ် ပရေၚ်လီုလာ်ဇၞော်ဇၞော် ဟွံမွဲပုဟ် နူကဵုဌာန်ပရိုၚ် ဍုၚ်အဳရာန် IRNA ဟီုလဝ်ရ။

ဒၞာဲကောန်ပၞာန်အမေရိကာန်တံ ပိုၚ်ပြဳတန်တဴမံၚ်တံဂှ် အဳရန် စွံပွန် ပန်ဗတိုက် ဂၠိုၚ်တိုန်ကၠုၚ်တုဲ ဒးပလန်တဲ ကလေၚ်ပန်ဗတိုက်လဝ် ဗီုတံဏံရောၚ် ညးတာလျိုၚ်မွဲတၠ သ္ဂးရ။

သွက်ဂွံထိၚ်ချုက်ကေတ် ၜဳဟဝ်မုဇ်မာန်ဂှ် ဝါယှေန်တာန်ကဵု တဳဟဳရာန်တံ ပြိုၚ်မာန်အိုတ်စောန်တုဲ အခိၚ်တဳဟဳရာန် ဂစာန်ကၟာတ်ထောံဂှ် ဒပ်ပၞာန်အမေရိကာန်တံ ဂစာန်စဵုဒၞာမံၚ်ကဵု ၜၚ်အာကၠုၚ်မံၚ်တရဴဍာ်တံဂှ်ရ။

အကြာၜါလပါ် ပရေၚ်ပန်ဗတိုက် ဍိုက်ကၠမ်ပေၚ်ၚ် ဟွံကလေၚ်စဒှ်ကၠုၚ်ဏီလေဝ် ပရေၚ်ကြံၚ်မ္ၚိုဟ်တံ တေၚ်မံၚ်ညးသ္ကံ မဒှ်ရ။

Ref:Reuters

Leave a Reply

Your email address will not be published. Required fields are marked *