မတ်မလီု၊ ဒဳဇြေမ်ဗာ (၁၉)
ပ္ဍဲဍုၚ်မတ်မလီု၊ တွဵုရးဍုၚ်မန်ဂှ် ကိုန်စဳမာန်ပံက်ပယျး (အလင်းဖွင့်) ဂးတုဲ စမြိုၚ်၊ ဂတဵုမုက်၊ ကၟဳသ္ၚိတသောဝ်စှ်ေဒၟံၚ် လ္ပာ်ဂၠံၚ်ဂမၠိုၚ် ကေုာံ ကပေါတ်ဗ္ဒမ်ဖျာ မၜက်ဒၟံၚ် လ္ပာ်ဂၠံၚ်တံကဵု လ္တူဍာန်မၞိဟ်ကွာ်တံဂှ် အပ္ဍဲပွိုၚ်ပိတ္ၚဲ သွက်ဂွံပါဲကဵုဂှ် ကံၚ်ဇြဳပၞာန် ပ္တိတ်လဝ်အမိၚ်ရောၚ် ညးလ္တူဍုၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံပရေၚ်ဂဵုလဟဵု ကံၚ်ဇြဳပၞာန်ဂှ် နူကဵုဂိတုဒဳဇြေမ်ဗာ (၁၅) စဵုကဵု ဒဳဇြေမ်ဗာ (၁၇) ဂှ် စွံလက္ကရဴအိုတ်တုဲ သွက်ဂွံၚးတးပါဲကဵုဒတုဲ ကုစမြိုၚ်ဂမၠိုၚ် မၜက်ၜေတ်ဒၟံၚ် လ္တူဂၠံၚ် ကေုာံ လ္တူဍာန်မၞိဟ်ကွာ်တံဂှ် ပ္တိတ်လဝ်အမိၚ်ရ။
ယဝ်ရဟွံၚးတးပါဲထောံဒတုဲမွဲသာ် တာလျိုၚ်လီုအာမ္ဂး ဗွဲမဗဗွဲကဵုသၞောဝ် ဆက်ကေတ်အာအရေဝ်ရောၚ်ဂှ် ဂကောံပရေၚ်ဂဵုလဟဵု ကံၚ်ဇြဳပၞာန် ဘပဠလဝ်ရ။
ညးလ္တူဍုၚ်တံဂှ် လ္ပာ်ကံၚ်ဇြဳပၞာန် ဟိုတ်နူကဵုကၠုၚ်ဇြဟတ်ဂရိုဟ် သွက်ဂွံပါဲကဵု အပ္ဍဲအခိၚ်မဍန်ဂၠေံတံဂှ်ရ ဒးဆေၚ်ဒၟံၚ်မုက်ကဵု အခက်အခုဲနာနာသာ်တုဲ ပွမဆောံလေၚ်ဇီုကပိုက်တံလေဝ် နွံဒၟံၚ်ဂှ် ဟီုရ။
မွဲလ္ပာ်ပၠန်ဂှ် ဂကောံပရေၚ်ဂဵုလဟဵု ကံၚ်ဇြဳပၞာန်ဝွံ လ္ဂောံကဵုကိုန်စဳမာန်ပံက်ပယျးဂးတုဲ ထဗာၚ်ပသောၚ်ထောံဒၟံၚ် တၞံဆုဇၞော်၊ တၞံဆုဍောတ် သၞိၚ်မစှ်ေဒၟံၚ် အပ္ဍဲဂၠံၚ်တံဟွံကဵုသှ်ေတုဲ သီုကဵုၚးတးပသောၚ်ထောံဒၟံၚ် ကၞာၚ်ဗာၚ်တံကီုဂှ် ကၠောန်ၜိုတ်ဒၟံၚ်ရ။
ကံၚ်ဇြဳပၞာန်ဂှ် အဃောမၚးတးပသောၚ်ဒၟံၚ် တၞံဆုကၞာၚ်ဗာၚ် မစှ်ေဒၟံၚ်လ္ပာ်ဂၠံၚ်တံဂှ် သီုကဵုထပိုတ်ဒၟံၚ် ဇုက်ပၟတ်ဓာတ်လလဳတံကဵု ဇုက် Wifi အေန်တာနိတ်တံလေဝ် နွံဒၟံၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)