သဵု(လ်) ၊ ဨပရဴ ၈
သမ္မတတြေံ ယောန်သက်ယော ဒးဒုၚ်ပ္တိတ်လဝ် နူကဵုကဆံၚ်ဌာနန္တရညး ဟိုတ်နူလလောၚ်တြးကၠုၚ် သၞောဝ်အုပ်ဓုပ်ပၞာန်ဂှ် ပ္ဍဲဂိတုဨပရဴ ၅ တေံ မၞိဟ်ဂၠိုၚ်ကဵုလ္ၚီ ထံက်ဂလာန်ညး ထ္ၜးလဝ်ဆန္ဒ ပ္ဍဲဍုၚ်ဇၞော်ဍုၚ်ကိုဝ်ရဳယျာသၠုၚ်ကျာ ဍုၚ်သဵု(လ်) ရ။
စပ်ကဵုလလောၚ်တြးကၠုၚ် သၞောဝ်အုပ်ဓုပ်ပၞာန် ပ္ဍဲဂိတုဒဳဇြေမ်ဗာ ၃ သွက်ဂွံဖအိုတ်ကၠေံ ပရေၚ်အုပ်ဓုပ်ကောန်အရာပ်တံဂှ်တုဲ သွက်ဂွံဖာဲပ္တိတ်ကၠေံ သမ္မတတြေံ ယောန် နူကဵုကဆံၚ်ဌာနန္တရညးဂှ် ပ္ဍဲဂိတုဨပရဴ ၄ တေံ ရုၚ်သၞောဝ်ဓဝ် စပ်ကဵုသၞောဝ်သ္ဇိုၚ်ဒက်ပ္တန် ကိုဝ်ရဳယျာသၠုၚ်ကျာ သ္ဂုတ်သွာတ်ကၠုၚ် ညဳညဳသာသာရ။
ပ္ဍဲကိုဝ်ရဳယျာသၠုၚ်ကျာ ဂၠိုၚ်ကဵုဂိတု ပရေၚ်ဍုၚ်ကွာန်ဟွံညိၚ်ဝတ် က္တဵုဒှ်လဝ်တုဲ ပ္ဍဲဂိတုဂျောန်ကၠုၚ်စိုပ်ဏံ သွက်ဂွံကၠောန်ဗဒှ်အာ ပေါဲရုဲမာဲတၟိဂှ် စဳဇန်လဝ်ရ။
အမိၚ်နူရုၚ်သၞောဝ်ဓဝ် မဒးမၚ်ကၠုၚ် အခိၚ်ဗွဲမလအ်လ တိတ်ကၠုၚ်တုဲဂှ် ပရေၚ်ကြံၚ်မ္ၚိုဟ် ပ္ဍဲကိုဝ်ရဳယျာသၠုၚ်ကျာ သၠုၚ်တိုန်ကၠုၚ်လဝ်တုဲ ဂကောံလ္ပာ်တဲပုၚ် မထံက်ဂလာန် ကုသမ္မတတြေံ မဒးဒုၚ်ပ္တိတ်လဝ် နူကဆံၚ်ဒၞါဲညးဂှ် ကၠောန်ကၠုၚ်ဒၟံၚ်ပေါဲထ္ၜးဆန္ဒ လ္တူဍုၚ်သဵု(လ်) လၟေၚ်သတ္တာဟရ။
ညးထံက်ဂလာန် ကုသမ္မတတြေံ ယောန်ဂှ်တှ်ေ ပရေၚ်စောဲစပ်ပ္တိုန်ဒုဟ်ဝွံ ဟွံလုပ်သၞောဝ်ပုဟ် ကညာၚ်ကရေဲ ထံက်ဂလာန်ညးတုဲ ထ္ၜးလဝ်ဆန္ဒရ။
သွက်ဂွံကၟာၚ်ကၠေံ ဂကောံဇြဟတ်ဒစဵုဒစးကၟိန်ဍုၚ်ကဵု အန္တရာယ်ကိုဝ်ရဳယျာသၟဝ်ကျာဂှ် နွံပၟိက် ဒးလလောၚ်တြး သၞောဝ်အုပ်ဓုပ်ပၞာန်ဏောၚ် ရဴဝွံ သမ္မတတြေံ ယောန် ဟီုကၠုၚ်လဝ်ရ။
ဆ္ဂး ညးဟွံဒးဂၞပ် ပရေၚ်ယောန် မအုပ်ဓုပ်တံဂှ်တှ်ေ ကြဴနူတၚ်သ္ဂုတ်သွာတ် နူရုၚ်သၞောဝ်ဓဝ် တိတ်ကၠုၚ်တုဲဂှ် ဒုၚ်ကေတ်လဝ်ပေါဲအံၚ်ဇၞးအိုတ်ရ။
တုဲကၠုၚ် ဂိတုဒဳဇြေမ်ဗာတေံ ယောန် လလောၚ်တြးကၠုၚ်သၞောဝ်အုပ်ဓုပ်ပၞာန်ဂှ်ဝွံ သွက်ကၟိန်ဍုၚ် ဒှ်ပြဝ အန္တရာယ်မၞုံဇၞော်ကဵုဇြဟတ်ရောၚ် ရုၚ်သၞောဝ်ဓဝ် ဟီုကၠုၚ်ရ။
ပ္ဍဲပေါဲရုဲမာဲကၠုၚ်စိုပ်ဏံ က္ဍိုပ်သ္ကိုပ်ဂကောံဒစဵုဒစး လဳဂျေမျံၚ် အာက္ဍိုပ်ဏောၚ်ဂှ် ညးစိုန်သကီုဂမၠိုၚ် ဟီုရ။
ဗော်ညးဝွံ ဒှ်ဗော်မၞုံကဵုလစွံစိုတ် မိက်ဂွံပ္ညဳပ္ညပ် ကုကိုဝ်ရဳယျာသၟဝ်ကျာ မွဲရ။
က္ဍိုပ်သ္ကိုပ်လ္ပာ်ဒစဵုဒစး လဳ ဒှ်ကၠုၚ်သမ္မတမာန်ဂှ် ညးထံက်ဂလာန် သမ္မတတြေံဂမၠိုၚ် ဒှ်ဒၟံၚ်ဓဝိၚ်အိုတ်ရ။
Ref: AFP