သွက်ဂွံဖန်ဗဒှ် သၞောတ်ဗွဝ်ဖျာဗဟဵုထိၚ်ဒက် အလုံံသွာၚ်ပရေၚ်ပိုန်ဒြပ်မွဲဂှ် ကံၚ်ဇြဳပၞာန် ဂ္စါန်ပ္တဝ်ကၠုၚ်က္ဍိုပ်

လ္ဂုၚ်၊ နဝ်ဝေမ်ဗာ (၁၁)

ကံၚ်ဇြဳပၞာန်သီအဝဵု စကာနဲကဲနာနာသာ်တုဲ ကၠောန်သ္ပဗၞတ်ဗ္ၜတ် ထိၚ်ဒက်ကၠုၚ် သြန်သၠုဲ ပ္ဍဲကဏ္ဍပရေၚ်ပိုန်ဒြပ်ဂှ်ဝွံ ပ္တဝ်ဒၟံၚ်က္ဍိုပ် သွက်ဂွံဖန်ဗဒှ် သၞောတ်ဗဟဵုထိၚ်ဒက်ရောၚ်ဂှ် တၠပညာပရေၚ်ပိုန်ဒြပ် ကေုာံ သုတေသဳတံ ပါ်ပါဲလဝ်ရ။

ကံၚ်ဇြဳပၞာန်သီအဝဵုဝွံ သွက်ဂွံဖန်ဗဒှ် သၞောတ်ဗဟဵုထိၚ်ဒက် အလုံကဏ္ဍပရေၚ်ပိုန်ဒြပ်မွဲဂှ် စကာနဲကဲနာနာသာ်တုဲ ဂ္စါန်ဒၟံၚ်ရ။

ပၞောဝ်ကဵုဂှ် ပ္ဍဲကဵုဒၞါဲပၠောပ် ကပေါတ်ဗၞိက်ပၠောပ် အပ္ဍဲကဏ္ဍပရေၚ်ကူသာန်သွံရာန် ပယျဵုဒၞက်ဂှ် ထ္ၜးပျးသြန်လုပ် မကလိဂွံ နူကဵုဗၞိက်ပလံၚ်ပ္တိုန် ဍုၚ်မွဲလ္ပာ်တေံမာန်မှ ဂွံအခေါၚ်ပၠောပ်ပ္တိုန် မွဲဝါပၠန်ရောၚ် ဌာနက္ဍိုက်ပ် ပရေၚ်ကူသာန်သွံရာန် သၟဝ်တဲကံၚ်ဇြဳပၞာန်တံ စၞောန်ပ္ညုၚ်လဝ် ပ္ဍဲဂိတုအံက်တဝ်ဗာ (၃၁) တုဲကၠုၚ်တေံရ။

သ္အာၚ်နူဂှ်ပၠန် နကဵုညးမပၠောပ်နၚ် ကပေါတ်ဗၞိက်ပၠောပ်တံ သုၚ်စောဲသြန်မကလိဂွံလဝ်ဂှ်တုဲ ပ္ဍဲကဵုဒၞါဲပၠောပ်ပ္တိုန် ဗၞိက်ပၠောပ်တံဂှ် ဒးကဵုအာသၠုဲ သွက်ဗၞိက်ပၠောပ်တံ နူကဵုတိုက်သြန် မဆေၚ်စပ်တံ မွဲကဆံၚ်တုဲ ယဝ်ရစရၚ်သြန်သှ်ေသၟေဟ် ပ္ဍဲကဵုတိုက်သြန်တံ ပဵုအာမ္ဂး ကဵုအာအခေါၚ် လာၚ်ဇြေန်ဗၞိက်ပၠောပ်တံ ဟွံသေၚ်ပုဟ်ဂှ် ဗၞတ်ဗ္ၜတ်လဝ်ရ။

မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ပတေၚ်ဂြတ်စၟဳစၟတ်ကၠုၚ် သၞောတ်ပ္တိုန်စရၚ် အဳလာတ်ထရဝ်နေတ်ကမ္ပဏဳ (MyCo) တံတုဲ ထိၚ်ဒက်ကၠုၚ်ဒၟံၚ် သြန်သၠုဲဂေတ်ဂြိပ် ပ္ဍဲကမ္ပဏဳတံရ။

