မတ်မလီု၊ နိုဝမ်ပါ ၂၁
ပ္ဍဲကဵုဒေသပယျဵု ဒၞာဲဆက်စပ် ပွိုၚ်ဍုၚ်ကျာ်ထဝ် တွဵုရးမန်ကဵု ပွိုၚ်ဍုၚ်ယှိုဲကျေန် ရးဗဂေါတံဂှ် ဒပ်ပၞာန်ဗမာ သီဂွံလဝ်ဗဒိုပ်ဒပ်ပၞာန် KNLA ၂၈ ဒၞာဲရဂှ် လလောၚ်တြးလဝ် ပ္ဍဲနိုဝမ်ပါ ၂၀ ဂှ်ရ။
ပၞောဝ်အာကဵု ဗဒိုပ်ပၞာန် KNLA ၂၈ ဒၞာဲမ္ဂး ပ္ဍဲကဵုပွိုၚ်ဍုၚ်ယှိုဲကျေန်ဂှ် ၁၁ ဒၞာဲ သှ်ေမံၚ်ဗဒိုပ် ၁၇ ဒၞာဲဂှ်တှ်ေ နွံမံၚ်အပ္ဍဲပွိုၚ်ဍုၚ် တိၚ်ဇြယာတ်ရဂှ် ချူထမံက်လဝ် ပ္ဍဲလိက်လလောၚ်တြးရ။
တုဲပၠန် သီဂွံဏာလဝ် ဌာန်ဂအုပ်ရးပၞာန်တၟေၚ် ဂကောံအလဵုအသဳ NUG ကီုရောၚ်ဂှ် ချူလဝ် ပ္ဍဲလိက်လလောၚ်တြးရ။
နူကဵုနိုဝမ်ပါ ၃ စိုပ် ၁၉ ပွိုၚ် ၂ သတ္တဟပြၚ်ဏံ ဒပ်ပၞာန်ဗမာကဵု အကြာဒပ်ပၠန်ဂတးတံ ပေါဲဗတိုက်ဒှ်လဝ် ၁၃ ဝါနွံမံၚ်ရောၚ် အတိုၚ်လိက်လလောၚ်တြး ဒပ်ပၞာန်ချူထမံက်လဝ်ဂှ် ဂွံတီရ။
နကဵုပရေၚ်ပၞာန် ဒးကလေၚ်ဆုတ်အာ ယာယဳနွံတုဲ ဗ္ဒိုပ်ဂဇအ်လဝ် ခိုၚ်ၚ်ကၠိုက်က်ဟွံသေၚ်၊ ဒှ်မံၚ်ဗီုပြၚ် ဗဒိုပ်ယာယဳဍောတ်တ်တံ ဂၠိုၚ်မံၚ်ရဂှ် ရိုဟ်ကၞက်ပရိုၚ်ပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဇြဟတ်သၞတံဂၠိုၚ်တုဲ ဒးဆုတ်တိတ်အာလဝ်နွံကီုလေဝ် ညံၚ်မၞိဟ်ဇကုဟွံဂွံဂိဂှ် နကဵုကမၠောန်ပၞာန် ဒးကၠောန်အာတုဲ အပ္ဍဲဗလးတိ ညးလဵုဒးလဝ်ဂိဂှ် စိုပ်အခိၚ်တှ်ေ ဂွံတီအာရောၚ် ရိုဟ်ကၞက်ပရိုၚ်ပၞာန်တံ ဟီုရ။
အကြာပေါဲဗတိုက် ဒေသဗဂေါကဵုမန် ဒှ်လဝ်အပ္ဍဲဂိတုနိုဝမ်ပါဂှ် က္ဍိုပ်သ္ကိုပ် နူလပါ်ရဲဂကောံပၠန်ဂတး ၂ တၠ မပါသီုရုပ်ဇွ ၇ တၠ ကေုာံ လွဟ် ၃၇ ဇကိုအ်သၟးဟွံက ကပေါတ်ပၞာန်ဆက်စပ်တံဂှ် သီဂွံလဝ်ရောၚ် ဒပ်ပၞာန်ဗမာ ပတိတ်လဝ်ပရိုၚ်ရ။
စပ်ကဵုအကာဲအရာ ကောန်ဒပ်ပၠန်ဂတးတံ ဒးပြဟ်လလုဲအာဂှ်တှ်ေ ချိုတ်အာပ္ဍဲကဵုပေါဲဗတိုက်ဂှ်တှ်ေ နွံဗွဲမအောန် ဟွံထေၚ်ခယျ ရပ်ဂွံလဝ်တုဲမှ ဂစိုတ်လဝ်ဂှ် ဂၠိုၚ်မံၚ်ရောၚ် ရိုဟ်ကၞက်ပရိုၚ်ဗလးတိတံ သ္ဂးရ။
စဵုကဵုနိုဝမ်ပါ ၂၀ ဂှ် ကရောၚ်ပၞာန်ဗမာဆက်နွံမံၚ် ပ္ဍဲကဵုမွဲဒမြိပ် ကွာန်နာတ်သေန်၊ ကျံက်ဖျာကဵု ခမံက်ခွေတုဲ ပ္ဍဲကဵုကွာန်ဇြဳပျံၚ် (၅) ဂှ် ညးအဆံၚ်သ္ကိုပ်ဗျူဟာတံ ဂဇအ်မံၚ်ရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media

