မေန်တာတ် – နဝ်ဝေမ်ဗာ(၁၀)
တွဵုးရးဍုၚ်ချေၚ် ပ္ဍဲဍုၚ်မေန်တာတ် ကွာန်ပလုံတွဳ ဂွံဆဵုကေတ်လဝ် ဇွကံၚ်ဇြဳပၞာန် စံၚ်ဂစိုတ်လဝ်ဂမၠိုၚ် ရောၚ်ဂှ် Chin Defence Force (Mindat) လလောၚ်တြးလဝ်ပရိုၚ်ရ။
ဂိတုနဝ်ဝေမ်ဗာ စၟတ်တ္ၚဲ(၁၀) တုဲကၠုၚ်တေံဂှ် အခိၚ်ဂကောံဒပ်ကံၚ်ဇြဳပၞာန်တံ စ္ဍးတိတ်အာနူကဵု ကွာန်ပလုံတွဳဂှ် ဃော CDF-Mindat တံ
ကၠောန်သ္ပ ပရေၚ်ပသောၚ်တိဍာ်ဂှ် ဂွံဆဵုကေတ် ဇွမဒးဒုၚ်စံၚ်လဝ်တအ်ဂှ်ရ။
ဇုတ်ဇွမဒးဒုၚ်စံၚ် သှ်ေဒၟံၚ်တံဂှ်လေဝ် ကံၚ်ဇြဳပၞာန်ထၞက်သၠေက်ပလီုလဝ်ဂှ်ရ သွက်ဂွံကၠောန်သ္ပအာ ကမ္မဌာန်ဂှ် အခက်ခုဲနွံဒၟံၚ်ရောၚ် ဂွံတီကေတ်ရ။
ပ္ဍဲကဵု ညးမဒးဒုၚ်စံၚ်ဂစိုတ်လဝ်ကဵု ကံၚ်ဇြဳပၞာန်တအ် ကောန်ကွာန်ပလုံတွဳ (၇) တၠဂှ် (၆)တၠ ဒှ်မာန်ဒၟံၚ်တုဲ ပရေၚ်ဆက်စၠောံ ပိုတ်သ္ကုတ်ဒၟံၚ်ကဵုညးတံရောၚ် ဂွံတီကေတ်ရ။
ဂိတုနဝ်ဝေမ်ဗာစၟတ်တ္ၚဲ(၇)အခိၚ်ဂယး(၁၀)နာဍဳပြၚ်ဂှ် ညးဒေသကွာန်ပလုံတွဳတအ် ပါဲဓလေတ်ဘဲပၞာန် ပံၚ်ဖအိုတ် အကြာ(၄၀) တၠတအ်ဂှ် ဒပ်ကံၚ်ဇြဳပၞာန်တံရပ်ဏာ သွက်ဂွံဒုၚ်ဒၞာတုဲ လဒေါဝ်တ္ၚဲ(၁၂)နာဍဳကဝက်ဂှ် ပ္ဍဲကရောံပၞာန်ဂှ် CDF-Mindat တအ် ဗ္တိုက်လဝ်ရောၚ်ဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
ဟိုန်နူပေါဲဗ္တိုက်ဂှ် လ္ပာ်ကံၚ်ဇြဳပၞာန်တအ် မဒးပြဟ်လလုဲအာ(၂)တၠတုဲ မၞိဟ်ဍေံတအ်ရပ်လဝ်ဂှ် ကော်ပြံၚ်ဏာလဝ် ဒၞာဲတၞဟ်သ္အာၚ်ရောၚ် ဂွံတီကေတ်ရ။
ဂိတုနဝ်ဝေမ်ဗာစၟတ်တ္ၚဲ(၁၀)ဂှ် အခိၚ်ကာလကံၚ်ဇြဳပၞာန်တအ် ကလေၚ်စ္ဍးတိတ်အာ နူဍုၚ်ထဳလေန်ဂှ် ကော်ဏာလဝ် ညးမဒးဒုၚ်ရပ်လဝ် မၞိဟ်တြုံမွဲတၠဂှ်လေဝ် ဂွံတီကေတ်ရ။
အခိၚ်လၟုဟ်ဏံ ကောန်ဒပ်ကံၚ်ဇြဳပၞာန်တအ် ပ္ဍဲလ္တူဍုၚ်ထဳလေန်ဂှ် ဟိုတ်နူပဠေဝ်ပဠေတ်ဒၟံၚ် သွက်ဂွံဇက်ကရောၚ်ပၞာန်တုဲ အကြာကရပ်ဍုၚ်ထဳလေန် ကဵုဍုၚ်မေန်တာတ် ညးဒေသတံလ္ပတတ်ကၠောံအာကၠုၚ်ဂှ်လေဝ် ဂကောံပရေၚ်စဵုဒၞာညးဒေသတံ ကဵုကၠုၚ်လဝ်သတိနွံရ။
ပရိုၚ်- သြၚ်လောန်တိုၚ်(မ်)