မတ်မလီု၊ နဝ်ဝေမ်ဗာ (၁၈)
ကြဴနူဒပ်ပၞာန်သီအဝဵုတုဲ ဒံက်တာဗညာအံၚ်မဵု ညးစၞးဗော်ညဳသၟဟ်မန် မရေၚ်တၠုၚ်ဒၟံၚ် နဒဒှ်ကောန်ဂကောံကံၚ်ဇြဳပၞာန်ဂှ် က္ဍိုပ်သ္ကိုပ်ပၞာန်သီအဝဵု ပအပ်ကဵုလဝ် တဆိပ်ကြာ (စည်သူ) ရောၚ် လလောၚ်ပ္တိတ်လဝ် ပ္ဍဲဂိတုနဝ်ဝေမ်ဗာ (၁၇) တေံရ။
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဝွံ နဒဒှ်ပ္တိုန်စရာဲ တ္ၚဲကောန်ဂကူ ပ္ဍဲဂိတုနဝ်ဝေမ်ဗာ (၁၇) ဂှ်တုဲ ပအပ်ကဵုလဝ် ကုပူဂဵုမယိုက်ဂၠေၚ်လဝ် တာလျိုၚ်ကၟိန်ဍုၚ် ဗွဲမသၟဟ်ရထ နကဵုတဆိပ်ကြာဂုဏ်တၟေၚ်တံရဂှ် သ္ဂးရ။
ပအပ်ကဵုလဝ် တဆိပ်ကြာ (စည်သူ) ကုဒံက်တာဗညာအံၚ်မဵုကီု သီုကဵုကောန်ဂကောံကံၚ်ဇြဳပၞာန်တံ၊ သၞာဲဒဴဒပ်ပၞာန် ဌာနဝန်ဇၞော်ကာစဵုဒၞါတံ ကေုာံ အ္စာကၞေဟ်၊ အ္စာလိက်ပရိုၚ် မစုတိအာတုဲတုဲတံလေဝ် ပါလုပ်ရ။
ပ္ဍဲကဵုဂှ် ပအပ်ကဵုလဝ် သီုကဵုဒုက္ဍိုပ်သ္ကိုပ်ပၞာန် ဒုသ္ကိုပ်ပၞာန်ဇၞော် သဵုဝေန်ဂှ်ကီုတုဲ ဝန်ဇၞော်ကၟိန်ဍုၚ် ဌာနမဆေၚ်စပ်တံကဵု ဝန်ဇၞော် နူဂကောံအလဵုအသဳတွဵုရး၊ ရးဒေသဇၞော်တံမပါလုပ် သီုကဵုက္ဍိုပ်သ္ကိုပ် နူကဵုဂကောံပရေၚ်ဘာသာတံဂှ်လေဝ် ပအပ်ကဵုလဝ် တဆိပ်ကြာ (သီရိပျံချီ)တံကီုရ။
ဒံက်တာဗညာအံၚ်မဵုဝွံ ဒှ်ကောန်ဗော်ညဳသၟဟ်မန်တုဲ ပ္ဍဲကဵုလုပ်စိုပ်ပြိုၚ်ပ္ကာန် ပ္ဍဲဒေသဆန္ဒမာဲ၊ ပွိုၚ်ဍုၚ်ရေဝ် ပ္ဍဲပေါဲရုဲမာဲ သၞာံ ၂၀၂၀ တေံဂှ် ဒှ်ညးမဂွံလဝ်ဇၞးမွဲတၠရ။
ဗော်ညဳသၟဟ်မန်ဝွံ ကြဴနူဒပ်ပၞာန်သီအဝဵုတုဲဂှ် အကြာညးဍုၚ်ကွာန်မန်လ္ၚဵုတံ မဒစဵုဒစးဒၟံၚ် လ္တူကံၚ်ဇြဳပၞာန် မကော်ဘိက်ကၠုၚ် သွက်ဂွံပါလုပ် နဒဒှ်ကောန်ဂကောံ ပ္ဍဲကံၚ်ဇြဳအုပ်ဓုပ်ကောပ်ကာဲကၟိန်ဍုၚ် (နစက) ဂှ် ဗလးဏာလဝ် ဒံက်တာဗညာအံၚ်မဵု နဒဒှ်ညးစၞးရ။
သ္အာၚ်နူဂှ်ပၠန် နာဲလျးတၟး မဒှ်ကောန်ဂကောံ ကေၚ်ကာဗဟဵု ဗော်ညးသၟဟ်မန်ဂှ်လေဝ် ယိုက်ဂၠေၚ်ဒၟံၚ်တာလျိုၚ် နဒဒှ်ကောန်ဂကောံ ကံၚ်ဇြဳပၞာန် တွဵုရးဍုၚ်မန်ကီုရ။
ပရိုၚ်−သြၚ်လောန်တိုၚ်(မ်)