သဓီု၊ ဨပရဴ ၈
ပ္ဍဲတိဍာ်ဒပ်မဟာ ၁ ဗော်သွးကောန်ဂကူကရေၚ် KNU ပ္ဍဲခရိုၚ်သဓီုဂှ် အပ္ဍဲဂိတုမာတ်တုဲကၠုၚ်တေံ ပေါဲဗ္တိုက်ၜါလ္ပာ် က္တဵုဒှ်လဝ် ၂၃ ဝါတုဲ အခိၚ်လၟုဟ်ဂှ်လေဝ် လ္ပာ်ကံၚ်ဇြဳပၞာန် ဆက်ထံၚ်မံၚ်ပရိုၚ် ကဵုပၞာန်ကျာရောၚ် ဂွံတီကေတ် ဇရေၚ်ခရိုၚ်သဓီု KNU ရ။
ပ္ဍဲပွိုၚ်ဍုၚ် မၞုံပ္ဍဲခရိုၚ်သဓီု KNU မပ္တံကဵုပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ်၊ ပွိုၚ်ဍုၚ်ဘာအၚ်တံဂှ် အပ္ဍဲဂိတုမာတ်တုဲကၠုၚ်တေံ ပေါဲဗ္တိုက်ၜါလ္ပာ် က္တဵုဒှ်လဝ် ၂၃ ဝါတုဲ ပ္ဍဲကဵုဏံ ပန်ပှော် ကုဗ္ဒိုပ်ဒပ်ကံၚ်ဇြဳပၞာန် ကေုာံ ကရောၚ်ပၞာန်ဂမၠိုၚ် နကဵုလွဟ်ဇၞော်ဂှ် ၜါဝါ၊ ကၠတ်ပန်လဝ်ဂှ် ၜါဝါ၊ ဗ္တိုက်ဗတိုဟ်မာၚ်ဂှ် မွဲဝါ၊ ဗ္တိုက်ထောံမခတိုဟ် နကဵုဒရုၚ်ဂှ် ၁၆ ဝါ၊ ပရေၚ်ပန်ပှော်ဆေၚ်မုက်ဂှ် ၜါဝါ က္တဵုဒှ်လဝ်ရ။
အပ္ဍဲပရေၚ်ဗ္တိုက်ဏံဂှ် လ္ပာ်ကံၚ်ဇြဳပၞာန် တြဴတၠ ချိုတ်တုဲ ၁၀ တၠ ဇီုကပိုက်ကလိဂွံလဝ်ဝပ်တုဲ သီဂွံလဝ် နူလ္ပာ်ကံၚ်ဇြဳပၞာန်ဂှ် သေနာတ်ၜါဇကိုအ်၊ ဖျေဲလွဟ် တြဴ ကေုာံ မကမ်လွဟ်ဂမၠိုၚ်လေဝ် ပါဂှ် ဂွံတီကေတ် အတိုၚ်တၚ်နၚ် ခရိုၚ်သဓီု KNU ရ။
သ္အာၚ်နူဂှ်ပၠန် လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတံဂှ်လေဝ် ကောန်သ္ဂံၚ်မွဲတၠ ပြဟ်လလုဲတုဲ ပန်တၠ ဇီုကပိုက်ကလိဂွံလဝ်ဝပ်တုဲ မကမ်လွဟ်လက်နက်လ္ၚဵုတံလေဝ် ဒးဆောံလေၚ်အာလဝ်ရ။
အပ္ဍဲဂိတုဨပရဴဏံ ဟိုတ်နူတိချဳအာလဝ်တုဲ လ္ပာ်ကံၚ်ဇြဳပၞာန် ဒေါအ်လဝ်ပန်ပှော်ရောၚ် လလောၚ်တြးလဝ်ကီုလေဝ် အရိုဟ်ဒဒှ်တ္ၚဲ ဆက်ထံၚ်မံၚ်ပရိုၚ် နကဵုပၞာန်ကျာတံ နွံဒၟံၚ်ရောၚ် ညးအုပ်ကာ ခရိုၚ်သဓီု KNU ပဒိုဝ်သဝ်အေနာၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲဂိတုမာတ်တုဲကၠုၚ်တေံ ပ္ဍဲတိဍာ်ခရိုၚ်သဓီု KNU ဂှ် ဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော်ဂှ် ၃၀ ဝါ၊ ထောံမခတိုဟ်ကဵုဒရုၚ်ဂှ် တြဴဝါ၊ ထောံမခတိုဟ် နူကဵုပၞာန်ကျာဂှ် ပိဝါ သ္ပကၠုၚ်လဝ်တုဲ ညးဍုၚ်ကွာန်ကောန်အရာပ် မွဲတၠ ချိုတ်တုဲ ဒ္စါံတၠ ကလိဂွံလဝ်ဝပ်တုဲ သ္ၚိဒၟံၚ် ၉ မ လီုလာ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−KNU