ဝဝ်လေ၊ ဂျောန် ၄
အပ္ဍဲပေါဲဗ္တိုက်သီဗ္ဒိုပ် (သေဘောဘိုး) နွံပ္ဍဲဒေသဝဝ်လေ တွဵုရးကရေၚ်ဂှ် ဒပ်ကံၚ်ဇြဳပၞာန် ပန်ပှော်ထောံမံၚ်မခတိုဟ် နကဵုက္ၜၚ်ကျာ ဇၞော်ကဵုဇြဟတ်တုဲ ဟိုတ်နူပေါဲဗ္တိုက်တုဲ ညးဍုၚ်ကွာန်ဒေသ လၟိဟ်ဒးဂြိပ်ကၠုၚ် လ္ပာ်ဍုၚ်သေံဂှ် ၅၀၀ တၠပြၚ် နွံကၠုၚ်ယျရောၚ် တမ်ရိုဟ်ပရိုၚ်ပယျဵုဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဂျောန် ၃ အခိၚ်နနူဂယးပြဟ်ဂှ်တုဲ ဗ္ဒိုပ်ဒပ်ကံၚ်ဇြဳပၞာန် နွံအပ္ဍဲကွာန်(သေဘောဘိုး) လ္တူဂၠံၚ်ဇၞော် ဗြဝတဳ−ဝဝ်လေ သ္ကုတ်သၠုၚ်ကျာ ဍုၚ်ဗြဝတဳဂှ် ဂကောံဇြဟတ်ပၠန်ဂတး သၟဝ်က္ဍိုက်ပ် ဒပ်မဟာ ၆ ဒပ်ပၞာန်ဗၠးၜးကောန်ဂကူကရေၚ် KNLA တအ် ဆက်ထ္ပက်ဒၟံၚ်ပၞာန်ရ။
ဇြဟတ်ပၠန်ဂတး ဒပ်မဟာ ၆ KNLA ထ္ပက်ပၞာန်ဗ္တိုက်ဒၟံၚ် ဗ္ဒိုပ်(သေဘောဘိုး) ဒပ်ကံၚ်ဇြဳပၞာန်တုဲ ဂိတုဂျောန် ၃ ကၠိုဟ်တ္ၚဲဂှ် ပေါဲဗ္တိုက်ဒှ်လဝ် ဗွဲမသ္ကာတ်မြဟ်တုဲ ညံၚ်ဗ္ဒိုပ်ဟွံဂွံစှ်ေအာဂှ် ဒပ်ကံၚ်ဇြဳပၞာန် ထောံမခတိုဟ်ဗ္တိုက်ဒၟံၚ် နကဵုက္ၜၚ်ကျာ ဗွဲမသ္ကာတ်မြဟ်ရောၚ် တမ်ရိုဟ်ပရိုၚ်ပယျဵုဂမၠိုၚ် သ္ဂးရ။
လ္ပာ်ဒပ်ကံၚ်ဇြဳပၞာန် ထောံမခတိုဟ် ဗ္တိုက်ဒၟံၚ် ကုက္ၜၚ်ကျာ ဟွံပိုတ်သ္ကုတ်တုဲ ဒပ်ပၞာန်သေံလေဝ် ဗလးဏာက္ၜၚ်ကျာဗ္တိုက်တုဲ ဂေတ်ကၚ်မၚ်ရံၚ်ဒၟံၚ်တုဲ ပတေၚ်ဂြတ်လဝ် ဂီုကၠီုပယျဵုရောၚ် သ္ဂးရ။
ဟိုတ်နူပေါဲဗ္တိုက်သီဗ္ဒိုပ် (သေဘောဘိုး) ဗ္ဒါဲပယျဵုသေံဂှ်တုဲ ညးဍုၚ်ကွာန်ဒေသ ၅၀၀ ပြၚ် ပါလုပ်သီုကဵုကွာန်(သေဘောဘိုး) ကေုာံ ကွာန်ဗ္ဒါဲဗ္ဒါဲတံဂှ်ဝွံ စိုပ်ကၠုၚ်ပ္ဍဲဍုၚ်သေံ ခရိုၚ်တက် ပွိုၚ်ဍုၚ်ဖုတ်ဖ ပန်ဒၞါဲတုဲ သၟိၚ်တၠအဝဵုသေံတအ် ဒုၚ်တဲမၚ်မွဲကဵုလဝ်ရောၚ် ထ္မံက်ထ္ၜးလဝ် ပ္ဍဲပရိုၚ်သေံရ။
ဗ္ဒိုပ်ဒပ်ကံၚ်ဇြဳပၞာန် နွံဒၟံၚ်ဗ္ဒါဲပယျဵုသေံ မပ္တံကဵု (ဘလယ်ဒို၊ ကနဲလေး၊ မော်ခီး) ပါလုပ်သီုကဵုဗ္ဒိုပ်(သေဘောဘိုး) နူဒေသဝဝ်လေဂှ် စနူဂိတုမေ ၂၁ တုဲ ဂကောံဇြဟတ်ပၠန်ဂတး သၟဝ်သ္ကိုပ်သ္က ဒပ်မဟာ ၆ KNLA တအ် ဗ္တိုက်ဒၟံၚ်ရ။
အခိၚ်လၟုဟ် ဂကောံဇြဟတ်ပၠန်ဂတး သၟဝ်သ္ကိုပ်သ္က ဒပ်မဟာ ၆ KNLA တအ် သီဂွံလဝ် ဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်(ဘလယ်ဒို၊ ကနဲလေး၊ မော်ခီး၊ ရွှေအေးမြိုၚ်၊ ဘုရင့်နောင်) တံဂှ်တုဲ ဗ္ဒိုပ်သှ်ေဒၟံၚ်တအ်ဂှ် ဆက်ထ္ပက်ပၞာန် ဗ္တိုက်ဒၟံၚ်ရ။
ဒပ်ပံၚ်ကောံ ဒပ်မဟာ ၆ KNLA သီဂွံဗ္ဒိုပ်(ဘလယ်ဒို) တုဲ ဆက်ဗ္တိုက်ဗ္ဒိုပ်(သေဘောဘိုး) ဂှ် ညံၚ်ဗ္ဒိုပ်(သေဘောဘိုး) ဟွံဂွံစှ်ေအာ ဒပ်ကံၚ်ဇြဳပၞာန် ပလံၚ်ကဵုပၞာန်အရီု နူဗျူဟာဝဝ်လေ နူကဵုဗလးတိမွဲကဆံၚ်တုဲ အလုံကရောၚ်ပၞာန်မွဲ ဒးဒုၚ်ဗ္တိုက်လဝ်ရ။
ဗ္ဒိုပ်ဒပ်ကံၚ်ဇြဳပၞာန် ဗျူဟာဝဝ်လေ မပါလုပ် ဗ္ဒိုပ် (ထီးကပလယ်၊ သေဘောဘိုး၊ ဥကရစ်ထ) တံ သှ်ေဒၟံၚ်ဏီတုဲ နူကဵုဗ္ဒိုပ်တံဏံဂှ် ကဵုကၠုၚ်အရီုဗၚ် နူကဵုဗလးတိဏံ ဟွံမာန်ရတုဲ ဒပ်ကံၚ်ဇြဳပၞာန် ဒးသ္ပပဓာန်သုၚ်စောဲဒၟံၚ် ပၞာန်ကျာသၟးရတုဲ ဆက်ဒးတဝ်စၞေဟ် ဗ္တိုက်ဒၟံၚ်ဖိုဟ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− CJ