ပဝ်အူပရေသ်၊ နဝ်ဝေမ်ဗာ (၁၁)
ပ္ဍဲဍုၚ်ဟေတဳဂှ် ဒၟါနူယဲဂၞဴ ကလေၚ်ဒှ်ပၠန်ဂှ်ရ အပံၚ်မၞိဟ် (၁၃၆) တၠ ဒးချိုတ်အာလဝ်ဂှ် ဌာနဝန်ဇၞော်ပရေၚ်ထတ်ယုက်ကရေဗဳယာန် လလောၚ်ပ္တိတ်လဝ်ရ။
ပ္ဍဲကဵုညးမဒးကၠောံထၞာန် (၈၉) တၠဂှ် လ္ၚဵုတံဂှ် ဒးချိုတ်အာလဝ် ပ္ဍဲရုၚ်ဂဥုဲတံကဵု ဌာန်ပရေၚ်ဝဳဝတ် ယဲဂၞဴတံဂှ်တုဲ ပ္ဍဲကဵုညးတံ (၄၇) တၠဂှ်ဝွံ ဒးချိုတ်အာလဝ် ပ္ဍဲသ္ၚိဒၟံၚ်ညးတံဂှ် ထ္မံက်ထ္ၜးလဝ် ပ္ဍဲကဵုတၚ်လလောၚ်တြး ဌာနဝန်ဇၞော်ပရေၚ်ထတ်ယုက်ဟေတဳရ။
အလဵုအသဳဟေတဳဂှ် သွက်ဂွံခၠေဝ်ပၠန် ကုအကြေပ်အဂြတ် မဒးဂဗဒၟံၚ်လၟုဟ်တံဂှ် ပံၚ်တောဲရေၚ်တၠုၚ်ဒၟံၚ်ကဵု ဂကောံပရေၚ်ထတ်ယုက် ဍုၚ်သ္အာၚ်တံ နွံဂှ် သ္ဂးလဝ်ရ။
“ပိုယ်တံဂှ် ဒုၚ်ကၠုၚ်တဲ မွဲတ္ၚဲမ္ဂး မၞိဟ် (၂၅၀) ဂှ် ဟွံလအ်ဏီပုဟ်၊ ပ္ဍဲကဵုဒေသလ္တူဍုၚ် ဗွဲမဂၠိုၚ်ဂှ် အသိၚ်က္တဵုဒှ် သၠုၚ်တိုန်ကၠုၚ်ရ၊ ပ္ဍဲကဵုဌာနပရေၚ်ဝဳဝတ်ယဲဂၞဴ ပိုယ်တံဂှ် ဒၟါနူခါတ် နွံဒၟံၚ် (၃၅၀) မဓဝ်ဂှ်ရ ဣဏံဂှ် ဒးဂွိၚ်ဗွဲမလောန်ရ” သာ်ဝွံ သၞာဲဒဴပရေၚ်ဆက်စၠောံ ဂကောံ NGO ဆေၚ်စပ်ကဵုဂဥုဲ အလက်ဇြာန်ဒါ ဟီုထ္ၜးလဝ်ကဵု CNN ရ။
ရဲဒေသ မသ္ပဒတဴဒၟံၚ် ပ္ဍဲဌာန်ဒေသ ဍာ်သုၚ်ဍာ်လွပ် မဗၠးဘဲတံ ပိုတ်တံဂှ်ကဵု ဍာ်သွက်ပရေၚ်သ္အးဇ္ၚးတံ ဟွံရုမ်ဂပ်တံဂှ်ဝွံ ဒၟါနူသုၚ်စောဲရပ်စပ်ဒးအာ စၞစ ဟွံသေၚ်မ္ဂး ဍာ်သုၚ် ဟွံသ္အးဇ္ၚး စၟဗာတ်တဳရဳယျာတံ မပါဗက်ဂှ်တုဲ ဒှ်ဒၟံၚ်ယဲဂၞဴဂှ်လေဝ် ဟီုရ။
