ဘာအၚ် နိုဝမ်ပါ ၂၁
အပ္ဍဲကဵုတိဍာ် DKBA ယဝ်ရ ညးကဵုပရိုၚ် သေန်တာကျာဖျ တိုက်ချာန် Tai Chang မာန်မ္ဂး ဖျေံကဵုလာဘ် သြန်ဒဝ်ဠာအမေရိကာန် ၁၀ ပြကောတိကိုတ်ရောၚ် အမေရိကာန်ထပ်လလောၚ်တြးတုဲ အကြာပွိုၚ်မွဲၜါတ္ၚဲပၠန်ဂှ် အမေရိကာန် ကၟာတ်ဆိုအ်ကေတ်ဏာ အရေဝ်ကဵု သ္ကိုပ်က္ဍိုက်ပ်ပၞာန် DKBA သ္ကိုပ်ပၞာန်ဇၞော် သဝ်ယှိုဲဝ ကေုာံ သ္ကိုပ်ပရေၚ်ကောပ်ကာ စၟတ်(၂) ဒုသ္ကိုပ်ပၞာန်သဝ်အေဝါန်တံရ။
စပ်ကဵုပရေၚ်ကဵုလဝ်ဇြဟတ် ပ္ဍဲကဵုကမၠောန်လီသြန်အန်လိုၚ်(ကျာဖျ) ကေုာံ ကူသာန်သွံရာန်မၞိဟ်တံဂးတုဲ နူကဵုဌာနပရေၚ်ဘဏ္ဍာ အမေရိကာန် ကေတ်အရေဝ်ကၟာတ်ဆိုအ်ထောံ သ္ကိုပ်ပၞာန်ဇၞော်သဝ်ယှိုဲဝ ကေုာံ ဒုသ္ကိုပ်ပၞာန်သဝ်အေဝါန်တံဂှ် ပတိတ်လိက်လလောၚ်တြးရ။
သ္ကိုပ်ပၞာန်ဇၞော်သဝ်ယှိုဲဝ သ္ကိုပ်သ္က ကောန်ဒပ် DKBA တံ ဟိုတ်နူကဵုမံၚ်ပရေၚ်ဂီုကၠီု ပ္ဍဲကဵုကမၠောန်လီသြန်အန်လိုၚ်(ကျာဖျ) တံတုဲ ပါလုပ်ဆက်စပ်မံၚ်ကဵု ပရေၚ်ကမၠောန်ပကီုပရာတ် မၞိဟ်ဒးကူသာန်သွံရာန် အာကၠုၚ်ဒိုဟ်ကၠက်မံၚ်တံဂှ် သ္ဂးရ။
ပ္ဍဲ ၂၀၂၅ သၞာံ ဂိတုဒဳဇြမ်ပါ ၂၆ ဂှ် သ္ကိုပ်က္ဍိုက်ပ်ပၞာန် DKBA သ္ကိုပ်ပၞာန်ဇၞော် သဝ်ယှိုဲဝ စကေတ်လဝ်တာလျိုၚ်တုဲ ဒုသ္ကိုပ်ပၞာန် သဝ်အေဝါန် စယိုက်ဂၠေၚ်တာလျိုၚ် သ္ကိုပ်ပရေၚ်ကောပ်ကာ စၟတ်(၂) ပ္ဍဲကဵု သၞာံအာတေံရ။
ဒၞာဲ ဒုသ္ကိုပ်ပၞာန်သဝ်အေဝါန် ထိၚ်ချုက်လဝ် ဍုၚ်ကျာ်ပိဂှ် သေန်တာ(ကျာဖျ) ကမၠောန်လီသြန် နွံမံၚ်ဗွဲမဂၠိုၚ်တုဲ ပ္ဍဲကဵုဌာန်ဂအုပ် DKBA ဇြုၚ်သဳမျာၚ် ကဵု ကျံက်ခက်တံဂှ် DKBA ကဵုလဝ်ပရေၚ်ဂီုကၠီု တုဲ ကမၠောန်ကျာဖျတံ ဆက်ဂေတ်ကၠောန်အာမံၚ်ရ။
အတိုၚ်ဌာနဝန်ဇၞော်ဍုၚ်သအာၚ် လလောၚ်တြးဂှ်တှ်ေ ဟိုတ်နူသေန်တာကျာဖျ ဒေသအဂၞဲဂှ်တုဲ ပ္ဍဲကဵုသၞာံ ၂၀၂၅ ဂှ် ကောန်ဍုၚ်အမေရိကာန်တံ ဆောံလေၚ်အာလဝ် သြန်ဒဝ်ဠာ ၁၈ ဒသမ ၂ ဗဳလဳယာန်နွံ တော်ဆလဝ်ရ။
ဥက္ကဌကမ္မတဳပရေၚ်ပိုန်ဒြပ်ဗဟဵု DKBA သ္ကိုပ်ပၞာန်သိုၚ်ကျဝ်လှ ထိၚ်ချုက်လဝ် ဒေသကျံက်ခက် စပ်ကဵုတၚ်နၚ်ပရိုၚ် သေန်တာကျာဖျတုဲ ကဵုနၚ်ပရိုၚ်မာန်မ္ဂး ဖျေံလာဘ် ဒဝ်ဠာအမေရိကာန် ၁၀ ပြကောတိကိုတ်ရောၚ် နူကဵုရုၚ်ကလုတ် အမေရိကာန် ထပ်လလောၚ်တြးလဝ်ရ။
အကြာဍုၚ်ဂၠးကဝ်ကဵု အမေရိကာန်တံ ကၠောန်လဝ် ပရေၚ်ကၟာတ်ဆိုအ်ဂှ်ရ ပ္ဍဲကဵုတိဍာ်ဒပ် DKBA ထိၚ်ချုက်လဝ်ဂှ်တှ်ေ သေန်တာကျာဖျ ဂၠိုၚ်တိုန်မံၚ်နူအခိၚ်ကၠာတေံတုဲ ကမၠောန်ကျာဖျတံလေဝ် အသိၚ်ဟွံလီု ဆက်ဂေတ်အာမံၚ်ဖိုအ် ရောၚ် ညးဒေသမွဲတၠ သ္ဂးရ။
ပရိုၚ်-သြၚ်လောန်တိုၚ်မ်
Photo – DKBA

