မတ်မလီု၊ နိုဝမ်ပါ ၂၁
ဍုၚ်ဗမာဝွံ ပ္ဍဲကဵုသၞာံ ၂၀၁၇ တေံ ဒပ်ပၞာန်ဗမာ ကၠောန်လဝ် ပရေၚ်လဝေၚ်ပၞာန် လ္တူဂကူရိုဟေၚ်ဂျာ နွံမံၚ်သၟဝ်ကျာ တွဵုရးရခေၚ် တံဂှ် ကလိလောန်လဝ် ပရေၚ်ဂစိုတ်ကဠက်ဂကူရောၚ် နူကဵုရုၚ်သၞောဝ်ဓဝ်ဂၠးကဝ် ICJ ဖျေံသ္ဂုတ်သွာတ်ဂှ်တှ်ေ ဒုၚ်တၠုၚ်ဏာရောၚ် နူကဵု ဒပ်ကရေၚ် KNU လလောၚ်တြးလဝ် ပ္ဍဲကဵုနိုဝမ်ပါ ၂၀ ရ။
ကမၠောန်ပရေၚ်ဂစိုတ်ကဠက်ဂကူ ဂွံဒှ်ကၠုၚ် ကေုာံ ရန်တၟံ သွက်ဂွံပလီုထောံ ရိုဟေၚ်ဂျာတံ မွဲသ္ကုတ်မွဲသ္ကူ ဟွံသေၚ်မ္ဂး သီုအလုံအိုဿီု နူကဵုရုၚ်သၞောဝ်ဓဝ် ဆဵုညာတ်အာလဝ် တၚ်ရန်တၟံ ဗွဲတၟေၚ်ဂှ်မ္ဂး KNU ထံက်ဂလာန်ရောၚ် သ္ဂးရ။
ရိုဟေၚ်ဂျာတံဏံဂှ် ညးဍုၚ်ကွာန် နွံမံၚ်အပ္ဍဲဍုၚ်ဗမာရောၚ် KNU သ္ပစၟတ်သမ္တီလဝ် သၞာံလောန်ကၠုၚ်လဝ်ကၠာကၠာတေံ မဒှ်တုဲ ညးတံရုန်ဂစာန်လဝ် သွက်ပရေၚ်ဓဝ်ဍာံကဵု အခေါၚ်အရာတုပ်သၟဟ် တံဂှ် ဒတူလိုၚ်ကၠုၚ်မွဲစွံရောၚ် ချူလဝ်ပ္ဍဲလိက်လလောၚ်တြးဂှ်ရ။
ကလေၚ်ဗှ်သၞာ သ္ပစၟတ်သမ္တီအာ ညးဒးဒုၚ်သ္ပဏာ ပရေၚ်ကာဂစိုတ် တံတုဲ ကြပ်ပေၚ်ဗွဝ်စှ်သၞာံမွဲ သွက်ပရေၚ်ဓဝ်ဍာံ သတ္တိပရေၚ်ဂိုတ်ဂစာန် ဂကူရိုဟေၚ်ဂျာသှ်ေဇးမံၚ်တံ ကၟိန်သ္ၚိဌာန်တံ ပွဳဗွိုၚ်ပရေၚ်မၞိဟ်ညးတံဂှ် သ္ပရှ်ေသှ်ေအဲပရဲတုဲ ဒဵုကဵုစဳရေၚ်အမှုဏံ ဍုၚ်ဂါန်ဗဳယာ ဂစာန်ကၠုၚ်လဝ်ဂှ် တၚ်ဂုဏ်ဗွဲမလောန် သ္ဂးလဝ်ရ။
နူကဵုရုၚ်သၞောဝ်ဓဝ် ICJ ဖျေံဏာအမှုဂှ် ညးတာလျိုၚ်ဆေၚ်စပ်တံ ကၠောန်ဒဂေတ်အာပေၚ်ၚ်ရောၚ် စှ်ေစိုတ်ကီု သွက်ပရေၚ်ဂစိုတ်ကဠက်ဂကူ နကဵုဍုၚ်ဗမာတာလျိုၚ်နွံ ပ္ဍဲတၚ်သ္ဂုတ်သ္ဂာတ်ဂှ် ပ္ဍဲသၞာံ ၂၀၁၇ တေံ လဝေၚ်ပၞာန်ဗမာတံ ဒှ်အဓိကတုဲ ပြဟ်ဟ်ဏံလေဝ် ဆက်နွံအာမံၚ် သၟဝ်တဲပရေၚ်အုပ်ဓုပ် ဒပ်ပၞာန်သီအဝဵုဖိုအ်ဏီဂှ် KNU ချူလဝ်ပ္ဍဲလိက်လလောၚ်တြးဂှ်ရ။