ဌာနက္ဍိုက်ပ် စၞောန်ပ္ညုၚ်ကမ္ပဏဳဂမၠိုၚ် သၟဝ်တဲကံၚ်ဇြဳပၞာန် (DICA) ဂှ် နကဵုကမ္ပဏဳတံ သွက်ဂွံပ္တိုန်ထ္ၜးလိက်ဒုၚ်စဳရေၚ် လၟေၚ်သၞာံဂှ် တာလျိုၚ်လီုအာလဝ်ဂှ်တုဲ ကမ္ပဏဳ မဒးဒုၚ်ကေတ်အရေဝ်တံ ဂၠိုၚ်ကၠုၚ်ရဂှ် တုဲကၠုၚ်ဂိတုနဝ်ဝေမ်ဗာ (၄) တေံ လလောၚ်ပ္တိတ်လဝ်ရ။

ဟိုတ်ဂှ်ရ နကဵုတၠကမၠောန်တံ သွက်ဂွံကၠိုဟ်ကေတ် သၞောတ်ကမ္ပဏဳကၟိန်ဍုၚ်ဗၟာဂှ် သၠုၚ်ပ္တိုန်စဳစောတ်အာတုဲ ကမ္ပဏဳ ဟွံဒ္ဂေတ်ဗက်စေဝ်ပၞောန်တံဂှ် ရေၚ်တၠုၚ်ကေတ်အာအရေဝ်ရောၚ် DICA ကဵုလဝ်သမ္တီရ။

သုတေသဳ ပရေၚ်ပိုန်ဒြပ်မွဲတၠဂှ် နကဵုကံၚ်ဇြဳပၞာန် ညံၚ်သၞောတ်ပရေၚ်အုပ်ဓုပ် ဇြဟတ်ဂွံခိုဟ်ကၠုၚ်ဂှ် ပ္တဝ်ကၠုၚ်က္ဍိုပ် သွက်ဂွံဖန်ဗဒှ် သၞောတ်ဗဟဵုထိၚ်ဒက် ပရေၚ်ပိုန်ဒြပ်တံရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ညအ်ဂှ် အာဒၟံၚ် ဗွဝ်ဖျာဗဟဵုထိၚ်ဒက် (Capital Market) ဏောၚ်၊ ဍုၚ်ပိုယ် ဒှ်ကၠုၚ်မွဲမွဲမ္ဂး အာဒၟံၚ်အတိုၚ်ဏံတွဵုရ၊ ဒှ်သၞောတ်မကၠောန် ညံၚ်အဝဵုအာဏာစက် အလဵုအသဳတံ ဂွံတန်တဴအာ၊ ညံၚ်တၠကမၠောန်တံ ဂွံသ္ပပဓာန်ကဵု အလဵုအသဳဂၠိုၚ်ရ၊ ကၠာတေံဂှ် ဂွံအခေါၚ်ကၠောန် ဗၠးဗၠးၜးၜးကီုလေဝ် အခိၚ်လၟုဟ် အလဵုအသဳလၟုဟ်ကဵု သၟိၚ်တၠအဝဵုလၟုဟ်တံ ပံၚ်ကောံထောံ ပရေၚ်သၠာဲဂတးဗၞိက်ကဵု အကံက်အခေါန်တံတုဲမှ ဒှ်ဒၟံၚ်အကာဲအရာ ဒးကၠောန်ဒၟံၚ်ရ၊ သာတုဲ ဒှ်အာဗျူရိုဝ်ကရက်ရ၊ ကၠောန်ညံၚ်သၞောတ်အုပ်ဓုပ် ဇြဟတ်ဂွံခိုဟ်ဏောၚ်” ဂှ် ညးသ္ဂးရ။

ပ္ဍဲကဏ္ဍသြန်ဍုၚ်သ္အာၚ်တံဂှ် ဥက္ကဌတိုက်သြန်ဗဟဵု ကဵုဒၟံၚ်ဇြဟတ်ဂရိုဟ် ကုညးမရေၚ်တၠုၚ်ဒၟံၚ် ကမၠောန်လှဲပြံၚ်သြန်ဍုၚ်သ္အာၚ်ဟောန်ဒဳ လာၚ်ဇြေန်ဟွံမွဲတံ ညံၚ်ဂွံကေတ်လာၚ်ဇြေန်တုဲ သွက်ဂွံရေၚ်တၠုၚ်ကမၠောန်အိုတ်တံ မဒှ်ရ။

