(သံတောၚ်) ၊ ဂျောန် (၈)
ဗ္ဒိုပ်ဒပ်ကံၚ်ဇြဳပၞာန် မၞုံပ္ဍဲ (၁၃) တိုၚ် ဗ္ဒါဲဍုၚ် (သံတောၚ်) တွဵုရးကရေၚ်ဂှ် ပ္ဍဲဂိတုဂျောန် (၇) ပယျာံဂယးဂှ် ဂကောံဒပ်စဵုဒၞါညးဒေသ (သံတောၚ်) တံ ဟိုတ်နူအာစိုပ်ပန်ပှော်လဝ်ကဵု သနိုက်ပါတုဲ သၞာဲဒဴကံၚ်ဇြဳပၞာန်မွဲတၠ ချိုတ်အာလဝ်ရဂှ် ဂကောံဒပ်စဵုဒၞါညးဍုၚ်ကွာန်(သံတောၚ်) လလောၚ်ပ္တိတ်လဝ်ရ။
ဗ္ဒိုပ်ဒပ်ကံၚ်ဇြဳပၞာန် မၞုံလ္တူဂၠံၚ် (သံတောၚ်−သံတောၚ်ကြဳး) ဍုၚ် (သံတောၚ်) ဂှ် ဂကောံဒပ်စဵုဒၞါညးဒေသ (သံတောၚ်) တံ အာစိုပ်ပန်ပှော်လဝ်ကဵု သနိုက်ပါတုဲ ဟိုတ်နူဒဒှ်မဗ္တိုက်ဂှ်တုဲ ပ္ဍဲပရေၚ်ချိုတ်ဂျိုၚ်ဂှ် ဒုသ္ကိုပ်တမ်ဒပ်ကံၚ်ဇြဳပၞာန် ဟွံသေၚ်မ္ဂး ဒုသ္ကိုပ်ဒပ်ပါ် ဒှ်မာန်ရောၚ် လလောၚ်ပ္တိတ်လဝ်ရ။
သၞာဲဒဴကံၚ်ဇြဳပၞာန် ဗွဲကြဴဒးသနိုက်ပါ ချိုတ်အာတုဲ ပ္ဍဲဂၠံၚ်လုပ်တိတ်ဍုၚ် (သံတောၚ်) ကဵု ကွာန်လ္ၚဵုတံဂှ် ကၟာတ်ဆိုအ်ဗစၟဳစၟတ်ဂၠိုက်ဂၠါဲလဝ် ကုညးဍုၚ်ကွာန် အာကၠုၚ်တံတုဲ သီုကဵုကၠောန်ၜိုတ်လဝ် ပွမၜုၚ်တက်စၟဳစၟတ်တံရောၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အခါလၟုဟ်ဂှ် ဒပ်ကံၚ်ဇြဳပၞာန်ဝွံ လ္တူဍုၚ်ကဵု အပ္ဍဲကွာန်ဗ္ဒါဲဗ္ဒါဲတံဂှ် ပွမဂေတ်စၟဳစၟတ်တံ၊ ပွမဖံက်ပန်သေနာတ်တံ ဟိုတ်နူကၠောန်ၜိုတ်ဒၟံၚ်ဂှ်ရ နကဵုညးဍုၚ်ကွာန်ဒေသတံ သွက်ဂွံစွံသတိ မံၚ်စံၚ်အာအိုတ်ဂှ် ဂကောံဒပ်စဵုဒၞါညးဍုၚ်ကွာန်(သံတောၚ်) လလောၚ်ပ္တိတ်လဝ်ရ။
အပ္ဍဲတိဍာ်ထိၚ်ဒဝ် တမ်ဒပ် (၄) KNDO ဒပ်မဟာ(၂) ခရိုၚ်တံၚ်ဥူ KNU ဂှ် တုဲကၠုၚ် ပ္ဍဲဂိတုမေ ဂှ် ဟိုတ်နူလ္ပာ်ဂကောံပံၚ်ကောံ KNLA တံ အာစိုပ်ဗ္တိုက်ပန်ပှော်လဝ် ကုဗ္ဒိုပ်ဒပ်ကံၚ်ဇြဳပၞာန်တံတုဲ လ္ပာ်ကံၚ်ဇြဳပၞာန် (၁၆) တၠ ချိုတ်အာတုဲ (၄) တၠ ဂွံဝပ်ဇီုကပိုက်လဝ်ဂှ် KNU လလောၚ်ပ္တိတ်လဝ်ရ။
ပ္ဍဲတိဍာ်ထိၚ်ဒဝ် ဒပ်မဟာ(၂) ဂှ် ဒပ်ကံၚ်ဇြဳပၞာန် လောန်ၜက်နူတိဍာ်တုဲ ဟိုတ်နူကၠောန်ၜိုတ်ဒၟံၚ် ပွမချဳဒရာၚ် ပရေၚ်ပၞာန်တံဂှ်ရ က္တဵုဒှ်ဒၟံၚ် ပေါဲဗ္တိုက်ဇီုမုက်ကဵု ဂကောံဒပ်ပံၚ်ကောံ ဒပ်မဟာ(၂) KNLA မွဲဏှမွဲဏှ နွံဒၟံၚ်ဂှ် သ္ကိုပ်ဒပ်မဟာ ဒပ်မဟာ (၂) KNLA ဟီုဂးလဝ်ရ။ ပရိုၚ်−သြၚ်လောန်တိုၚ်(မ်)