မတ်မလီု၊ နဝ်ဝေမ်ဗာ (၁၇)
ပ္ဍဲအရာပ်ဇြေယျာသဳရိ၊ ဍုၚ်မတ်မလီု၊ တွဵုရးဍုၚ်မန်ဂှ် ကြဴနူက္တဵုဒှ်ပရေၚ်ပန်ပှော် မွဲလ္ပာ်ကုမွဲလ္ပာ်တုဲဂှ် ပ္ဍဲအရာပ်လ္တူဍုၚ် ဗွဲမဂၠိုၚ်တံဂှ် ကံၚ်ဇြဳပၞာန် သၠုၚ်ပ္တိုန်လဝ် ပရေၚ်ဂီုကၠီုတုဲ ပွမကၟာတ်ဆိုအ်ဂၠိုက်ဂၠါဲစၟဳစၟတ်တံဂှ်လေဝ် ကၠောန်ၜိုတ်ဒၟံၚ် အဆက်က်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုနဝ်ဝေမ်ဗာ (၁၄) တုဲကၠုၚ်တေံ ပ္ဍဲသ္ၚိမွဲမ မၞုံအရာပ်ဇြေယျာသဳရိဂှ် အကြာကောန်သ္ဂံၚ် PDF တံကဵု ဒပ်ကံၚ်ဇြဳပၞာန်တံ က္တဵုဒှ်လဝ် ပရေၚ်ပန်ပှော်ၜါလ္ပာ်တုဲ အပ္ဍဲပရေၚ်ပန်ပှော်ဏံဂှ် ကောန်ဒပ်ကံၚ်ဇြဳပၞာန် (၂) တၠ ကလိဂွံလဝ်ဝပ်တုဲ ကောန်ဗၠာဲသ္ကိုပ်အုပ်ဓုပ်အရာပ်မွဲတၠ ဒးချိုတ်အာလဝ်ရ။
အခိၚ်လၟုဟ်ဂှ် ကောန်ဒပ်ကံၚ်ဇြဳပၞာန် သၟဝ်တဲကံၚ်ဇြဳပၞာန်တံဝွံ စကာဇြဟတ်ဗွဲမဂၠိုၚ်ဂၠေၚ်တုဲ ကၠောန်သ္ပဂေတ်ဂေၚ်ဒၟံၚ် အပ္ဍဲဍုၚ်တံဂှ်တုဲ ပ္ဍဲကဵုဒၞါဲ ဒတန်ဗြိုဟ်အဓိကတံဂှ်လေဝ် မၚ်တောပ်ဗ္တိုက် မၚ်ကျောဝ်ဒၟံၚ်တံဂှ် ကၠောန်ၜိုတ်ဒၟံၚ်ရောၚ် ညးမစုက်လုက်ကဵု ကံၚ်ဇြဳပၞာန်တံ သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန်ဝွံ နူကဵု CCTV မစုတ်လဝ် အပ္ဍဲဍုၚ်တံဂှ်လေဝ် မၚ်ကျောဝ်ဒၟံၚ် ပရေၚ်ချဳဒရာၚ်အာကၠုၚ် ညးဍုၚ်ကွာန်တံ ဟွံပိုတ်သ္ကုတ်တုဲ ကုမၞိဟ်ဟွံသၚ်္ကာတံဂှ်လေဝ် ရပ်ဒက်စၟဳစၟတ်သၟာန်သၟုက်ဒၟံၚ်တံ နွံဂှ် ဂွံတီကေတ်ရ။
အပ္ဍဲအကြာအရာပ်တံဂှ်လေဝ် ကောန်ဒပ်သၟဝ်တဲကံၚ်ဇြဳပၞာန်တံဝွံ မ္ၚးနူကယျိုၚ်အရာပ်ဂှ် သီုကဵုစကာကၠုၚ် ကွဳစက်သ္ၚိတံ၊ ကွဳလိုန်ဓာတ်တံတုဲ ဂေတ်ဂေၚ်ဂၠိုက်ဂၠါဲမၚ်ကျောဝ်ဒၟံၚ်တံ ကၠောန်ၜိုတ်ဒၟံၚ်ရောၚ် ညးဒေသလ္တူဍုၚ်တံ ဟီုရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ပ္ဍဲကဵုသၞေဟ်ကၚ်လုပ်တိတ်ဍုၚ်တံဂှ်လေဝ် ဖျေံလဝ် ပရေၚ်ဂီုကၠီု ဗွဲမတေၚ်ဂြတ်တုဲ စၟဳစၟတ်ဂၠိုက်ဂၠါဲသၟာန်သၟုက်ဒၟံၚ် မၞိဟ်ဟွံသၚ်္ကာတံဂှ်တုဲ ပ္ဍဲကဵုဒၞါဲမဒှ်အဓိက အပ္ဍဲဍုၚ်တံဂှ်လေဝ် စၟဳစၟတ်ဒၟံၚ် ကွဳစက် ကေုာံ ကွဳလိုန်ဓာတ်တံ နွံဂှ် ဂွံတီကေတ်ရ။
အပ္ဍဲပရေၚ်ပန်ပှော် မက္တဵုဒှ်လဝ် လ္တူဍုၚ်မတ်မလီုတံဂှ် ကောန်သ္ဂံၚ် PDF (၅) တၠ ဒးဒုၚ်ရပ်ဒက်လဝ် သီုကဵုလွဟ်ဍောတ်တ်(၃) ဇကိုအ်ဂှ် ဂကောံဇြဟတ်ချဳဒရာၚ်သၟဝ်တိ လ္တူဍုၚ်မတ်မလီုတံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)