မတ်မလီု၊ ဨပရဴ ၈
အလုံဍုၚ်မွဲ ဟိုတ်နူဘဲတိချဳတုဲ အခိၚ်ပရေၚ်ဇီုကပိုက်ချိုတ်တံကဵု ပရေၚ်လီုလာ်ဆောံလေၚ်တံ ဂၠိုၚ်တိုန်ကၠုၚ်ဒၟံၚ်ဂှ် ပ္ဍဲတွဵုရးဍုၚ်မန်ဂှ်တှ်ေ ကံၚ်ဇြဳပၞာန်တွဵုရး ကဵုဒၟံၚ်အခေါၚ်ကၠောန်ပေါဲသ္ဘၚ်တံ ဆက်ဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူဘဲတိချဳတုဲ အခိၚ်ညးဍုၚ်ကွာန်အပ္ဍဲဍုၚ်ဂမၠိုၚ် ဒးစံၚ်တူဒှ်ဒၟံၚ်ဒဒိုက်သောကဂှ် ဂကောံအလဵုအသဳတွဵုရးဍုၚ်မန် သၟဝ်တဲကံၚ်ဇြဳပၞာန်သီအဝဵု ကဵုကၠုၚ်အခေါၚ်ပေါဲသ္ဘၚ်ဂမၠိုၚ် လ္တူဍုၚ်မတ်မလီုကီု သီုအကြာကွာန်အကြာအရာပ် အပ္ဍဲတွဵုရးတံဂှ်ရ။
မွဲလ္ပာ်ဂှ်ပၠန် ဂကောံပရဟိတ အပ္ဍဲဒေသတံကဵု ညးသၟတ်ဂမၠိုၚ် သွက်ဂွံကဵုဒါန် ဒေသဒးဘဲတိချဳတံဂှ် ၜိုန်ရကၠောန်သ္ပဗက်ဒုၚ်မံၚ်ဒါန်တံကီုလေဝ် ကံၚ်ဇြဳပၞာန်တွဵုရးဂှ်တှ်ေ ကၠောန်ဒၟံၚ်ပေါဲသ္ဘၚ် နကဵုယၟုနာနာရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠဂှ်တှ်ေ ကံၚ်ဇြဳပၞာန် ကဵုအခေါၚ်ပၠောပ်ပေါဲဇာတ်တုဲ ကၠောန်ဒၟံၚ်ဝိုၚ်ဝေၚ်တံ ကဵုဂိတုတုဲ အခိၚ်ဒေသတၞဟ်ဟ် ဒှ်ဒၟံၚ်ဒဒိုက်သောက ဟိုတ်နူဘဲတိချဳဂှ် ပေါဲသ္ဘၚ်သာ်ဏံ ကဵုအခေါၚ်ဟွံထေက်ပုဟ်ဂှ် ဟီုရ။
“ဝိုၚ်ဝေၚ်တံဂှ် ဂၠိုၚ်ကွေံ။ လၟုဟ်ဂှ် ဝိုၚ်စာၚ်၊ ဝိုၚ်ဖေဝ်၊ ဝိုၚ်(အနဳဒေါၚ်) ၊ ဝိုၚ်(အံဂလုံ) တံဂှ်တှ်ေ ကၠောန်ဒၟံၚ်လအ်ကဵုဂိတုရ။ ဘဲဂှ်လေဝ် ဒှ်ဒၟံၚ်နာနာ ဒှ်ဒၟံၚ်မွဲတုဲမွဲ။ အခိၚ်ကသီုတှ်ေ ဘဲဍာ်၊ လၟုဟ်ဂှ် ဘဲတိချဳဒှ်ဒၟံၚ်တုဲ ညးဒးဒုၚ်တံဂှ်တှ်ေ အခိၚ်ဒှ်ဒၟံၚ်ဒဒိုက်နာနာဂှ် လ္ပာ်ပိုယ်တံ နကဵုညးဍုၚ်ကွာန်မွဲတၠ ဒးဟီုမ္ဂး မိပ်ဟွံထေက်ပုဟ်။ ကဵုအခေါၚ်ကၠောန်ပေါဲသ္ဘၚ်တံ ဟွံထေက်ပုဟ်ဂှ် အဲထေၚ်ကေတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် အပ္ဍဲဒေသလၟုဟ်ဂှ်လေဝ် နကဵုတၚ်ထ္ၜးဟိုတ်နာနာသာ် ကံၚ်ဇြဳပၞာန် ပၠောပ်ပေါဲဇာတ်တုဲ ကဵုလဝ်အခေါၚ်ကၠောန်ဝိုၚ်ဝေၚ်တံ ဇၞော်ကဵုဇြဟတ်ဂှ်ရ ဒ္ဂေတ်စရိုတ်လီုတုဲ ပရေၚ်ကၠတ်ဂၠံက်၊ ပၠံၚ်ၜတံ က္တဵုဒှ်ဒၟံၚ် မွဲဏှမွဲဏှရောၚ် ညးဆက်ဟီုရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠပၠန်ဂှ်လေဝ် ကံၚ်ဇြဳပၞာန် ကၠောန်ဒၟံၚ်ပေါဲသ္ဘၚ်သာ်ဏံဂှ်ဝွံ မိက်ဂွံထ္ၜး ဒဒှ်ဍေံတံ ထိၚ်ဒက်တွဵုရးဍုၚ်မန်မာန် မဒှ်တုဲ ညံၚ်ဝိုၚ်ဝေၚ်ဂမၠိုၚ် ဂွံပြေပြံၚ် ကၠောန်ၜိုတ်ဒၟံၚ်ရောၚ် ပါ်ပါဲလဝ်ရ။
