မတ်မလီု၊ ဂျောန် ၄
ၚုဟ်ထဝ်မဳဠေန် ထဝ်ဒကောၚ်အပ္ဍဲဍုၚ်ဝွံ ပ္ဍဲဂိတုဂျောန်မံက်ဏံ မွဲဒ္ကေဝ် ၚုဟ်သၠုၚ်တိုန်ကၠုၚ် စဵုကဵု ၇၈ ကိုဋ်ဒ္ကေဝ်ရောၚ် တၠကမၠောန်ထဝ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ထဝ်အပ္ဍဲဍုၚ်ဝွံ ပ္ဍဲဂိတုဂျောန် ၃ ဂှ် မွဲဒ္ကေဝ်မ္ဂး ၚုဟ်သၠုၚ်တိုန်ကