လ္ဂုၚ်၊ နဝ်ဝေမ်ဗာ (၁၈)
ကံၚ်ဇြဳပၞာန်သီအဝဵု ပ္တိတ်စကာကၠုၚ် လွဟ်လက်နက်ၜိုတ်နွံတုဲ ဗ္တိုက်ဖလှေက်ကၠုၚ် ဂကောံဇြဟတ်ပၠန်ဂတး မၞုံဒေသ ပဋိပက္ခပရေၚ်ပၞာန် မသ္ကာတ်မြဟ်ဒၟံၚ်တံမာန်ဂှ် က္ဍိုပ်သ္ကိုပ်ကောန်ဍုၚ်အရၚ်တံကဵု ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်တံ ဟီုဂးလဝ်ရ။
အပ္ဍဲပွိုၚ် ကြပ် (၂၂) ဂိတု ဒပ်ပၞာန်သီလဝ်အဝဵုဂှ် ဒေသကောန်ဍုၚ်အရၚ်ဂမၠိုၚ် မပ္တံကဵု တွဵုရးကချေၚ်၊ တွဵုရးကရေၚ်၊ တွဵုရးကရေၚ်ဍာဲ ကေုာံ တွဵုရးရခေၚ်တံ မပါလုပ် သီုကဵုဒေသအညာ ရးမဂွဵု ကေုာံ ရးဒေသဇၞော် သက်ကိုၚ်တံဂှ် ရပ်စပ်စကာ ဗ္တိုက်ကၠုၚ်ဒၟံၚ် ယာဉ်ကျာတံဂၠိုၚ်ကၠုၚ်ရ။
မွဲလ္ပာ်ပၠန်ဂှ် ဂကောံဒပ်ကံၚ်ဇြဳပၞာန် မကျကၠုၚ်ဒၟံၚ်ပရေၚ်ပၞာန် နူကဵုဒပ်တိုက်တံဂှ်ဝွံ စကာကၠုၚ်ဒၟံၚ် လွဟ်ဇၞော်တံဂှ်ရ ကောန်အရာပ်ဟၟဲကဵုဒုဟ်တံကဵု စမြိုၚ်သ္ၚိဒၟံၚ်တံ ဇီုကပိုက်လီုလာ် ဒးချိုတ်အာတံလေဝ် နွံဒၟံၚ်ရ။
ပ္ဍဲဂိတုနဝ်ဝေမ်ဗာ (၁၆) တေံ ကံၚ်ဇြဳပၞာန် ဂြာတ်လဝ်မခတိုဟ် ပ္ဍဲကဵုဝၚ်ကမၠောန်ကတိုၚ်သတ္တု ပ္ဍဲတိဍာ် ဒပ်မဟာ (၆) KNU မၞုံဗ္ဒါဲဍုၚ်ကျာ်ပိ၊ တွဵုရးကရေၚ် နကဵုက္ၜၚ်ကျာဂှ်ရ ဇီုကပိုက်ဂွံဝပ်တံ နွံလဝ်ရ။
သ္အာၚ်နူဂှ်ပၠန် ပ္ဍဲဂိတုနဝ်ဝေမ်ဗာ (၁၇) ဂှ်လေဝ် ပ္ဍဲကွာန်ဂျုက်ချံၚ်၊ ပွိုၚ်ဍုၚ်မာၚ်တဝ်၊ တွဵုရးရခေၚ်ဂှ် လွဟ်ဇၞော် နူကဵုဒပ်ကံၚ်ဇြဳပၞာန်တံ မပန်ပှော်လဝ်တံ ဒတုံဗ္တိုဟ်ထ္ကးအာဂှ်ရ ကောန်အရာပ် (၁၀) တၠ ဟွံအောန် ဒးချိုတ်အာလဝ်တုဲ ညးမကလိဂွံလဝ်ဝပ်တံလေဝ် နွံလဝ် ဗွဲမဂၠိုၚ်ဂၠေၚ်ရ။