“စိုတ်အဲတှ်ေ မွဲဂှ် လ္ပာ်ပရေၚ်ဍုၚ်ကွာန် ဂွံထ္ၜးစရဏောၚ်။ ပ္ဍဲတွဵုရးဍုၚ်မန်တှ်ေ ဍေံတံ ထိၚ်ဒက်လဝ်ခိုဟ်ဟ်မာန်ဏောၚ်ဂှ် ဒှ်အရာသွက်ဍေံတံ ဂွံပ္တိတ်ထ္ၜးစမွဲ။ တုဲတှ်ေ ကိစ္စပေါဲရုဲမာဲလေဝ် နွံဒၟံၚ်ပၠန်တုဲ ဍေံတံလေဝ် ဒၞါဲဍေံတံထိၚ်ဒက်ဂွံလဝ် နွံဒၟံၚ်ဟီုဂှ် မိက်ဂွံပ္တိတ်ထ္ၜးစရ။ သွက်ဍေံတံ မိက်ဂွံဂွံပရဲပရေၚ်ဍုၚ်ကွာန်ရ။ တုဲတှ်ေ ဖဵုအဆက်လက္ကရဴဍေံ ကိစ္စဝိုၚ်ဝေၚ်တံဂှ်လေဝ် ဍေံတံ မိက်ဂွံဂွံမံၚ်ဏောၚ်။ ညံၚ်ဝိုၚ်ဝေၚ်ဂမၠိုၚ် ဂွံပြေပြံၚ်ရဏောၚ် ထေၚ်ကေတ်ရ။ သှ်ေဂှ်တှ်ေ အခိၚ်ကာလဏံ ညးဂှ်မွဲ ဂွံမိပ်မာန်ဂှ်ရော” သာ်ဝွံ သ္ဂးရ။
ပ္ဍဲကဵုဒေသတၞဟ်ဟ် အခိၚ်လၟုဟ်ဂှ် ဟိုတ်နူဘဲတိချဳတုဲ ညးဍုၚ်ကွာန်ဂမၠိုၚ် အခိၚ်ဒှ်ဒၟံၚ်ဒဒိုက်ဂှ် ကဵုကၠောန်လဝ်ပေါဲသ္ဘၚ် ပ္ဍဲတွဵုရးဍုၚ်မန်ဂှ်ဝွံ ဒှ်ပလာပ်ပထုဲ သွက်ဒေသတၞဟ်ဟ်တံတုဲ သီုဒှ်သ္ဇက်ညးဂမၠိုၚ် ဒးဟီုစဂှ်လေဝ် ညးဆက်ဟီုရ။
မွဲလ္ပာ်ဂှ်ပၠန် ကောန်ရဲကံၚ်ဇြဳပၞာန်ဂမၠိုၚ်ဝွံ ကဵုအခေါၚ်ကုပေါဲသ္ဘၚ်ဂမၠိုၚ်တုဲ ကဵုလဝ်အခေါၚ်ဝိုၚ်ဝေၚ်ဂမၠိုၚ် ညံၚ်ကဵုမလုပ်သၞောဝ်တုဲ သၟတ်စဴနူပေါဲသ္ဘၚ် ဗ္တံဂၠုတံဂှ်လေဝ် ပကောံပကၠုၚ်ဒၟံၚ်ကောန်ပၞာန်တံ နွံဒၟံၚ်ရ။
ပ္ဍဲကဵုပေါဲသ္ဘၚ်ကံၚ်ဇြဳပၞာန် ကဵုလဝ်အခေါၚ်တံဂှ် ပၞာန်ညးဍုၚ်ကွာန်သၟဝ်တဲကံၚ်ဇြဳပၞာန်ဂမၠိုၚ် ရပ်လွဟ်တုဲ ကေတ်ကဵုဒၟံၚ်ဂီုကၠီု ဝိုၚ်ဝေၚ်တံဂှ်တုဲ ဝိုၚ်ဝေၚ်ဂမၠိုၚ် တန်တဴကဵုဂွံလှုဲအောန်ဂၠိုၚ်တုဲ ကၠောန်ဗဒှ်ဒၟံၚ်ပေါဲသ္ဘၚ် တ္ၚဲဇမၠိၚ်ရ။
ပ္ဍဲတွဵုရးဍုၚ်မန် ကံၚ်ဇြဳပၞာန် ကဵုဒၟံၚ်အခေါၚ် ပေါဲသ္ဘၚ်ဂမၠိုၚ် သာ်ဏံကီုလေဝ် ပ္ဍဲဂိတုမာတ် ၂၈ တုဲကၠုၚ်တေံ ဟိုတ်နူတိချဳ ဇၞော်ကဵုဇြဟတ်တုဲ အလုံဍုၚ်မွဲ လၟိဟ်မၞိဟ် ပိလ္ၚီပြၚ် ဒးချိုတ်အာလဝ်တုဲ ညးဇီုကပိုက်ကလိဂွံဝပ်ကဵု ပရေၚ်လီုလာ်ဆောံလေၚ်တံ ဆက်သၠုၚ်တိုန်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