မတ်မလီု၊ ဂျောန် (၈)
သၟာဗ္ၚတဵုသြောံ နူအပ္ဍဲတွဵုရးဍုၚ်မန်တံဝွံ ပ္ဍဲရာသဳသြောံကသီုသၞာံဏံ အခိၚ်ဒပ်ပၞာန်သီလဝ်အဝဵုဂှ် ဟိုတ်နူစုတ်ဝါဲ ဍိုက်က်ပေၚ်ၚ် ဟွံမာန်ဂှ်ရ သြောံတိတ်အောန်စှ်ေအာဂှ် ဂွိၚ်ဂွါဲဒၟံၚ်အိုတ်ရ။
ကပေါတ်တမ်ရိုဟ် သွက်ဂွံစကာပ္ဍဲပရေၚ်တဵုလွဳ မပ္တံ ဝါဲဓာတ် မပါလုပ် ကပေါတ်ဆက်စပ်အိုဿီုတံဝွံ အပ္ဍဲကာလပၞာန်သီအဝဵု ပွိုၚ်မွဲသၞာံပြၚ်ဂှ် ဟိုတ်နူၚုဟ်သၠုၚ်တိုန်ကၠုၚ် မွဲဆမွဲတာန်ဂှ်ရ သၟာဗ္ၚတဵုသြောံတံဝွံ ဒးဒုၚ်ဒၟံၚ်ဘဲဒဏ် ပၞာန်သီအဝဵု ဇၞော်ကဵုဇြဟတ်ရ။
ၚုဟ်ဝါဲဓာတ် ကပေါတ်တမ်ရိုဟ် စကာပရေၚ်တဵုလွဳ ကၠာတေံဂှ်ဝွံ တန်တဴကဵု ဂကူအဇာတံတုဲ မွဲရိုက်မ္ဂး နူကဵု (၂၀၀၀၀) ဒ္ကေဝ် စဵုကဵုပွဳပွူ (၃၀၀၀၀) ဒ္ကေဝ်ဓဝ် နွံကၠုၚ်လဝ်ဂှ် ဗွဲကြဴဒပ်ပၞာန်သီအဝဵုတုဲ မွဲရိုက် နူကဵု (၈၀၀၀၀) ဒ္ကေဝ် စဵုကဵု ဗ္ဒါဲ မွဲကိုဋ်ဒ္ကေဝ် ၚုဟ်သၠုၚ်တိုန်ကၠုၚ်ရ။
အခါလၟုဟ် ပ္ဍဲအရာတဵုပၠောမ်သြောံတံဂှ် ဟိုတ်နူခရိတ်အိုတ်ဇဳဒိုဟ် သၠုၚ်တိုန်ကၠုၚ်ဒၟံၚ်အိုတ်ဂှ်ရ ဒးဖအောန်စကာဒၟံၚ် ကပေါတ်ဇြဟတ်ပၠောပ်တံတုဲ ကၠုၚ်စိုပ်ပ္ဍဲရာသဳသြောံတိတ်ဏံ ဒမြိပ်တိတ်အောန်စှ်ေကၠုၚ်ဂှ် ဒးဂွိၚ်ဒၟံၚ်အိုတ်ရ သာ်ဝွံ သၟာဗ္ၚမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဟွံဒှ် ညံၚ်ဂွံဒှ်ဂှ် ဒးကၠောန်ဒၟံၚ်ရ၊ လက္ကရဴဂွံဏောၚ် ဟီုဂှ်လေဝ် ဟွံစၟဳစရပုဟ်၊ ၚုဟ်ဝါဲဂှ် က္ဍၚ်တုဲ ဟွံရာန်သုၚ်စောဲရပုဟ်၊ ၜိုတ်သ္ပမာန် ဝါဲဂှ် ဖအောန်ဖျေံထောံတုဲ ဒမြိပ်တိတ် အောန်စှ်ေအာ နူကဵုကၠာတေံရ” သာ်ဝွံ သၟာဗ္ၚမွဲတၠ ဟီုရ။
ကပေါတ်ဗၞိက်ဇြဟတ်ပၠောပ်တမ်ရိုဟ်ဂမၠိုၚ်ဝွံ ဗွဲကြဴဒပ်ပၞာန်သီအဝဵုတုဲ ဟိုတ်နူၚုဟ်မးသြန်ဗၟာ စှ်ေကၠုၚ်ဒၟံၚ် အဆက်က်ကဵု ခရိတ်ပရေၚ်ပလံၚ်ဗစိုပ်တံ ဇၞော်သၠုၚ်ဒၟံၚ်ဂှ်ရ ၚုဟ်နှေန်တံ သၠုၚ်တိုန်ဒၟံၚ် အဆက်က်ရ။
