ဒဳမအ်သိုဝ် – ဒဳဇြေန်ဗာ(၁၈)
တွဵုရးဍုၚ်ကယာ ပ္ဍဲဍုၚ်ဒဳမအ်သိုဝ်ဂှ် ပ္ဍဲကဵုကွာန်မပ္တမ်ကဵု တေဇြူဠေဝ်၊ ကုမ်တာ၊ ဒဝ်ၚာန်ခါတအ်ဂှ် တုဲကၠုၚ်မွဲၜါတ္ၚဲဏံ ကံၚ်ဇြဳပၞာန် ထပ်ဗပေၚ်လဝ်ဇြဟတ်ၜိုတ် (၁၅၀)ပြၚ်ရဂှ် တမ်ရိုဟ်တၚ်ဂၞၚ်ပရိုၚ်ဂမၠိုၚ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။
ကံၚ်ဇြဳပၞာန်ဂှ် ပ္ဍဲဒၞာဲဇြဟတ်နွံၜိုတ်(၉၀)တၠဂှ် ထပ်ဗပေၚ်လဝ်ဇြဟတ်တုဲ ကၠောန်သ္ပ ပလေဝ်ပလေတ်ဒၟံၚ် သွက်ပေါဲဗတိုက်ရဂှ် ဂွံတီကေတ်လဝ်ရ။
အခိၚ်လၟုဟ်ဏံမ္ဂး ကံၚ်ဇြဳပၞာန်ဂှ် ကၠောန်သ္ပဒၟံၚ် ပွဗပေၚ်ဇြဟတ်ကီု အရိုဟ်ဒဒှ်ဗ္တံ ထံက်ဒၟံၚ်ကၚ် နကဵုက္ၜၚ်ကျာထံက်ကၚ်ဂှ်ရ ပ္ဍဲအကြာမွဲၜါတ္ၚဲဏံ စွံလဝ်သတိတုဲ လးလဝ်ဒပ်ရဂှ် ညးမၞုံတာလျိုၚ် ဒပ်ပံၚ်ကောံ ပရေၚ်ပၠန်ဂတးကရေၚ်ဍာဲ KRU ကိုဝ်လေန်လေန်ဂှ် ဟီုသ္ဂးလဝ်ရ။
“ဍေံတအ် ထပ်ဗပေၚ်လဝ် ဇြဟတ်ရ၊ တိဍာ်ဂှ်တှ်ေ အတိုၚ်ပကတိတေံဂှ်ရ။ ဍေံတအ်ဂှ် အတိုၚ်ဒၞာဲတြေံ အောပ်မၚ်ဒၟံၚ်ကၚ်ဂှ်ရ။ ဆဂးဂှ် ဂုဏ်နူထပ်ဗပေၚ်ကၠုၚ်လဝ်ဇြဟတ်ဂှ် ရ လပါ်ပိုဲဂှ် သာတုဲ ဒးမံၚ်ဒၟံၚ်ကဵုသတိရ။ အခိၚ်အရှိုဏ်တိုန်၊ အခိၚ်သ္ဂာဗ္တံတအ် ဖေက်လုပ်စိုပ်ကၠုၚ်တုဲ သာတုဲ ဒးသ္ပသတိရ။ နူကဵုဍာန်ကျာဂှ်တှ်ေ ထံက်ဒၟံၚ်ပရိုၚ် အရိုဟ်တ္ၚဲရ။ ဇိုၚ်သဝ်ၜိုတ် (၅)နာဍဳတှ်ေ ဒရုမ်စတိုန်ကၠုၚ်ရ။ နူလ္ပာ်ဍေံတအ်ဂှ် ဒရုမ်တအ်ပဝ်လအ်ဒၟံၚ်ရ။ ပဝ်ဒၟံၚ် ဒဵုကဵုအခိၚ်နူဂယးၜိုတ် ၅ နာဍဳ ၆နာဍဳ ပဝ်ဒၟံၚ်ရ။ သီုကဵုက္ၜၚ်ကျာထံက်ကၚ်ရ” ဂှ် ညးဟီုသ္ဂးလဝ်ရ။