မွဲလ္ပာ်ပၠန်ဂှ် သြန်ကောန်ဍုၚ်ဗၟာ စိုပ်ဍုၚ်သ္အာၚ်တံ မပြၚ်နၚ် အပ္ဍဲဍုၚ်တံဂှ် သွက်ဂွံပြၚ်ကဵု နူကဵုတိုက်သြန်မၞုံကဵုလာၚ်ဇြေန် သွံရာန်သြန်ဍုၚ်သ္အာၚ်ဂှ်လေဝ် လလောၚ်ပ္တိတ်လဝ်ရ။

တၠပညာပရေၚ်ပိုန်ဒြပ်မွဲတၠဂှ်လေဝ် ကၠောန်သ္ပရေၚ်တၠုၚ်ဒၟံၚ်သာ်ဏံဂှ်ဝွံ ဟိုတ်နူဒးဒုၚ်ပၠောပ်လဝ်စရၚ်ယၟုလီု စပ်ကဵုပရေၚ်ဗ္တိုက်ပလီု ထံက်ပၚ်သြန် ပကီုပရာပ်တံကဵု ပွမကၠောန်သ္ပစၠောံသြန် ဟွံလုပ်သၞောဝ်တံဂှ်တုဲ သွက်ဂွံကလေၚ်ပလီုကၠေံဂှ်ကီု၊ ညံၚ်သြန်ဍုၚ်သ္အာၚ်ဂွံလုပ် နူကဵုဂၠံၚ်လုပ်သၞောဝ်တံကီုဂှ် ပ္တိတ်ဇြဟတ်ဂ္စါန်ဒၟံၚ်ရောၚ် သ္ၚဳဂၠိပ်လဝ်ရ။

“ဗွဲမဂၠိုၚ်ဂှ်တှ်ေ အာဒၟံၚ် ကဵုဟောန်ဒဳဖအိုတ်ရ၊ သြန်ဇွောဝ် ဟွံလုပ်သၞောဝ်ဗီုဏံတံဂှ် FATF ဟွံဒုၚ်တဲပုဟ်၊ မိက်ဂွံဗ္တိုက်ပလီု အရာဏံလေဝ် ပါ၊ မိက်ဂွံထ္ၜးရုပ်ရဴလေဝ် ပါ၊ တုဲတှ်ေ ဒဝ်ဠာတံ လုပ်ကၠုၚ် နူကဵုဂၠံၚ်လုပ်သၞောဝ်ဂှ်မှ အလဵုအသဳတံ ထိၚ်ဒက်ဂွံဏောၚ်၊ ကၠောန်ဒၟံၚ်နကဵုတၚ်ရန်တၟံ ၜါတၚ်ဏံရောၚ်ဂှ် ထေၚ်ကေတ်ရ” သာ်ဝွံ ညးသ္ဂးရ။

ကၟိန်ဍုၚ်ဗၟာဝွံ သွက်ဂွံရပ်စပ်သောၚ်ကလး ကုလၟေၚ်ကမၠောန် ဗ္တိုက်ပလီု ပွမထံက်ပၚ်သြန် ပကီုပရာပ်တံကဵု ပွမကၠောန်သ္ပစၠောံသြန် ဟွံလုပ်သၞောဝ်တံဂှ် တာလျိုၚ်လီုလဝ်ဂှ်ရ ဒးပၠောပ်လဝ် ပ္ဍဲစရၚ်ယၟုလီုရောၚ် ဂကောံမၚ်ရံၚ်သြန် ဟွံလုပ်သၞောဝ်တံ (FATF) လလောၚ်တြးလဝ် ပ္ဍဲဂိတုအံက်တဝ်ဗာ (၂၁) တေံရ။

ကံၚ်ဇြဳပၞာန်ဝွံ သီအဝဵုတုဲ အပ္ဍဲပွိုၚ် (၂၁) ဂိတုဂှ် ကၠောန်သ္ပပြံၚ်သၠာဲကၠုၚ်ဒၟံၚ် ပွမဒ္ဂေတ်ဗက်မူဝါဒ ပ္ဍဲကဏ္ဍကူသာန်သွံရာန် ပယျဵုတံ တီတီဒှ်ဒှ်တုဲ ပ္ဍဲကဵုသြန်ဍုၚ်သ္အာၚ် မဂေတ်ဂြိပ်တံဂှ်လေဝ် လလောၚ်ပ္တိတ်ဒၟံၚ် တၚ်ဗၞတ်ဗ္ၜတ် နာနာသာ်ရ။

ပရိုၚ်−သြၚ်လောန်တိုၚ်(မ်)