ဗြဝတဳ၊ နိုဝမ်ပါ ၁၉
ဒပ်ကရေၚ် DKBA ကဵုလဝ်ပရေၚ်စဵုဒၞာ ဂိုဏ်ကျာဖျ Tai Chang ဏံဂှ် ယဝ်ရကဵုတၚ်နၚ်မာန်မ္ဂး ဖျေံကဵုလာဘ် သြန်ဒဝ်ဠာအမေရိကာန် ၁၀ ကိုတ်ရောၚ် ၜိုန်ရအမေရိကာန် လလောၚ်တြးလဝ်ကီုလေဝ် DKBA ဟွံသ္ပဂရုဲတုဲ ကမၠောန်ကျာဖျ Tai Chang တံ ဆက်ဂေတ်မံၚ် ပ္ဍဲတိဍာ် DKBA ဖိုအ်ရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
သွက်ဂွံကလေၚ်သီကေတ်သြန် သေန်တာလီသြန် Tai Chang နွံမံၚ်ဍုၚ်ဗမာဂှ် ညးပလံၚ်ကဵုတင်နၚ်ဂှ်မ္ဂး နူကဵုအလဵုအသဳအမေရိကာန် ဖျေံကဵုလာဘ်ဒဝ်ဠာအမေရိကာန် ၁၀ ပြကောတိကိုတ်ရောၚ် ရုၚ်ကလုတ်အမေရိကာန် ဆေၚ်စပ်ကဵုဍုၚ်ဗမာ လလောၚ်ပတိတ်လဝ်ပရိုၚ်ရ။
သေန်တာကမၠောန်လီသြန် နွံမံၚ်ဍုၚ်ဗမာတံဂှ် သွက်ညးဍုၚ်ကွာန် အလုံဂၠးကဝ်မွဲ ဒးမံၚ်ဘဲတံဍေံတုဲ လ္တူပရေၚ်ကိစ္စဏံ နကဵုဍုၚ်အမေရိကာန် ကေတ်မံၚ်အရေဝ်ရောၚ် ပ္ဍဲလိက်လလောၚ်တြး ချူထမံက်လဝ်ရ။
ကမၠောန်ရာဇဝတ်တံဏံ လီကေတ်မံၚ်သြန် နူကဵုကောန်ဍုၚ်အမရိကာန်တံသၟးဟွံက သီုကဵုကူသာန်သွံစမၞိဟ်တုဲ ပ္ဍဲကမၠောန်ပရေၚ်လီလာန်တံဂှ် စကာနနဲအဓ္ဓမ ရေက်ကးဇြောတ်ဆီပတိတ်မံၚ်ပရဲတံရဂှ် ရုၚ်ကလုတ်အမေရိကာန် သ္ဂးလဝ်ရ။
စပ်ကဵု ဂိုဏ်ကျာဖျ Tai Chang ဂှ်တုဲ ယဝ်ရကဵုတၚ်နၚ်မာန်မ္ဂး ဖျေံကဵုလာဘ် သြန်ဒဝ်ဠာအမေရိကာန် ၁၀ ကိုတ် လလောၚ်တြးလဝ် ဒၞာဲသေန်တာ ဂိုဏ်ကျာဖျ Tai Chang ၃ ဒၞာဲ ဂှ်တှ်ေ နွံမံၚ်ပ္ဍဲဒေသကျံက်ခက် မွဲဒမြိပ်ပယျဵုသေံ-ဗမာ ပွိုၚ်ဍုၚ် ကျာ်ဗြဝတဳရ။
သေန်တာ ဂိုဏ်ကျာဖျ Tai Chang ၃ ဒၞာဲဏံဂှ်တှ်ေ နွံမံၚ်အပ္ဍဲတိဍာ် ဒပ်ကရေၚ် DKBA ထပက်လဝ်စၟတ်တဲ လိက်ကသုက်ပရေၚ်ဒေါအ်ပန်ပှော် NCA မဒှ်ကီုရ။
ၜိုန်ရဍုၚ်အမေရိကာန်ကဵု ဍုၚ်ဂၠးကဝ်တံ ကၠောန်ပရေၚ်မာတ်ဆိုအ် ပတိတ်လဝ်လာဘ်သြန် လ္တူညးတာလျိုၚ် DKBA အဆံၚ်လ္တူတံနွံကီုလေဝ် ပ္ဍဲကဵုဒၞာဲ DKBA တံထိၚ်ချုက်လဝ် တိဍာ်ကျံက်ခက်၊ သုံဇြဳမျာၚ်၊ ဒေသကျာပိတံဂှ် အသိၚ်ကမၠောန်ညိဟွံလီု ကမၠောန်ကျာဖျတံဆက်ဂေတ်အာမံၚ်ဏံ မဒှ်ရ။
ဗွဲတၟေၚ်မ္ဂး မၞိဟ်ယၟုတိတ်မံၚ် ဥက္ကဌ ဂကောံပရေၚ်ပိုန်ဒြပ် DKBA သ္ကိုပ်ပၞာန် သိုၚ်ဂျဝ်လှ ထိၚ်ချုက်လဝ် ဒေသကျံခက်၊ သုံဇြဳမျာၚ်၊ ၜါမဳထ၊ ဒဵုဍာဲ အကြာကွာန်တံဂှ် ပရေၚ်ကမၠောန်ကျာဖျဂမၠိုၚ် ဆက်တန်တဴ နွံအာမံၚ်ဏီရဂှ် ညးဒေသတံ သ္ဂးရ။
ပ္ဍဲကဵုအကြာတိဍာ် ရဲကၠောန်မံၚ်ကမၠောန်ဖျ လ္ၚဵုတံဂှ်တှ်ေ နူကဵု DKBA သ္ကိုပ်ပၞာန် သဝ်သာန်အံၚ်၊ သိုၚ်ကျဝ်လှ တံပၠတရဴတုဲ သိုၚ်ခၞံဒၞာဲစမြိုၚ်တၟိ ပြံၚ်ဆုဲဒဵုစိုပ်ဇိုၚ်ဒဵု ကရပ်ကွာန်သုကလိ ဇိုၚ်ဒဵုမူလအိတံတုဲ ကမၠောန်ကျာဖျတံဏံ ဆက်ဂေတ်အာဏီဂှ် သ္ဂးရ။
ပ္ဍဲကရပ်ဇိုၚ်ဒဵုမူလအိ သွက်ဂွံသိုၚ်ခၞံအာ စမြိုၚ်ဒၞာဲကျာဖျတၟိတၟိတံဂှ်မ္ဂး သွက်ဂွံကၠောန်ပရေၚ်ကၠာဲဘာသာတုဲ ကော်ကေတ်မၞိဟ် သွက်ဂွံအာကၠောန် ပ္ဍဲရုၚ်ကမၠောန်တံလေဝ် ပါလုပ်မံၚ်ကီုရောၚ် ညးဒေသတံ ဟီုရ။
စပ်ကဵုပရေၚ်ဂိုဏ်ကျာဖျ Tai Chang ဂှ်တုဲ ယဝ်ရကဵုတၚ်နၚ်မာန်မ္ဂး ဖျေံကဵုလာဘ် သြန်ဒဝ်ဠာအမေရိကာန် ၁၀ ကိုတ် အမရိကာန် လလောၚ်တြးလဝ်တံဂှ် နူကဵု DKBA မုလေဝ် ကလေၚ်ခၠေဝ်သှ်လဝ် ဟွံမွဲပုဟ်။
ပရိုၚ်-သြၚ်လောန်တိုၚ်မ်
Photo – Social Media