ညးလ္ၚတ်သ္ၚဳဂၠိပ် ပရေၚ်ဍုၚ်ကွာန် ဒံက်တာသာၚ်ကျဳဇြေန်သဵုဂှ် နကဵုကံၚ်ဇြဳပၞာန် ပွမပ္ဍဵုပ္ဍိုက်ဒၟံၚ် နူကဵုသၟဝ်က္ဍိုပ် ပရေၚ်ပ္ဍဵုပကောပ် ပကီုပရာပ်ဟီုဂှ် ကၠာတေံလေဝ် ကၠောန်ကၠုၚ်လဝ်တုဲ လက္ကရဴဏံလေဝ် ထပ်ကၠောန်အာဒၟံၚ်ဏီရောၚ် သ္ဂးရ။
“ရံၚ်အာလ္ပာ် (စကစ) မ္ဂး လ္တူနူအမှုရာဇာဝတ်ပၞာန်ဂှ် ဍေံတံကၠောန်ဒၟံၚ် နကဵုသၟဝ်က္ဍိုပ် ပရေၚ်ပ္ဍဵုပကောပ် ပကီုပရာပ်တံဂှ်ဏောၚ်၊ ကၠာကၠာတေံလေဝ် ဍေံတံ ကၠောန်ကၠုၚ်ဒၟံၚ် နူကဵုသၟဝ်က္ဍိုပ်ဏံ အဆက်က်ရ၊ တုဲတှ်ေ ဍေံတံပ္ဍဵုပ္ဍိုက်ကၠုၚ်လဝ် ရိုဝ်ဟေန်ဂျာ၊ တွဵုရးရခေၚ်တံဂှ်လေဝ် နူကဵုသၟဝ်က္ဍိုပ်ဏံရတုဲ နကဵုတၚ်ထ္ၜးဟိုတ်ဏံဂှ် ဍေံတံ ဆက်ကၠောန်အာဒၟံၚ်ဏီရောၚ်ဂှ် ချိၚ်ခယျကေတ်ဂွံရ၊ ကၠာတေံလေဝ် ကၠောန်လဝ်၊ လၟုဟ်လေဝ် ကၠောန်ဒၟံၚ်၊ ဂတဏံလေဝ် ထပ်ကၠောန်အာပၠန်ဏောၚ်” ဂှ် ညးသ္ဂးရ။
မွဲလ္ပာ်ပၠန်ဂှ် အာယုက်ကံၚ်ဇြဳပၞာန် မလလောၚ်တြးလဝ် ကာလကာတၟေၚ်ကၟိန်ဍုၚ် (၂) သၞာံဂှ်ဝွံ သှ်ေဒၟံၚ် ဆၜိုတ်ဂိတုညိညရတုဲ ဂိတုဖေဖဝ်ဝါရဳ (၁) သၞာံကၠုၚ်စိုပ်ဏံမ္ဂး အာယုက်အိုတ်ရောၚ်။
အတိုၚ်သၞောဝ်သ္ဇိုၚ် ဒက်ပ္တန် ၂၀၀၈ ဂှ်မ္ဂး အာယုက်ဏံအိုတ်မ္ဂး သွက်ဂွံကၠောန်ကဵု ပေါဲရုဲမာဲ အပ္ဍဲပွိုၚ် (၆) ဂိတုဂှ် အခိၚ်လၟုဟ်ကံၚ်ဇြဳပၞာန် ပလေဝ်ပလေတ်ကၠုၚ် လၟေၚ်ကမၠောန်ပေါဲရုဲမာဲတံ မပ္တံကဵု သွက်ဂွံစၟတ်သ္ပဒတန် ဒၞါဲရုၚ်မာဲတံ၊ ပ္ကိတ်စၟဳစၟတ် စရၚ်မၞိဟ်တံ ဒှ်တမ်ရ။
ညးအုပ်ကာ (၁) ဗော်တောတက်ကောန်ဂကူကရေၚ်ဍာဲ (KNPP) ခူဒါနဳယဴဂှ် နကဵုကံၚ်ဇြဳပၞာန် ကၠာဂွိုအ်စိုပ်ပေါဲရုဲမာဲဏံ သွက်ဂွံဗ္တိုက်ဖလှေက်ကၠုၚ် ဂကောံဇြဟတ်ပၠန်ဂတးတံဒတုဲမာန်ဂှ် ကၠောန်ကၠုၚ်နာနာသာ်မာန်ရောၚ် သ္ဂးရ။
