ဝါယှေန်တာန်၊ နဝ်ဝေမ်ဗာ (၂၈)
သွက်ပရေၚ်ဂီုကၠီုကောန်ဂကူအမေရိကာန်ဂးတုဲ ကၟာတ်စဵုဒၞါအာ အခေါၚ်ပၠောပ်ပ္တိုန်သွံတြး ကပေါတ်ကိရိယာ ပရေၚ်ဆက်စၠောံတေဝ်လဳ ကြုက်ပိုၚ် ဟွာဝေ ကေုာံ ZTE တံရောၚ်ဂှ် အလဵုအသဳအမေရိကာန် လလောၚ်တြးလဝ်ရ။
သၞောဝ်လက္ကရဴအိုတ် မကၟာတ်ဆဵုဒဝ်တာဒၞါထောံ အခေါၚ်သွံတြး အခေါၚ်ပၠောပ်ပ္တိုန် ကပေါတ်ကိရိယာ မကၠောန်ပ္တိတ်နူ ကမ္ပဏဳထလဳကောမ် ပရေၚ်ဆက်စၠောံ Hytera ၊ Hangzhou Hikvision Digital Techology ကေုာံ Dahua Technology မကၠောန်ပ္တိတ် ကိရိယာပရေၚ်မၚ်ရံၚ် ဍုၚ်ကြုက်ပိုၚ်တံဂှ် ကမ္မယှေန်ဖေဝ်ဒရာ ကဏ္ဍပရေၚ်ဆက်စၠောံ ကၟိန်ဍုၚ်အမေရိကာန် စၞောန်ပျးသ္ပဒတန်လဝ် ပ္ဍဲဂိတုနဝ်ဝေမ်ဗာ (၂၅) တေံရ။
ဟိုတ်နူဓဝိၚ် အလဵုအသဳကြုက် သုၚ်စောဲ ကမ္ပဏဳနဲကွတ်ပညာကြုက်တံ သွက်ဂွံဂၠိုက်ဂၠါဲထံၚ်ပရိုၚ် ကောန်ဍုၚ်အမေရိကာန်တံမာန်ဂှ်တုဲ အလဵုအသဳအမေရိကာန် သရိုဟ်ဖျေံလဝ် ကမ္ပဏဳနဲကွတ်ပညာကြုက်တံ အလန်လက္ကရဴအိုတ်ရ။
“သၞောဝ်ဥပဒေ မလလောၚ်ပ္တိတ်တၟိလၟုဟ်ဂမၠိုၚ်ဝွံ သွက်ဂွံစဵုဒၞါ ပရေၚ်ဆက်စၠောံထလဳတံ မပါလုပ် သီုကောန်ဍုၚ်အမေရိကာန်တံ နူကဵုအရာမဘပဠ ပရေၚ်ဂီုကၠီုတံမာန်ဂှ် ပၞောဝ်ကဵုပြဝပိုယ်တံ မရေၚ်တၠုၚ်လၟုဟ်တံဂှ် ဒှ်သ္ကုတ်ပၟိက်ဇၞော်မွဲရ” သာ်ဝွံ ထ္မံက်ထ္ၜးလဝ် ပ္ဍဲတၚ်လလောၚ်တြး ဥက္ကဌ ကမ္မယှေန်ဖေဝ်ဒရာ ကဏ္ဍပရေၚ်ဆက်စၠောံ ကၟိန်ဍုၚ်အမေရိကာန် FCC ဂျက်ဇြဳကာရ။
နကဵုဟွာဝေ သွက်ဂွံကဵုတၚ်စၟတ်ဂှ် ဂယျာန်ပါဲလဝ်တုဲ ကမ္ပဏဳဂမၠိုၚ် မပ္တံကဵု ZTE, Dahua Hikvision Hytera တံဂှ် အရာမအာတ်မိက် သွက်ဂွံကဵုတၚ်စၟတ်ဂှ် ကလေၚ်ခၠေဝ်ပလန်သှ်ကဵုလဝ် ဟွံမွဲဏီရ။
ဥက္ကဌ FCC ဂှ် ဂိတုတုဲကၠုၚ်ဂှ်လေဝ် လလောၚ်တြးလဝ် ဂလာန်ပ္တိုန်ထ္ၜး သီုကဵုပရေၚ်ကေတ်အရေဝ်ကၟာတ်ဒၞါ ကမ္ပဏဳ မပၠောပ်ပ္တိုန်သွံတြး ကပေါတ်ကိရိယာပရေၚ်ဆက်စၠောံ ကၟိန်ဍုၚ်အမေရိကာန်တံ ကေုာံ ကမ္မယှေန်နာတၞဟ်ဟ် (၃) တၠတံဂှ်ရ။
သွက်ဂွံကေတ်အရေဝ်ကၟာတ်ဒၞါ အခေါၚ်ပၠောပ်ပ္တိုန်သွံတြး ကပေါတ်ကိရိယာကမ္ပဏဳ မပါလုပ် ပ္ဍဲစရၚ် FCC မပကောံပကေဝ်လဝ် ပ္ဍဲသၞာံ ၂၀၂၁ တုဲကၠုၚ်တေံဂှ် ကူချပ်မံၚ်ရောၚ် သ္ဂးလဝ်ရ။
ကြဴနူစၟတ်သမ္တီကၠေံ ကမ္ပဏဳကြုက် Huawai, ZTE, Hytera Communication Corp, Hikvision ကေုာံ Dahua တံ လ္ဂောံကဵုဥပဒေ ၂၀၁၉ နဒဒှ်အရာမဘပဠ ပရေၚ်ဂီုကၠီုကောန်ဂကူ ပ္ဍဲဂိတုမာတ် သၞာံတုဲကၠုၚ်တေံတုဲဂှ် သွက်ဂွံစဵုဒၞါ ဇာဇၞိက်ပရေၚ်ဆက်စၠောံအမေရိကာန်တံဂှ် တၚ်တာဒၞါတံ မံက်တိတ်ကၠုၚ်လဝ်ရ။
စပ်ကဵုကိစ္စကၟာတ်ဒၞါ အခေါၚ်သွံတြးပၠောပ်ပ္တိုန် ကပေါတ်ကမ္ပဏဳ နဲကွတ်ပညာကြုက် အလဵုအသဳကြုက်တံ မသုၚ်စောဲဒၟံၚ် အရၚ်သ္ဂောံဂၠိုက်ဂၠါဲ စၟဳစၟတ်တံဂှ်တုဲ ရဳပါပလေတ်ကာန် (၂) တၠ ကေုာံ ဗော်ဒဳမဝ်ကရေတ်တေတ် (၂) တၠ မပါလုပ် ကမ္မယှေန်နာ နူအေဂျေန်ဇြဳ (၄) တၠတံ ထံက်လဝ်ဂလာန်ရ။
Ref: CNA