ပျုၚ်ယာမ် – နဝ်ဝေမ်ဗာ (၂၀)
က္ဍိုပ်သ္ကိုပ်ကဝ်ရဳယျာသၟဝ်ကျာ ကေန်ဂျုၚ်အာန်ဂှ် ဗဵုရံၚ်ဒၟံၚ် ပရေၚ်ပန်ဗလးစမ်ၜတ် ကမ်လှောဝ်တၟိ စိုပ်စဵုကဵုဍုၚ်အမေရိကာန်မာန် ကရောံကောန်ဝုတ်ညး သ္ပလဝ်ဒတန်ဟွံမာန်ဏီဂှ် ရောၚ် KCNA ဓမံက်ထ္ၜးလဝ်ရ။
ပ္ဍဲဗီုဓာတ် ပတိုန်ထ္ၜးလဝ်ပ္ဍဲ မဳဒဳယာကၟိန်ဍုၚ် KCNA ဂှ် ကေန် ခံက်ကေတ်လဝ်တဲကောန်ဝုတ်ဍောတ်တုဲ နွံမံၚ်ကရပ်ဂၠံၚ်ကွာ် ပန်ဗလးကမ်လှောဝ်ရောၚ် သ္ဂးလဝ်ရ။
ကမ်လှောဝ် က္ဍိုပ်သ္ကိုပ်ကိုဝ်ရဳယျာသၟဝ်ကျာ ကောန်ကဵုအပါ ကေန်တအ်ညးၜါ ဗဵုဒၟံၚ်ဂှ် ဒှ် Hwasong-17 တုဲ စဵုကဵုခရာ ၉၉၉.၂ ကဳလောမဳတာ(၆၂၁ မိုၚ်) အာစိုပ်မာန်တုဲ ပန်ဗလးပတိတ်နူကဵု သၠာတ်က္ၜၚ်ကျာဍုၚ်နာနာ ပျုၚ်ယာမ် ရဂှ် ဂွံတီကေတ်ရ။
အလဵုအသဳဂျပါန်ဂှ် ကမ်လှောဝ်တၟိဏံ စဵုကဵုၝောံဍုၚ်အမေရိကာန် အာစိုပ်မာန်ရောၚ် ပ္ဍဲဂိတုနဝ်ဝေမ်ဗာ စၟတ်တ္ၚဲ(၁၈) ကိုဝ်ရဳယျာသၟဝ်ကျာပန်ဗလးပတိတ်ဏာတုဲ ဂှ် ဟီုကဵုကၠုၚ်လဝ်သတိရ။
“နကဵုသၞဂမၠိုၚ် ဟီုသ္ဂးမံၚ်ဂလာန် ဆေၚ်စပ်ကဵု ပွမပန်ဗလးပ္တိတ်နျူကလဳယျာ ခြာဟွံလအ်ဟွံလအ်တုဲ ယဝ်ခါရဆက်ကၠောန်သ္ပဒၟံၚ် ပရေၚ်ဘပဠ ကိုဝ်ရဳယျာသၟဝ်ကျာဏီမ္ဂး အလဵုအသဳဗော်ပိုဲ သုၚ်စောဲလွဟ်လက်နက်နျူကလဳယျာတုဲ ကလေၚ်ပလန်အာတဲ ဒုၚ်ဆေၚ်အာမုက်ရောၚ်”ဂှ် စပ်ကဵုကေန်ဟီုဂးလဝ်တုဲ ဒုၚ်စဳရေၚ်လဝ် ပ္ဍဲKCNA ရ။
သ္အာၚ်နူဏံပၠန် က္ဍိုပ်သ္ကိုပ်ကိုဝ်ရဳယျာသၟဝ်ကျာဂှ် ပရေၚ်ပန်ဗလးစမ်ၜတ်ဏံဂှ် ဒှ်ထ္ၜးအစောန်စရာဲဍာ်ဒကေဝ်ကၟိန်ဍုၚ် ကလေၚ်ပလန်တဲကဵု ပရေၚ်ပ္ကတ်ပ္ကေၚ်ပၞာန်သၞ မပလီုပလာ်ဒၟံၚ် ပရေၚ်ညိၚ်ဝတ်ၜိုတ်လလံ တကအ်ကိုဝ်ရဳယျာရဂှ် KCNA သ္ဂးလဝ်ရ။