“ဍေံတံ အစောံစရာဲဆၜိုတ်နွံ ကၠောန်ကၠုၚ်ဏောၚ်ဟီုဂှ် ဟီုဒၟံၚ်တွဵုရ၊ နူကၠာတေံရ သွက်ဂွံဗ္တိုက်သ္အး ကမၠက်ထောံမတံဂှ် လလောၚ်ကမြဴဒၟံၚ် လအ်ကၠုၚ်ဒၟံၚ်ယျ၊ ဍေံတံဂှ်တှ်ေ ကၠာပေါဲရုဲမာဲဏံဂှ် ဗ္တိုက်ဖလှေက်အာ ဂကောံပၠန်ဂတးတံ၊ ဂကောံရပ်လွဟ်တံ ဒတုဲရောၚ်ဂှ်လေဝ် ဟီုလဝ်အစဳဇန်ဍေံတံ တုဲတုဲဂှ် နွံရ၊ ဒးဟီုတှ်ေ ဍေံတံ သွက်ဂွံဆက်ထိၚ်အာ သၞောတ်တၠအဝဵုပၞာန်မာန်ဂှ် ကၠောန်ကၠုၚ်နာနာသာ်မာန်ရောၚ်၊ ဣဏံဂှ် ပြဝကမၠောန်ဍေံတံရ” သာ်ဝွံ သ္ဂးလဝ်ရ။
ညးမၞုံအခေါၚ်ဟီုဂး KNU ဗဒိုဝ်သဝ်တဝ်နဳဂှ်လေဝ် ဒပ်ပၞာန်သီအဝဵုဝွံ ပ္ဍဲဗလးတိဏံ ကျဒၟံၚ်ပရေၚ်ပၞာန်ဂှ်ရ ပၞတ်လဝ်စိုတ် ကုဂကောံဇြဟတ်ပၠန်ဂတးတံတုဲ ခၠေဝ်ပၠန်ကၠုၚ် နူကဵုတရဴကျာတံမာန်ဂှ် ဟီုဂးလဝ်ကဵု ဌာန်ပရိုၚ်သြန်လောန်တိုၚ်(မ်) ရ။
အတိုၚ်တၚ်နၚ် ဂကောံသုတေသန ISP-Myanmar ဂှ်မ္ဂး အလုံမွဲကၟိန်ဍုၚ် စနူအခိၚ်သီအဝဵုတုဲ စဵုကဵုဂိတုအံက်တဝ်ဗာ (၁၂) သၞာံဏံဂှ် ပေါဲဗ္တိုက်ပဋိပက္ခရပ်လွဟ် က္တဵုဒှ်လဝ် (၇၇၀၀) ဝါပြၚ်ရ။
ပ္ဍဲကဵုဂှ် ပေါဲဗ္တိုက် နူတွဵုရးကရေၚ်ဂှ် က္တဵုဒှ်လဝ် ဟွံအောန်နူကဵု (၄၃၈၃) ဝါတုဲ ပ္ဍဲရးသက်ကိုၚ်ဂှ် လၟိဟ်ပေါဲဗ္တိုက်အပံၚ် (၈၃၀) က္တဵုဒှ်လဝ် ဒုတိယဂၠိုၚ်အိုတ်ရ။
အတိုၚ်ဂလာန် ISP-Myanmar ဂှ်မ္ဂး ပေါဲဗ္တိုက်ကလေၚ်မွဲဝါပၠန် အကြာဒပ်ကံၚ်ဇြဳပၞာန်ကဵု ဒပ်ပၞာန်ရခေၚ် (AA) တံဂှ် ကလေၚ်သ္ကာတ်မြဟ်ကၠုၚ်တုဲ လ္ပာ်ကံၚ်ဇြဳပၞာန် ဗ္တိုက်လဝ်နကဵုတရဴကျာ အပ္ဍဲတွဵုရးရခေၚ်ဂှ် ဟွံအောန်နူကဵု (၁၄) ဝါ နွံကၠုၚ်လဝ်ရောၚ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)