ဝါယှေန်တန်၊ ဂျာန်နဝါရဳ ၁၄
ဟိုတ်နူ ဍိုက်ကဵုဇြဟတ်တုဲ သ္အးဗတိုက်မံၚ် ညးထ္ၜးဆန္ဒတံဂှ် သွက်ဂွံကေတ်အရေဝ်ဂးတုဲ ဍုၚ်ကၠောန်မံၚ်ပရေၚ်ပိုန်ဒြပ်ကဵု အဳရာန်တံ ယဝ်ရကူသာန်သွံရာန်ကဵု အမေရိကာန်မ္ဂး ဒးကဵုအကံက် ၂၅% ရောၚ် သမ္မတဒဝ်နေဝ်ထရ လလောၚ်တြးလဝ်ရ။
သွက်ဂွံကေတ်အာအရေဝ်ကဵုအဳရာန်ဂှ် နဲကဲပရေၚ်ပၞာန်ကေုာံ စပ်ကဵုနဲကဲတၞဟ်ဟ်တံတုဲ ညးတာလျိုၚ်တံ သောၚ်ကလးလဝ်ကဵု ထရ ဂွံတီရ။
အပ္ဍဲကဵုနဲကဲဂၠံၚ်ဍာန် သွက်ဂွံကေတ်အာအရေဝ်အဳရာန်မ္ဂး ပန်ဗတိုက်ကမ်သၠောဝ် နူကဵုသ္ၚောဲသ္ၚောဲ၊ ဗတိုက်ကဵုနဲကဲသိုက်ဖာသၟးဟွံက နဲကဲလဝေၚ်စိုတ်ဓါတ်တံ ပါလုပ်မံၚ် ဂွံတီရ။
ယဝ်ရဂစိုတ်ညးထ္ၜးဆန္ဒတံမ္ဂး နကဵုပရေၚ်ပၞာန် အမေရိကာန် ပါလုပ်မာန်ရောၚ် ထရ ဟီုကဵုလဝ်သတိ ပ္ဍဲအကြာတ္ၚဲတံဏံကီုရ။
စပ်ကဵုပရေၚ်ကိစ္စဏံတုဲ သွက်ဂွံကၠောန်အာ ကောံဓရီုကဵုကသပ်ပရေၚ်ဂီုကၠီုကောန်ဂကူဂှ် ထရ စဳဇန်လဝ်ရ။
သွက်ဂွံသဳကၠဳအာကဵု အမေရိကာန်ဂှ် ပံက်လဝ်ပါၚ်တြၚ်ကီုလေဝ် သွက်ဂွံပြေၚ်ပၞာန်ဂှ် မံၚ်လဝ်ဂွန်ကီု ဝန်ဇၞော်ဍုၚ်သ္အာၚ်အဳရာန် ဟီုရ။
ဒပ်ဂီုကၠီုအဳရာန်တံ ဟိုတ်နူဍိုက်ကဵုဇြဟတ် သောၚ်သ္အးလဝ်ပေါဲထ္ၜးဆန္ဒအလုံဍုၚ်မွဲဂှ် ချိုတ်လဝ် ၆၄၈ တၠနွံမံၚ် ဂကောံအခေါၚ်အရာမၞိဟ်တံ ဟီုလဝ်တုဲ ကွေံကွေံဂှ် ချိုတ်ဂၠိုၚ်မၚ်နူဏံဏီရောၚ် ဟီုလဝ်ရ။
ဌာန်ပရိုၚ်ဂၠးကဝ်တံ ကေတ်ပရိုၚ်အဳရာန် ဒှ်မံၚ်တၚ်ဝါတ်တုဲ ဟိုတ်နူကၟာတ်လဝ် လိုၚ်အေန်တာနိတ်ဂှ် သွက်ဂွံသ္ပဒတန် အခက်အခုဲနွံမံၚ် ပရိုၚ်ဗဳဗဳသဳချူလဝ်ရ။
ပ္ဍဲဍုၚ်အဳရာန် ပရေၚ်သြန်ဖောဝ်ကေုာံ အခက်အခုဲပရေၚ်ပိုန်ဒြပ်ဂှ် ပေါဲထ္ၜးဆန္ဒက္တဵုဒှ်တုဲ နကဵုဗီုပြၚ်ပေါဲထ္ၜးဆန္ဒဒစဵုဒစးအလဵုအသဳ ပြၚ်သၠာဲပြးဇးပေၚ်အာအလုံဍုၚ်မွဲ မဒှ်ရ။
က္ဍိုပ်သ္ကိုပ်အဳရာန် အယာတိုလာ ခါမေနဳ ကဵုချိုတ်ညိ ရဲထ္ၜးဆန္ဒတံက္ညာင်ကရေဲမံၚ်အိုတ်တုဲ သွက်အလဵုအသဳဂွံပြၚ်သၠာဲအာ အာတ်မိက်မံၚ်အိုတ်ရ။
စိုတ်ထရ ညံၚ်ဂွံမိပ် ရဲပလီုပလာ်တံ ဂစာန်ကၠောန်မံၚ် ပေါဲထ္ၜးဆန္ဒရောၚ် ခါမေနဳ ဟီုရ။
တၚ်လလောၚ်တြးကံက်အကံက်ထရ မံက်တိတ်ကၠုၚ်တုဲ သွက်အခေါၚ်အရာဗဗွဲသၞောဝ် ကေုာံ ဂွံစဵုဒၞာအာဂုဏ်ဖဵုပရေၚ်ပိုန်ဒြပ်မာန် ဖျေံအာအစဳဇန်ပရေၚ်စဵုဒၞာရောၚ် ကြုက်ဟီုလဝ်ရ။
Ref:BBC