ပ္ဍဲဒေသကၞောတ်ၜဳရေဝ် ၜၚ်ကျာဂေတ်ကၚ် ဒပ်ပၞာန်ကျာ ဗက်ထံၚ်ပရိုၚ်

ရေဝ်၊ နိုဝမ်ပါ ၂၀

ဒပ်ပၞာန်ဗမာ ဟိုတ်နူကြဳဗုမ်တုဲ ညးဍုၚ်ကွာန်တံ ဒးဝပ်၊ ချိုတ်အာလဝ် ပ္ဍဲဒေသကၞောတ်ၜဳရေဝ် တိဍာ်ဗော်ဍုၚ်မန်တၟိဂှ် ၜၚ်ကျာမၚ်ကၚ် ဒပ်ပၞာန်ကျာ ဗက်ထံၚ်ပရိုၚ်နွံမံၚ်ရောၚ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။

စနူနိုဝမ်ပါ ၁၇ တုဲ ပ္ဍဲဒေသကၞောတ်ၜဳရေဝ် ၜၚ်ကျာကၚ် ဒပ်ပၞာန်ကျာ ဗက်ထံၚ်မံၚ်ပရိုၚ်ဂှ်ရ ညးဒေသဂမၠိုၚ် ဟွံဂံၚ်မံၚ်အကြာကွာန်တုဲ ဒၞာဲဗၠးဘဲမာန်တံဂှ် ၜးတိတ်ပါဲအာအိုတ်ရ။

ဟိုတ်ၜၚ်ကျာကၚ် ဒပ်ပၞာန်ကျာ ဗက်ထံၚ်မံၚ်ပရိုၚ်ဂှ်ရ ညးဍုၚ်ကွာန်တံ သွက်ဂွံကၠောန်စကမၠောန်ဂှ် ဒးဂွိၚ်မံၚ်ကဵု အန္တရာဲလမျီု ညးတံနွံတုဲ ကောန်ကွာန်ဗွဲမဂၠိုၚ်တံ ဟွံဂံၚ်မံၚ် အပ္ဍဲကွာန်အိုတ်ရပုဟ် သ္ဂးရ။

တုဲကၠုၚ် နိုဝမ်ပါ ၁၅ -၁၆ တေံမ္ဂး ပ္ဍဲကဵုဒေသကၞောတ်ၜဳရေဝ် ကွာန်ဟဠာန်ပါၚ်ကြုၚ်ကဵု ကွာန်ချေံဍာ်တံဂှ် ဒပ်ပၞာန်ကျာဗမာတံ ကြဳဖျေံလဝ်ဗုမ် ဟွံအောန်နူကဵု ၂၀ မ မဒှ်ရ။

ဟိုတ်နူပရေၚ်ကြဳဗုမ်ဏံ ကောန်ကွာန် ၅ တၠချိုတ် ၃၀ ပြၚ်ဒးဝပ်တုဲ ဂဒမ်ရုၚ်ဂဥုဲ ၂ မကေုာံ သ္ၚိဌာန် ၂၀ မဟွံအောန် လီုလာ်အာလဝ်ဂှ် နူဂကောံဇြဟတ်ရာမည ဖိတ်ဒရေဝ်တၟိ NRFF လလောၚ်တြးလဝ်ရ။

ဟိုတ်နူ ဒပ်ပၞာန်ဗမာ ကြဳဗုမ် ညးဍုၚ်ကွာန်ဗွဲမဂၠိုၚ် ဒးဝပ်ချိုတ်အာ နွံတုဲ အမာတ်မန်လ္ၚဵုတံ ပ္ဍဲနိုဝမ်ပါ ၁၇ ဂှ် အာစိုပ် အာတ်လဝ်အရီုဗၚ် ကုဇရေၚ်နာယက ဥူအံၚ်လေန်ဒွေ ကီုရ။

ဟိုတ်နူဒပ်ပၞာန်ဗမာ ဖံက်ပကဝ် လိက်ကသုက်ဒေါအ်ပန်ပှော်တုဲ ကြဳဖျေံဗုမ် ပ္ဍဲကဵုတိဍာ်ဗော်ဍုၚ်မန်တၟိကီု ကေတ်မံၚ်ဇၞး လ္တူညးဍုၚ်ကွာန်တံဂှ် ဒုၚ်ညိၚ်အာမံၚ်သ္ၚိတ်တ် အတိုၚ်ဏံမ္ဂး ဗော်ဍုၚ်မန်တၟိသၟးဟွံက ဂုဏ်သိက္ခာပရေၚ်ဍုၚ်ကွာန် ပၠန်ဂတးမန်တံလေဝ် ယုတ်သဝ်စှ်ေအာမာန်ရောၚ် NRFF သ္ဂးလဝ်ရ။

ဟိုတ်ဂှ်တုဲ နကဵုဗော်ဍုၚ်မန်တၟိ ဒးကလေၚ်ကေတ်အရေဝ် ဖန်ဖက်အာလ္တူဒပ်ပၞာန်ဗမာတံကီု ဒေါအ်လဝ်ပန်ပှော်ကဵု ဂကောံပၞာန်တံနကဵုပရေၚ်ဍုၚ်ကွာန် ပံၚ်တောဲမံၚ်ကဵုဒပ်ပၞာန်ဗမာ တံဂှ် ဒးချပ်ဗ္စာအာဇြိုဟ်ဟ်နက်က်ထေက်ရောၚ် NRFF ဗတိုက်ဖအောဝ်လဝ်ရ။

ဟိုတ်နူ ဒပ်ပၞာန်ဗမာကြဳဗုမ်တုဲ ညးဒေသပွဳပွူ ချေံဍာ်၊ ဟဠာန်၊ နေဝ်ပျာ၊ မဏိပူရ တံ ဒးဂြိပ်ပါဲမံၚ်အိုတ်တုဲ နွံမံၚ်ပၟိက်ကဵု ပရေၚ်အရီုဗၚ်ကာမံက်တိုန် ကွေံကွေံရောၚ် ဂွံတီရ။

ပရိုၚ်-သြၚ်လောန်တိုၚ်မ်

Photo – CJ

Leave a Reply

Your email address will not be published. Required fields are marked *