သ္အာၚ်နူဂှ်ပၠန် ပ္ဍဲကဵုပွိုၚ်ဍုၚ်ဒဳမအ်သိုဝ်ဂှ် အကြာဒပ်ကံၚ်ဇြဳပၞာန်ကဵု ဒပ်ပရေၚ်စဵုဒၞာဂမၠိုၚ် ၜိုန်ရပေါဲဗတိုက် က္တဵုဒှ်ကၠုၚ်လဝ် ဟၟဲကီုလေဝ် ဟိုတ်နူအကာဲအရာပၞာန် ကြံၚ်မ္ၚိုဟ်သ္ကာတ်မြဟ်ဒၟံၚ်တုဲ အခိၚ်ဟွံရုဲ ပေါဲဗတိုက်က္တဵုဒှ်ကၠုၚ်မာန်ရဂှ် ညးဟီုသ္ဂးလဝ်ရ။
တုဲကၠုၚ် ပ္ဍဲဂိတုဒဳဇြေန်ဗာ စၟတ်တ္ၚဲ(၁၃)ဂှ် ပ္ဍဲပွိုၚ်ဍုၚ်ဒဳမအ်သိုဝ် ဒပ်ကံၚ်ဇြဳပၞာန်ထ္ပက်ကၠုၚ်ကရောၚ်ပၞာန် လ္ပာ်ကွာန်သာန်ပျ (၆)မာၚ်ကဵု ကွာန်ဗေတ်တလုၚ် ကေုာံဒပ်ပရေၚ်စဵုဒၞာတအ် က္တဵုဒှ်လဝ်ပေါဲဗတိုက်တုဲ လပါ်ကံၚ်ဇြဳပၞာန် ဇီုကပိုက်ဒးလဝ်ဝပ် ၜိုတ် (၃၀) တၠနွံလဝ်ရဂှ် KNDF လလောၚ်တြးပ္တိတ်လဝ်ပရိုၚ်ရ။
ဒပ်ကံၚ်ဇြဳပၞာန် ဒးဂိလဝ် ပ္ဍဲကဵုပေါဲဗတိုက်ဂှ် လုပ်စိုပ် ထကဵုဂၟာဲ ကွာန်တလုၚ်ကဵု ကွာန်ဝါမ်လထွာတုဲ စံၚ်ပလီုပလာ်လဝ်ကီု သီုကဵုဗက်ပန်ဒၟံၚ်ပြးဂှ်ရ လွဟ်ဇၞော် ပြဟ်ဒတုံစှ်ေလဝ် ပ္ဍဲကွာန်ဒဝ်သေဝ် (၃) မတုဲ ခတိုဟ်လဝ်ဂှ်ရ ကောန်ညးအရာပ် (၁) တၠ ဒးချိုတ်အာလဝ်ရ။
ကြဴနူဒပ်ပၞာန်သီအဝဵုတုဲ ညးဒေသဂမၠိုၚ် ဟိုတ်နူဒးဒုၚ်ဒၟံၚ် ပရေၚ်ရပ်ဒက်ပျဲပျာံ၊ ဒးဒုၚ်ဖံက်ပ္ကဝ်ဒၟံၚ် အခေါၚ်အရာမၞိဟ် နွံကၠုၚ်ဒၟံၚ်ဂှ်ရ ဒးပါဲဒဴဒၟံၚ်ဘဲပၞာန်ကီု သီုကဵုဒုၚ်ကေတ်ဒၟံၚ် ပရေၚ်မၚ်မွဲ နူဂကောံဒပ်ပရေၚ်စဵုဒၞာဒေသဂမၠိုၚ်တအ်ရ။
ပ္ဍဲတွဵုရးဍုၚ်ကယာဂှ် ညးပါဲဒဴဘဲပၞာန်ဗ္ဒာဲ(၂)ကိုတ်မၞုံဒၟံၚ်တုဲ ညးတအ်ဂှ် ဟိုတ်နူ လုပ်စိုပ်ကၠုၚ်ရာသဳမုဟ်ကျာဂှ်ရ နွံပၟိက်ဒၟံၚ်ကဵု ယာတ်နဒဒှ်ကာတၟေၚ် ကေုာံအရီုဗၚ်ဆေၚ်ကဵုထံက်ပၚ်ပရေၚ်မၞိဟ်ရဂှ် ဂွံတီကေတ်လဝ်ရ။
ပရိုၚ် – သြၚ်လောန်တိုၚ်(မ်)