ယှာန်ဟိုၚ် – နဝ်ဝေမ်ဗာ(၂၉)
ပ္ဍဲကဵုဍုၚ်ကြုက် ဟိုတ်နူတၚ်စဵုဒၞာဂိုဝ်ဗေတ် တေၚ်ဂြတ်တုဲ ပေါဲထ္ၜးဆန္ဒ အလုံမွဲဍုၚ် ဒှ်ကၠုၚ်ဒၟံၚ် ပွိုၚ်ပိတ္ၚဲတုဲ ပ္ဍဲယှာန်ဟိုၚ်ဂှ် တုဲကၠုၚ်ဂိတုနဝ်ဝေမ်ဗာ စၟတ်တ္ၚဲ (၂၇) ပ္ဍဲအခိၚ်ဇိုၚ်သဝ်တ္ၚဲဂှ် ညးထ္ၜးဆန္ဒဂၠိုၚ်ကဵုကၠံ ကေုာံ ဂကောံဒပ်ဗၠာဲသၟိၚ်ဂမၠိုၚ် က္တဵုဒှ်ဒၟံၚ် ပရေၚ်ကလိုက်ကၟဵုရုသံၚ်ရ။
စတမ်နူအခိၚ် သမ္မတယှဳကျေန်ဖျေန် ဂွံကၠုၚ်အဝဵုတုဲ ဇွိုန်လပှ်ဒစဵုဒစးကဵုအာဏာ ဟွံကေၚ်ဒှ်မွဲလှ်ေဂှ် ဒှ်ကၠုၚ်ဒၟံၚ်တုဲ ပရေၚ်ဟွံပေၚ်စိုတ်ကဵု မူဝါဒဂိုဝ်ဗေတ် ယှဳ ပိဂိတု က္တဵုဒှ်ဂၠိုၚ်တိုန်ကၠုၚ် ကရပ်ပွိုၚ်ပိသၞာံရ။
“ပိုဲဂှ် ဒၟာနူဆာန်ကၟိန်ဍုၚ်တုဲ ၜိုန်ရစိုပ်ဒၟံၚ် ဒၞာဲဏံကီုလေဝ် ဟွံဒးစိုတ်ကဵု အလဵုအသဳပုဟ်၊ မိက်ဂွံအာကၠုၚ် ဗၠးဗၠးၜးၜးရ ဆဂးဂှ် ပိုဲသ္ပဟွံဂွံပုဟ်၊ မူဝါဒ COVID-19 ဂှ် ဒှ် Game မွဲဂကူတုဲ ဟွံဒုၚ်သ္ဇိုၚ်ကဵု ပညာသိပ္ပံ ဟွံသေၚ်တှ်ေ ပ္ဍဲဘဝပကတိရုပ်ရ” ဂှ် ညးထ္ၜးဆန္ဒမွဲတၠ မၞုံယၟု Shaun Xiao ဂှ် ဟီုသ္ဂးလဝ်ရ။
ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၇)ဂှ် ညးထ္ၜးဆန္ဒဂမၠိုၚ် ထ္ၜးကၠုၚ်လဝ်ဆန္ဒ ပ္ဍဲလတူဂၠံၚ် ပ္ဍဲဍုၚ်ဝူဟာန် ကေုာံဍုၚ်တၞဟ်တုဲ ကွးဘာ ပ္ဍဲဘာတက္ကသိုလ် အလုံမွဲဍုၚ်ကြုက်ဂမၠိုၚ်လေဝ် ကောံကလောံဒၟံၚ် သွက်ဂွံထ္ၜးဆန္ဒရောၚ် ဂွံတီကေတ်ရ။
နကဵုရမျာၚ်ကရေဲမ္ဂး “ပိုဲဟၟဲပၟိက်ကဵု Mask ပုဟ်၊ ပိုဲနွံပၟိက်ကဵု ပရေၚ်ဗၠးၜးဏောၚ်။ ပိုဲဟၟဲပၟိက်ကဵု ပရေၚ်စမ်ၜတ် ဂိုဝ်ဗေတ်ပုဟ်။ ပိုဲနွံပၟိက် ကဵုပရေၚ်ဗၠးၜးဏောၚ်”ဂှ် ဂကောံထ္ၜးဆန္ဒတအ် ကညာၚ်ကရေဲ အာတ်မိက်လဝ်ရ။
ပ္ဍဲဍုၚ်ဇၞော် ဒေသယှာန်ကျာန်ဂှ် စမြာၚ်မွဲ တူလဝ်ပၟတ်တုဲ ပ္ဍဲရုပ်ဂမျိုၚ် ပတိုန်လဝ် ပ္ဍဲဇာနှိက်ပရေၚ်မၞိဟ်ဂှ်မ္ဂး ညးမံၚ်တန်တဴ (၁၀) ပြၚ် ဒးချိုတ်လဝ်ဂးတုဲ ပရေၚ်စောတ်စောဲတအ် မံက်တိတ်ကၠုၚ်လဝ်ရ။
