တၞၚ်သဳ၊ ဨပရဴ ၈
ရးတၞၚ်သဳ ပွိုၚ်ဍုၚ်တၞၚ်သဳ ပ္ဍဲကွာန်(ချောၚ်းနောက်ပြန်) ဂှ် ပေါဲဗ္တိုက်ဟွံမွဲမွဲသာ် ဟိုတ်နူကံၚ်ဇြဳပၞာန် ဗ္တိုက်ကဵုပၞာန်ကျာတုဲ ကောန်သ္ဂံၚ် PDF ၜါတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ပကဖ ခရိုၚ်ဗိက်ရ။
ဒပ်ကံၚ်ဇြဳပၞာန်ဝွံ ပ္ဍဲဂိတုဨပရဴ ၄ လဒေါဝ်တ္ၚဲ ၜိုတ် ၁၂ နာဍဳဂှ် ကၠုၚ်စိုပ်ထောံဏာလဝ်မခတိုဟ်မွဲမ ပ္ဍဲကဵုကွာန် (ချောၚ်းနောက်ပြန်) နကဵုက္ၜၚ်ကျာဂျက်ဖိုက်တာ မွဲဖ္ဍိုက်တုဲ သီုကဵုပန်ဗ္တိုက်ဏာလဝ် နကဵုသၞာတ်စက်ရ။
ဟိုတ်နူဒပ်ကံၚ်ဇြဳပၞာန် ဗ္တိုက်ထောံကၠုၚ်မခတိုဟ်ဂှ်တုဲ ကောန်သ္ဂံၚ် PDF ၜါတၠ ကလိဂွံလဝ်ဝပ် ဟွံဒးဂွိၚ်ရောၚ် ညးဒုၚ်တာလျိုၚ် ပကဖ ဂကောံဒပ်စဵုဒၞါညးဍုၚ်ကွာန် ခရိုၚ်ဗိက် မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဨပရဴ ၅ အခိၚ်နူဂယးဂှ်လေဝ် လ္ပာ်ကံၚ်ဇြဳပၞာန် ဂေတ်ကွာန်(ချောၚ်းနောက်ပြန်) ကဵု ကွာန်(သိန်းခွန်) နကဵုက္ၜၚ်ကျာ ၜါဗဂေတ်တုဲ ထောံဏာလဝ်မခတိုဟ်ကီုလေဝ် ကောန်သ္ဂံၚ်ဇီုကပိုက်ဒး ဟွံမွဲပုဟ်ဂှ် သ္ဂးရ။
ဟိုတ်နူဘဲတိချဳတုဲ လ္ပာ်ကံၚ်ဇြဳပၞာန် လလောၚ်တြးကၠုၚ် ဒေါအ်ပန်ပှော်ဗွဲယာယဳ နူဂိတုဨပရဴ ၂ စဵုကဵုဂိတုဨပရဴ ၂၂ ပွိုၚ်ပိသတ္တာဟကီုလေဝ် ပ္ဍဲဗလးတိဏံဂှ်တှ်ေ ပေါဲဗ္တိုက်ဟွံမွဲမွသာ် ဆက်ထောံမံၚ်မခတိုဟ် ဗ္တိုက်ဒၟံၚ်ရ။
ပ္ဍဲကဵုဂၠံၚ်သွံရာန်ဗၞိက်ပယျဵု သေံ−ဗၟာ မဒှ်ဂၠံၚ်တၞၚ်သဳ−မဝ်ဒံၚ်ဂှ် အပ္ဍဲဂိတုဒဳဇြေမ်ဗာ ၁၈ တုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံဂျ် ပေါဲဗ္တိုက်ၜါလ္ပာ်တံ က္တဵုဒှ်ဒၟံၚ်ရ။
ဟိုတ်နူပေါဲဗ္တိုက်ဂမၠိုၚ်တုဲ ညးဒေသ ဗ္ဒါဲ ၃၀၀၀ နူကဵုကွာန်ဍာ်ဗု၊ ထုၚ်မခါ၊ ချောင်းနှစ်ပေါက်၊ သိန္နောတံ ဒးပါဲမံၚ်ဘဲပၞာန် ၃ ဂိတုပြၚ်ကၠုၚ်ယျဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု− Social Media