ဂဥုဲစဵုဒၞါတံ နွံတုဲ လက်သန်ယဲတံဂှ် လွဳလွတ်ဗွဲမလောဲသွာမာန်ကီုလေဝ် အတိုၚ်ဂလာန် ဂကောံပရေၚ်ထတ်ယုက်ဂၠးကဝ်ဂှ်မ္ဂး ယဲဂၞဴဂှ်ဝွံ ပ္ဍဲကဵုဂၠးတိ မဖောအ်ဗြေဝ်ဒၟံၚ်ဖိုဟ်တံဂှ် ဒၟါနူဇြဟတ်ဓာတ်ဍာ် ဇတ်အာဂှ်ရ ဆက်တန်တဴအာ နဒဒှ်သၟာဂစိုတ်မၞိဟ် ပရေံပရေံတံရောၚ်ဂှ် သ္ဂးရ။
အတိုၚ်ဂလာန် အလက်ဇြာန်ဒါဂှ်မ္ဂး စၟဗိုၚ်ရာသ်ဂှ်ဝွံ ပြးထၞာန်ဒၟံၚ် ပ္ဍဲဒေသ တၞုၚ်တၞးကၟိန်ဍုၚ်တံဂှ်တုဲ သွက်ဂွံက္ဍစိုပ် ရေၚ်တၠုၚ်ဒတုဲဖဵု ပရေၚ်ထတ်ယုက်တံ ကေုာံ သွက်ဂွံမၚ်ရံၚ်စံၚ်ကဵုမာန်ဂှ် ဒးရုန်ဂ္စါန်ဒၟံၚ်ဖိုဟ်ရောၚ် သ္ဂးရ။
“ဒၟါနူအကြေပ်ဂြတ်လၟုဟ်တုဲ ဒေသတံဏံဝွံ သွက်ဂွံတီကေတ် ပရိုၚ်တၚ်နၚ် ဗွဲမဂတာပ်အခိၚ်ဂှ် သာဝါတ်ရ၊ အကာဲအရာဂှ် မွဲတ္ၚဲတုဲမွဲတ္ၚဲ သာပရေံကၠုၚ်ဟီုဂှ် တီကၠးဒၟံၚ်ရ” သာ်ဝွံ ညးဟီုဂးလဝ်ဏီရ။
ပွမက္တဵုဒှ်ယဲဂၞဴ နူကဵုသၞာံတုဲတုဲကၠုၚ်တေံဂှ်ဝွံ ဆက်နွံဒၟံၚ် စဵုကဵုသၞာံဏံတုဲ ယဲဂၞဴဏံ ကၠောံထၞာန်ပြးဇးအာ စဵုကဵုမၞိဟ်မၞုံဒၟံၚ် နူဗ္ဒိုပ်မၚ်မွဲထိၚ်ဒဝ် ပရေၚ်ဂီုကၠီု ကုလသမဂ္ဂမွဲဂှ်ရ။
ပ္ဍဲဍုၚ်ဟေတဳဂှ် ပ္ဍဲသၞာံ ၂၀၁၀ ဂှ် ယဲဂၞဴ ပြးထၞာန်လဝ် မွဲဝါတုဲ အကာဲအရာ မက္တဵုဒှ်ယဲအခိၚ်တေံဂှ် ကၠောံထၞာန်အာလဝ် မၞိဟ် (၈) ကိုဋ်ရ၊ အောန်အိုတ် အပံၚ်မၞိဟ် (၁၀,၀၀၀) ပြၚ် ချိုတ်အာလဝ်ရ။
ဂကောံအခေါၚ်အရာမၞိဟ်တံဂှ် ဆက်ကၠောန်သ္ပအာတ်မိက်လဝ် သြန်လေဲ သွက်ဂွံကဵုညးဒဒိုက်တံရ။
Ref: CNN