တယိတ်ချံၚ်၊ နိုဝမ်ပါ ၂၀
ရးတနၚ်သဳ ပွိုၚ်ဍုၚ်တယိတ်ချံၚ် ဒပ်ပၞာန်ဗမာ ထပက်ကၠုၚ် ကရောၚ်ပၞာန် အပ္ဍဲပွိုၚ်တိုက်တံၚ်ပျံက်ဂှ် ရပ်ကၠေၚ်ဏာ ညးဒေသ ၄ တၠတုဲ ဂစိုတ်ထောံလဝ်ဂှ် ရိုဟ်ကၞက်ပရိုၚ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ရဲကွာန် ဝေန်ကဖဝ် မတိုဝ်ဝ် အာယုက် ၃၆ သၞာံ၊ တၠသ္ၚိ ကိုသိုဝ်နိုၚ် အာယုက် ၃၇ သၞာံ၊ ကောန်ကွာန်ချံၚ်ဂျဳ ကိုသုဖျိုဝ်၊ ရဲကွာန်ကျံက်အိုၚ် ကိုနေယေဝ်ဥူတံ မဒှ်ရ။
ပ္ဍဲနိုဝမ်ပါ ၁၅ ကရောၚ်ပၞာန်ဗမာ ဇြဟတ် ၂၀၀ ပြၚ် ထပက်ကၠုၚ် ကရောၚ်ပၞာန် ပွိုၚ်တိုက်တံၚ်ပျံက်ဂှ် ဂဗဆဵုညးတံ ၄ တၠတုဲ ရပ်ကၠေၚ်ဏာရ။
ရုပ်ဇွညးတြုံ ဒးဒုၚ်ရပ်ဏာ ၃ တၠတံဂှ် ပ္ဍဲနိုဝမ်ပါ ၁၇ ဂှ် ဆဵုညာတ်ကရပ်ကွာန်တုဲ ရုပ်ဇွညးဗြဴဂှ်တှ်ေ ကလေၚ်ဆဵု ပ္ဍဲနိုဝမ်ပါ ၁၈ ဂှ် မဒှ်ရ။
ညးဗြဴဒးဒုၚ်ရပ်ကၠေၚ်လဝ်ဂှ် ဆဵုညာတ်လဝ် လက်ျှန် ပလီုပလိုက် သ္ပလဝ်ကောန်ဗြဴတုဲမှ ဂစိုတ်လဝ်တုဲ ညးတြုံ ၃ တၠဂှ်တှ်ေ ၜုၚ်တက်ပျဲပျာံ ဂစိုတ်လဝ်ရောၚ် သ္ဂးရ။
ကရောၚ်ပၞာန်ဒပ်ဗမာတံ နိုဝမ်ပါ ၁၇ ဂှ် ကလေၚ်တိတ်အာ နူပွိုၚ်တိုက်တံၚ်ပျံက်ဂှ်ရ ညးပါဲဘဲပၞာန်လ္ၚဵု ကလေၚ်လုပ်ကၠုၚ် ကွာန်တုဲ ဗက်ဂၠာဲညးကၠေံအာလဝ်တံရ။
အခိၚ်ကရောၚ်ပၞာန် လုပ်ကၠုၚ်ပွိုၚ်တိုက်တံၚ်ပျံက်ဂှ် ဒှ်ပေါဲဗတိုက်ကဵု ဒပ်ပံၚ်တောဲ မဟာမိတ်ပၠန်ဂတးတံတုဲ အကြာဍာန်ဂၠံၚ် ဆဵုညာတ်အာ ညးဒေသ ၁၀ တၠပြၚ်တံဂှ် ရပ်ကၠေၚ်ကော်ဏာ လဝ်ရောၚ် ညးဒေသတံ ဟီုလဝ်ရ။
ပရိုၚ်-သြၚ်လောန်တိုၚ်မ်
Photo – Social Media