ဟိုတ်ဂှ်ရ စပ်ကဵုတၚ်နၚ် ပရေၚ်ဒးထမံက်အာရုပ်ရဴတံမ္ဂး ဒးမၚ်ရံၚ်စၟဳစၟတ်အာ ဗၠးဗၠးၜးၜးမာန်ဂှ် ကိစ္စဇၞော်တုဲ ဗွဲတၟေၚ် သွက်ဂွံထိၚ်ဒဝ်သက်သဳနာနာတံ၊ သွက်ဂွံကဵုအာပရေၚ်စဵုဒၞာ သွက်သက်သဳညးဆက်ဂျိုၚ်တဴမံၚ်တံ၊ ပရေၚ်စၟဳစၟတ်ဂလာန်ပတှ်ေနွံနွံ ညံၚ်ဂွံကၠောန်အာ၊ အတိုၚ်ပရေၚ်ဂၠိုက်ဂၠာဲဂွံလဝ်မ္ဂး သွက်ဂွံစောဲဂဗုတ် ခိုၚ်ကၠိုက်မံၚ်တှ်ေ ညံၚ်ဂွံစောဲအာအမှု သ္ဂးရ။
စပ်ကဵုပရေၚ် ဒးထမံက်ရုပ်ရဴတံမ္ဂး အခေါၚ်အရာဟောံဗြောံလဝ်တံဂှ် ညံၚ်ကလေၚ်ဂွံ၊ သွက်ညးဒုၚ်ဂိတံ ညံၚ်ဂွံဂွံၚုဟ်လေဲကေုာံ ပရေၚ်ဗီုတံဏံ ဗွဲကြဴညံၚ်ဟွံဂွံဒှ် တၚ်ဒုၚ်လျိုၚ်တံဒးပါလုပ်တုဲ ရိုဟေၚ်ဂျာ စိုပ်မံၚ်အပ္ဍဲဍုၚ်မ္ၚးဍုၚ်တံ နကဵုအလဵုစိုတ်ဆန္ဒညးတံ ဂုဏ်သိက္ခာနွံနွံ ဂီုဂီုကၠီုကၠီု ဒးကလေၚ်စဴ ဌာန်ဒေသဇကုတံမာန်တုဲ အခေါၚ်သွက်ဂွံဆဵုညာတ် ကၟိန်အိန်ထံၚ်ညးတံရောၚ် KNU ဟီုရ။
သွက်ဂွံထမံက်ရုပ်ရဴ တၚ်စဳရေၚ်အမှုဏံဂှ် နူကဵုအာသဳယာန် ကုလသမဂ္ဂကဵု ဍုၚ်ဂၠးကဝ်တံ ကဵုအရီုဗၚ်ထံက်ပၚ်အာတုဲ သွက်ဂွံစဵုဒၞာကောန်ဍုၚ်ကွာန်တံကီု သွက်ဂွံဂွံ ပရေၚ်ဗစာရဏာမၞိဟ် သွက်ဂွံကလေၚ်ဝဳဝတ်အာ ညးလမျီုသှ်ေဇးမံၚ် ရဲပွဳဗွိုၚ်ရိုဟေၚ်ဂျာကီု ညးတာလျိုၚ်အလဵုအသဳ ဂကောံရခေၚ် ULA ကေုာံ ဒပ်ပၞာန်အာရက္ခ AA တံ ချိက်ဆက်ရေၚ်တၠုၚ်အာညိဂှ် KNU အာတ်မိက်လဝ်ရ။
ပ္ဍဲပရေၚ်ကမၠောန်တံဏံ သွက်ရိုဟေၚ်ဂျာကီု အခေါၚ်အရာ ကောန်ဂကူ နွံမံၚ်အလုံဍုၚ်ဗမာသီုဖအိုတ်ကီု ဒုၚ်သ္ဇိုၚ်ကဵုအခေါၚ်အရာ ပရေၚ်တုပ်သၟဟ်၊ ပရေၚ်ဂီုကၠီု ဒုၚ်လျိုၚ်ကဵု အပြံၚ်လှာဲ ဍုၚ်ဖိတ်ဒရေဝ်ဒဳမဝ်ကရေသဳတံဂှ် ပတဝ်လဝ်က္ဍိုပ် ပေၚ်ၚ်ရောၚ် KNU သ္ဂးလဝ်ရ။
လ္တူဂကူရိုဟေၚ်ဂျာတံ ဒပ်ပၞာန်ဗမာ ကၠောန်လဝ် ပရေၚ်ဂစိုတ်ကဠက်ဂကူတံ လ္တူညးဍုၚ်ကွာန် အလုံဍုၚ်မွဲ ကၠောန်မံၚ်ဓဇန်ဓဇန်ကြာန်န်တံဂှ် ဆက်ဒှ်အာမံၚ်တုဲ သွက်ကောန်ဍုၚ်ဗမာ ဂွံဂွံပရေၚ်ဓဝ်ဍာံဂှ် ဆက်တဲဒးကၠောန်အာ ပၠန်ရောၚ် KNU ပတိတ်လိက်လလောၚ်တြး မဒှ်ရ။
ပရိုၚ်-သြၚ်လောန်တိုၚ်မ်
Photo – KNU

