ဒပ်ကံၚ်ဇြဳပၞာန် လုပ်ကၠုၚ်ဍုၚ်လာယှိုဝ်မ္ဂး တိဍာ်ထိၚ်ဒဝ်လဝ်ဂမၠိုၚ် ဒးဒုၚ်ဗ္တိုက်မာန်

လာယှိုဝ်၊ ဨပရဴ ၈

ဍုၚ်လာယှိုဝ် နွံရးသေံသ္ကုတ်သၟဝ်ကျာ ဒပ်ကဝ်က MNDAA မသီဂွံလဝ်ဂှ် ယဝ်ဒပ်ကံၚ်ဇြဳပၞာန်တံ လုပ်စိုပ်ကၠုၚ်မ္ဂး ပ္ဍဲကဵုတိဍာ်ထိၚ်ဒဝ် နွံဗ္ဒါဲဗ္ဒါဲဂမၠိုၚ် ဒးဒုၚ်ဗ္တိုက်ကၠုၚ် နကဵုပရေၚ်ပၞာန်မာန်ရောၚ် ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အတးလောန် ကၠာဟွံဂွံစိုပ် ဂိတုဨပရဴ ၂၀ ဂှ် ဒပ်ကဝ်က MNDAA ဟိုတ်နူအလဵုအသဳကြုက် ကဵုကၠုၚ်ဇြဟတ်ဓရိုဟ်တုဲ ဒးဆုတ်ကလေၚ် နူလ္တူဍုၚ်လာယှိုဝ် မထိၚ်ဒက်လဝ်ဂှ်ဏောၚ်ဂှ် ပရိုၚ်တိတ်ဒၟံၚ်ရ။

ပ္ဍဲဍုၚ်လာယှိုဝ် အရာပ်နွံ ၁၂ ဂှ် ဂကောံအုပ်ဓုပ်ကံၚ်ဇြဳပၞာန်တံ လုပ်စိုပ်ဏောၚ်တုဲ ယဝ်ဒပ်ကဝ်က ဟွံဆုတ်ကလေၚ်ပုဟ်မ္ဂး ဗ္တိုက်အာ ကုပၞာန်ကျာဏောၚ် ကံၚ်ဇြဳပၞာန် ဘပဠလဝ်ရ။

ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ လ္ပာ်ကံၚ်ဇြဳပၞာန် သွက်ဂွံကလေၚ်အုပ်ဓလီု ဍုၚ်လာယှိုဝ်ဂှ် လ္ပာ်ပရေၚ်ပၞာန် ဒေါအ်ဒေၚ်အာဟွံသေၚ်ပုဟ်တုဲ ထ္ပက်ကၠုၚ်ပၞာန် လ္ပာ်ဍုၚ် မထိၚ်ဒက်လဝ်ကြပ်အိုတ်တံမာန်ရောၚ် သ္ၚဳဂၠိပ်လဝ်ရ။

“ကံၚ်ဇြဳပၞာန်ဂှ်တှ်ေ ဒေါအ်ဒေၚ်ဒၟံၚ်ဟွံသေၚ်ပုဟ်။ ဆ္ဂး လ္ပာ် MNDAA ဂှ်လေဝ် ဍေံကလေၚ်အုပ်ဓလီုအာ ဍုၚ်လာယှိုဝ်ပၠန်ဏောၚ်။ လ္တူဍုၚ်ဂှ်ရ ကံက်တုဲ ဒးချဳဒရာၚ်၊ ဒးရုန်ဂ္စါန်အာဏောၚ်ဟီုတှ်ေ ရံၚ်ကဵုပရေၚ်သဳကၠဳ ဗွဲကြဴဏံမ္ဂး လ္ပာ် သိန္နီ၊ လ္ပာ်နမ္မတူ၊ လ္ပာ်သီပေါတံဂှ် ဍေံတံ( ဒပ်စကစ) ကလေၚ်ထ္ပက်ကၠုၚ်ပၞာန် ညိညမာန်ဏောၚ်။ ဆ္ဂး နကဵု MNDAA လေဝ် ၜိုတ်သၟဟ်အစောံ ထိၚ်ဒက်အာဏောၚ်ဂှ် ထေၚ်ကေတ်ရ။ ဟွံထိၚ်ဒက်မ္ဂးလေဝ် ၜိုတ် သိန္နီ သီပေါ နမ္မတူ (တိဍာ်ကံၚ်ဇြဳပၞာန် ထ္ပက်ကၠုၚ်ပၞာန်မာန်) စုက်အိုတ်ဂှ် ဒှ်မာန်ဏောၚ်” သာ်ဝွံ သ္ဂးရ။

စရၚ်တိုက်သြန် ကေုာံ ပိုန်ဒြပ် က္ဍိုပ်သ္ကိုပ်ကဝ်ကဂမၠိုၚ်ဝွံ နွံဒၟံၚ်ပ္ဍဲတဲကြုက်တုဲ နကဵု MNDAA ဒၟါနူဒုၚ်ဒဝ်ဇြဟတ်ဂရိုဟ်ဟွံမာန်တုဲ ဒးဆုတ်ကလေၚ်ဏောၚ်ဂှ် ညးထံက်ထ္ၜးလဝ်ရ။