အဖန်အဇန်ဂိုဝ်ဗေတ် ညးနွံတာလျိုၚ်ဍုၚ်ဂမၠိုၚ်ဂှ် က္တဵုဗဒှ်ကဵု ပရေၚ်ဆိုအ်ဗ ကမၠောန်ပရေၚ်ရီုဗၚ်ရောၚ်ဂှ် စောတ်စောဲလဝ်တုဲ ညးတန်တဴဒၟံၚ်ပ္ဍဲဍုၚ် (၄) ပြကောဋိကိုတ်ဂှ် ဒးဒုၚ်လံက်ဒေါၚ်လဝ် လအ်လအိုတ်တုဲ ဒးဒုၚ်စဵုဒၞာလဝ် ညံၚ်ဟွံဂွံတိတ်နူ မ္ၚးသ္ၚိညးတအ် အပံၚ်တ္ၚဲ စဵုကဵု(၁၀၀)တ္ၚဲရ။
သွက်ဂွံတးပါဲ တၚ်စောတ်စောဲဏံဂှ် တုဲကၠုၚ်ဂိတုနဝ်ဝေမ်ဗာ စၟတ်တ္ၚဲ (၂၆) အခိၚ်နူဂယးပြဟ်ဂှ် ညးနွံတာလျိုၚ်ဂမၠိုၚ် ကၠောန်ကၠုၚ်လဝ် ပေါဲသောၚ်ကလးပရိုၚ်ဏီရ။
“ပိုဲနွံပၟိက်ကဵု သ္ဇိုၚ်အခေါၚ်အရာမၞိဟ်ရ၊ ဟွံဒုၚ်စၟဳစၟတ်မွဲသာ် ပိုဲဟွံဂွံအခေါၚ်တိတ်နူမ္ၚးသ္ၚိရ၊ ပရောဒဒှ်ဏံဂှ် ဓရိုဟ်ပတိတ်ဒၟံၚ် မၞိဟ်ပ္ဍဲယှာန်ကျာန် ဒၞာဲဌာန်သ္ၚောဲရ” ဂှ် ညးထ္ၜးဆန္ဒ ဟွံမိက်ဓမံက်ယၟုမွဲတၠဂှ် ဟီုကဵုဌာန်ပရိုၚ် ရိုက်တာရ။
မၞိဟ်ဂၠိုၚ်ကဵုကၠံ ကောံကလောံကၠုၚ်တုဲ ညးလ္ၚဵုဂှ် ဒှ်ကၠုၚ်ပရေၚ်ကလိုက်ကၟဵုရုသံၚ်ကဵု ဗၠာဲသၟိၚ် မပတိတ်ကၠုၚ်ဇြဟတ် သွက်ဂွံပါ်တြးဂကောံမၞိဟ်ဂှ်ရ။
ပ္ဍဲကၟိန်ဍုၚ်ကြုက် မပိုၚ်ခြာပါဲတးလဝ် လစွံစိုတ်တၞဟ်ခြာ ပ္ဍဲသၟဝ်တဲယှဳကျေန်ဖျေန်ဂှ် ပရေၚ်ညးဍုၚ်ကွာန်ဂမၠိုၚ် ထ္ၜးဆန္ဒ ပြးဇး က္တဵုဒှ်အောန်ဒၟံၚ်တုဲ ကောန်ဍုၚ်ဗွဲမဂၠိုၚ်ဂှ် သွက်ဂွံဓမံက်ထ္ၜး တၚ်ဒးဒုၚ်စသိုၚ်ညးတအ် ပ္ဍဲမဳဒဳယာဇာနှိက်ပရေမၞိဟ်ဂှ် ဒးဒုၚ်ကၟာတ်လဝ် နကဵုသေန်ဇြာရောၚ် ဂွံတီကေတ်လဝ်ရ။
ညးနွံတန်တဴဒၟံၚ် ပ္ဍဲယှာန်ဟိုၚ် (၂၅)ပြကောဋိကိုတ်ဂှ် ပ္ဍဲသၞာံဏံသ္ကုတ်ကၠာ ဒးဒုၚ်ဖျေံကၟာတ်လဝ် လံက်ဒေါၚ် ပွိုၚ်ၜါဂိတုတုဲဂှ် ညးပိုၚ်ပြဳအာဏာကြုက်တအ် သာတုဲပ္တိတ်ကၠုၚ်ဇြဟတ် ပရေၚ်ထိၚ်ဒဝ်စဵုဒၞာ ဂိုဝ်ဗေတ်ညးတအ်တုဲ ပ္ဍဲအခိၚ်ဒးဆေၚ်မုက်ကဵု ရာသဳမုဟ်ကျာ အလန်ပထမ ပ္ဍဲကဵုဍုၚ်ဂှ် ပရေၚ်ကၠောံထၞာန် ကရောံအိုဝ်မဳခရောန် ဂၠိုၚ်ဂၠေၚ်တိုန်ကၠုၚ်ဂှ်ရ ဒးဆေၚ်ဒၟံၚ်မုက်ကဵု တၚ်ကော်ချဴဂမၠိုၚ်ရ။
Ref: CN A