သၟာဝါဗ္ၚတံဝွံ သၞာံတုဲကၠုၚ်တေံ ၚုဟ်လိၚ် မၞိဟ်ပတမ်မ ကဵု မၞိဟ်ပိုက်မ မွဲတ္ၚဲဂှ် ဒးကဵုလဝ် နူကဵု (၅၅၀၀) ဒ္ကေဝ် စဵုကဵု (၆၀၀၀) ဒ္ကေဝ်ဓဝ်တုဲ သၞာံဏံဂှ် ဟိုတ်နူဒးကဵုကၠုၚ် နူကဵု (၈၀၀၀) ဒ္ကေဝ် စဵုကဵု မွဲဠက်ဒ္ကေတ်ဂှ်ရ သာတုဲ ဒးဂဗကၠုၚ်ဒဒိုက်အိုတ်ရ။
မွဲကရောံ ၚုဟ်လိၚ်ခၟာၚ်တံ က္ဍၚ်တိုန်ကၠုၚ်ဂှ် ဟိုတ်နူသၟာကမၠောန်တံလေဝ် အောန်စှ်ေကၠုၚ်တုဲ ပ္ဍဲရာသဳဏံ စၞးဒးပတမ်ကေတ်ဂှ် ဂြာတ်ကေတ်မဟရာတ်ရဏောၚ် သာ်ဝွံ သၟာဗ္ၚမွဲတၠ သ္ဂးရ။
“ ဂြာတ်ကေတ် မဟရာတ်ဂှ်တှ်ေ ၜိုတ်ပတမ်ကေတ်ဂှ် ဒမြိပ်တိတ်ဍေံ ဟွံချိုတ်ပၠိုတ်ပုဟ်၊ ၚုဟ်က္ဍၚ်တိုန်ကၠုၚ်တုဲ ဝါဲဂှ် ၜိုတ်နွံပၟိက် ဂြာတ်ပက်ကဵု ဟွံမာန်ဂှ်ရ ဂြာတ်ကေတ်မဟရာတ်လေဝ် ဒမြိပ်သြောံတိတ်ဂှ် ယအ်၊ ပတမ်ကေတ်လေဝ် ယအ်၊ ၜိုတ်နွံပၟိက် ကလေၚ်ဂြာတ်ကဵုပၠန်လေဝ် ၚုဟ်ဝါဲကဵု ဒမြိပ်သြောံ မတိတ်ကၠုၚ်တေံဂှ် ကဵုအကာဲအရာၚုဟ်သြောံဂှ်တှ်ေ ပရဲပရာဟွံမွဲရ” သာ်ဝွံ သၟာဗ္ၚမွဲတၠ ဟီုရ။
သၟာဗ္ၚတံဝွံ ခရိတ်ဝါဲဇြဟတ်ပၠောပ် မစကာပ္ဍဲပရေၚ်တဵုလွဳတံ မပါလုပ် သီုခရိတ်အိုတ်နာနာ ဇၞော်သၠုၚ်ဒၟံၚ်သၟးဟွံက မွဲလ္ပာ်ပၠန်ဂှ် သီုကဵု ဒးဆေၚ်ဒၟံၚ်မုက်ကဵု ဘဲဒဏ် ၚုဟ်ကၠေၚ်စက်ဇၞော်သၠုၚ်တံရ။
ပ္ဍဲတွဵုရးဍုၚ်မန်ဂှ် သီု(၁၀) ပွိုၚ်ဍုၚ် တဵုလွဳဒၟံၚ် သြောံကသီုတုဲ လၟေၚ်သၞာံ တိဨက မတဵုပၠောမ် သြောံကသီုဂှ် (၆) ကိုဋ်ပြၚ် တဵုလွဳဒၟံၚ်ရ။
သၟာဗ္ၚတံဝွံ ပ္ဍဲရာသဳတဵုပၠောမ်သြောံကသီု သၞာံတုဲကၠုၚ်တေံဂှ် ဟိုတ်နူဘဲသဘာဝ ကေုာံ စၟစၟန်တံ စှ်ေလဝ်တုဲ ဒမြိပ်သြောံကသီုတိတ် အောန်စှ်ေလဝ်ကီု သီုကဵု ခရိတ်အိုတ်ကပေါတ်ဇြဟတ်ပၠောပ်တံ ဇၞော်သၠုၚ်ဒၟံၚ်ဂှ်ရ ဒးဆေၚ်ဒၟံၚ်မုက်ကဵု ပွမကျဟောံဗြံတံရ။
ပရိုၚ်−သြၚ်လောန်တိုၚ်(မ်)