ပြဟ်ဟ်ဏံ ဒပ်ကဝ်ကတံ ကလေၚ်ဆုတ်အာ နူလ္တူဍုၚ်လာယှိုဝ်တုဲ ဂကောံဌာနမဆေၚ်စပ် ကံၚ်ဇြဳပၞာန်တံ လုပ်စိုပ်တုဲ နဗီုပြၚ်သာ်လဵု အုပ်ဓုပ်အာ ဍုၚ်ဂှ်ရောဟီုဂှ် ဂကောံၜါလ္ပာ် လလောၚ်ပ္တိတ်လဝ်ပရိုၚ်ဂှ် ဟွံမွဲဏီရ။

ဍုၚ်လာယှိုဝ် ဒၞါဲဖျေံသ္ဇိုၚ် ဌာန်ဂအုပ်ပၞာန်ရးဨသာန် နွံရးသေံသ္ကုတ်သၟဝ်ကျာဂှ် MNDAA ကေုာံ ဂကောံပံၚ်ကောံတံ ဗ္တိုက်သီဂွံလဝ် ပ္ဍဲသၞာံ ၂၀၂၄ ဂိတုအဝ်ဂါတ်မံက်တေံတုဲ ထ္မံက်ကၠုၚ်လဝ်ရုပ်ရဴ ကမၠောန်အုပ်ဓုပ်ဂမၠိုၚ်ရ။

ကြဴနူဂှ်တုဲ သ္ဂောံဒေါအ်ပေါဲဗ္တိုက်ဂှ် အလဵုအသဳကြုက် ကဵုကၠုၚ်ဇြဟတ်ဂရိုဟ် ကုဂကောံရပ်လွဟ်ကောန်ဍုၚ်အရၚ်သ္ကုတ်သၠုၚ်ကျာ မပၠန်ဂတးဒၟံၚ်ကံၚ်ဇြဳပၞာန်တံ ပါလုပ်သီုကဵု ဒပ်ကဝ်က MNDAA ရ။

အလဵုအသဳကြုက် ကၟာတ်လဒဵုကေတ်လဝ်အရေဝ် လ္တူ MNDAA နကဵုထပိုတ် ၅ ထပိုတ် ထပိုတ်ဍာ်၊ ပၟတ်၊ အေန်တာနိတ်၊ ကၠေၚ်စက်၊ စၞစသုၚ်၊ ဂဥုဲဇဗ၊ အခေါၚ်အာကၠုၚ်တံဂှ်တုဲ လုကဴဟွံဆုတ်ကလေၚ်အာ နူဍုၚ်လာယှိုဝ်ဂှ်မ္ဂး ရုပ်သီကဵုအာဟွံသေၚ်ပုဟ်ဂှ် ကဵုလဝ်သတိရ။

ဟိုတ်ဂှ်ရ ကြဴနူ MNDAA လလောၚ်ပ္တိတ်တၚ်လလောၚ်တြး သဳကၠဳအာ နကဵုနဲကဲပရေၚ်ဍုၚ်ကွာန်ဏောၚ်တုဲဂှ် ပရေၚ်ဖဍိုန်ဖျေံကဵုလဝ်တံ နွံတုဲ ပ္ဍဲဂိတုဂျာန္နဝါရဳဂှ် အလဵုအသဳကြုက် ပ္ညဳပ္ညပ်ကဵုအကြာတုဲ ဆဵုဂဗသဳကၠဳလဝ် ကုကံၚ်ဇြဳပၞာန် ပ္ဍဲဍုၚ်ကူမေန်ရ။

အတိုၚ်သွဟ်သဳကၠဳဂွံလဝ်ဂှ်မ္ဂး ပ္ဍဲဂိတုဂျာန္နဝါရဳ ၁၈ ဂှ် ဒပ်ကံၚ်ဇြဳပၞာန်ကဵု ဒပ် MNDAA တံ ထ္ပက်လဝ်စၟတ်တဲ လိက်ကသုက်ဒေါအ်ပန်ပှော်ၜါလ္ပာ်ရောၚ် လ္ပာ်အလဵုအသဳကြုက် ဟီုပ္တိတ်လဝ်ရ။

ဆ္ဂး ညးတာလျိုၚ်ၜါဂကောံဂှ်တှ်ေ စပ်ကဵုပရေၚ်ဒေါအ်ပန်ပှော်တုဲ ဟီုပ္တိတ်ကၠုၚ်လဝ် ဗွဲမလုပ်သၞောဝ် ဟွံမွဲကီုလေဝ် အတိုၚ်တၚ်တုပ်စိုတ်ဂှ်မ္ဂး MNDAA ဒးဆုတ်ကလေၚ် နူကဵုဍုၚ်လာယှိုဝ်ဏောၚ်ဂှ် ပရိုၚ်တိတ်ကၠုၚ် နူအခိၚ်တေံရ။

ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ တၚ်အာတ်မိက်ကံၚ်ဇြဳပၞာန် နွံဒဵုဗၞတ်ၜိုတ်လဵုရောဟီုဂှ် ဟွံတီကေတ်ကီုလေဝ် ပါဲနူအရာပ်လ္တူဍုၚ်တုဲ ဒၞါဲသှ်ေတံဂှ်တှ်ေ ဒပ်ကဝ်ကတံ ဆက်နွံဒၟံၚ်ရောၚ် ဟီုရ။

“ ဒပ်ကဝ်ကတံဂှ်တှ်ေ ဟိုတ်နူဇြဟတ်ဂရိုဟ်ကြုက်တုဲ ဒးဆုတ်ကလေၚ်။ ကံၚ်ဇြဳပၞာန်ဂှ်လေဝ် တၚ်အာတ်မိက် ဒဵုဗၞတ်ၜိုတ်လဵုနွံရောဟီုဂှ်လေဝ် ဟွံတီကေတ်ပုဟ်။ ညအ်ဂှ် ပ္ဍဲကဵုအရာဍေံတံ မကၠောန်ကဵုမာန်ဂှ် ဒှ်အရာ ဟွံကၠောန်ကဵုဟွံဂွံရပုဟ်။ ဗက်ကၠောန်ကဵုလဝ် မလောဲအိုတ်မွဲဂှ်ရဏောၚ်။ လ္တူဍုၚ်လာယှိုဝ်ပိုယ်ဂှ်တှ်ေ ဂွံအုပ်ဓုပ် ၜိုတ် ၁၂ အရာပ်ရဏောၚ်။ ဍေံတံ ၜက်ဒဒန် AD ဂၠံၚ်တိတ်ဍုၚ်လ္ပာ်တေံ ဟွံဂွံပုဟ်။ တုဲတှ်ေ ကွာန်သှ်ေတံဂှ်လေဝ် ဆက်နွံဒၟံၚ် ပ္ဍဲကဵုဒေသတၟေၚ် (၁) ကဝ်ကဂှ်ရဏောၚ်” သာ်ဝွံ သ္ဂးရ။

ဟိုတ်ဂှ်ရ ဒပ် MNDAA တံ ဒးဆုတ်ကလေၚ်နူ ဍုၚ်လာယှိုဝ်ကီုလေဝ် ဆက်ကေတ်အာဒၞါဲ မ္ၚးဍုၚ်ကဵု ပ္ဍဲကွာန်တံဏောၚ်ဂှ်ရ ကံၚ်ဇြဳပၞာန် ရပ်စပ်ကၠုၚ် ဗျူဟာက္ဍိုပ်လုပ်တုဲ သၠဲပ္တိတ်ဇကုဏောၚ်ဂှ် ထံက်ထ္ၜးလဝ်ရ။

ဂကောံမဟာမိတ်ကောဒေံပိဂကောံ MNDAA, TNLA, AA တံ သာ်လဵုထိၚ်ဒက်အာရောဟီုဂှ် ဒးမၚ်ကျောဝ်ဏောၚ်တုဲ ယဝ်ဗလးကဵုဍုၚ်လာယှိုဝ်မ္ဂး ကံၚ်ဇြဳပၞာန် ထပ်သၠဲကၠုၚ်ဗွိုၚ်ပၞာန်ဏောၚ်ဂှ် ညးဟီုလဝ်ရ။

အခိၚ်လၟုဟ် ဂကောံမဟာမိတ်ကောဒေံပိဂကောံဝွံ ဟိုတ်နူဘဲတိချဳ ဇၞော်ကဵုဇြဟတ်တုဲ သွက်ပရေၚ်ရီုဗၚ်ဟံၚ်ပြာ် ကေုာံ ပရေၚ်ကလေၚ်ဖျေံကဵုဒၞါဲဝါဲတံ ဂွံစိုပ်တရဴဂှ် အပ္ဍဲဂိတုဨပရဴမွဲဂိတုဏံ ထ္ပက်အာပၞာန်ဟွံသေၚ်တုဲ ဒေါအ်လဝ်ပန်ပှော်ရ။

ဆ္ဂး ဒပ်ကံၚ်ဇြဳပၞာန် လလောၚ်တြးလဝ်ဒေါအ်ပန်ပှော်ဂှ်တှ်ေ ပ္ဍဲကဵုရးသေံသ္ကုတ်သၟဝ်ကျာ၊ ပ္ဍဲရခေၚ် ကေုာံ ပ္ဍဲဒေသတၞဟ်ဟ်တံဂှ် ဗပေၚ်ဒၟံၚ်ဇြဟတ်၊ ထ္ပက်ဒၟံၚ်ပၞာန် သီုကဵုဗ္တိုက်ဒၟံၚ်ကဵုပၞာန်ကျာရောၚ် TNLA ကေုာံ AA လလောၚ်ပ္တိတ်လဝ်ပရိုၚ်ရ။

ပရိုၚ်−သြၚ်လောန်တိုၚ်(မ်)

ဗီု−MNDAA