လံၚ်လုၚ်၊ နဝ်ဝေမ်ဗာ (၂၄)
ပ္ဍဲဂိတုနဝ်ဝေမ်ဗာ (၂၂) ဇိုၚ်သဝ်တ္ၚဲ ၜိုတ် (၆) နာဍဳတုဲကၠုၚ်တေံ ဗ္ဒါဲကွာန်ပျေန်သတဳမဝ် ကေုာံ ကွာန်ပျေန်ကျဳ၊ ပွိုၚ်ဍုၚ်လံၚ်လုၚ်၊ ရးဒေသဇၞော်တၞၚ်သဳဂှ် သ္ကိုပ်ပရေၚ်ပညာပွိုၚ်ဍုၚ် ကံၚ်ဇြဳပၞာန် ဥူဇြဝ်ဝ်သဵု ဒးဒုၚ်ပန်လဝ် ကဵုသေနာတ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သ္ကိုပ်ပရေၚ်ပညာပွိုၚ်ဍုၚ် ဥူဇြဝ်ဝ်သဵု ကၠုၚ်နူလံၚ်လုၚ် နကဵုကွဳလိုန်ဓာတ်ဂှ် သၟာသေနာတ် ဟွံတီယၟု (၂) တၠ ဗက်ကၠုၚ်ကဵုကွဳလိုန်ဓာတ် ပ္ဍဲဗ္ဒါဲသုသာန် ကွာန်ပျေန်သတဳမဝ်တုဲ ပန်ပှော်လဝ် ကဵုသေနာတ် လ္ပာ်လက္ကရဴဂှ်ရ။
ၜိုန်ရဒးဒုၚ်ပန်ကဵု သေနာတ်ကီုလေဝ် သ္ကိုပ်ပရေၚ်ပညာပွိုၚ်ဍုၚ် ဥူဇြဝ်ဝ်သဵုဂှ် ဟွံဒးမွဲသာ် ဗလးအာလဝ်ဂှ် ဂွံတီကေတ်ရ။
ကြဴနူသ္ကိုပ်ပရေၚ်ပညာပွိုၚ်ဍုၚ် ဒးဒုၚ်ပန်တုဲဂှ် ကောန်ဒပ်ကံၚ်ဇြဳပၞာန် ဇြဟတ်ဒပ် ၜိုတ် (၄၀) ဝွံ လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲကဵုကွာန်တဗျာ ကေုာံ ကွာန်ပျေန်သတဳမဝ်တံတုဲ ပ္ဍဲဂိတုနဝ်ဝေမ်ဗာ (၂၃) ဂှ် လုပ်စိုပ်ဂၠိုက်ဂၠါဲဗ္တးဗ္တန်လဝ် ပ္ဍဲကွာန်ချံၚ်တဝ်ဝဂှ် ညးဒေသတံ ဟီုရ။
အခိၚ်ဒပ်ကၚ်ဇြဳပၞာန် လုပ်စိုပ်ဂၠိုက်ဂၠါဲဗ္တးဗ္တန်လဝ် ကွာန်ချံၚ်တဝ်ဝဂှ် ကေတ်ဏာလဝ် သီုကဵုထဝ်သြန်ကယျိုၚ်ကယျဝ် ကေုာံ ဖုၚ်တံ နူကဵုသ္ၚိ (၂) မ ပ္ဍဲကွာန်ဂှ်ဏီလေဝ် ဟီုဂးလဝ်ရ။
ဂကောံလဵု ပန်ပှော်လဝ် သ္ကိုပ်ပရေၚ်ပညာပွိုၚ်ဍုၚ် ကံၚ်ဇြဳပၞာန်ရောဟီုဂှ် ဟွံဂွံတီကေတ်ဏီတုဲ ဂကောံဒပ်စဵုဒၞါညးဍုၚ်ကွာန် ဖျေံသ္ဇိုၚ် ပွိုၚ်ဍုၚ်လံၚ်လုၚ် (၂) ဂကောံ DDT ကဵု လံၚ်လုၚ်(ပကဖ) တံဂှ် ဍေံတံ ပန်လဝ်ဟွံသေၚ်ပုဟ်ဂှ် ဂယျာန်ပါဲလဝ်ရ။
သ္ကိုပ်ပရေၚ်ပညာ ပွိုၚ်ဍုၚ်လံၚ်လုၚ်ဂှ်ဝွံ သွက်သၞာဲဒဴပရေၚ်ပညာ CDM တံ ဂွံကလေၚ်လုပ်ကလောန်ဂှ် ကဵုဇြဟတ်ဂရိုဟ်၊ ကဵုရပ်ဒက်တံဂှ် ကၠောန်သ္ပလဝ်ရောၚ် ဂွံတီကေတ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာ ဟွံမာန်လဝ်ရ။
ပရိုၚ်−သြၚ်လောန်တိုၚ်(မ်)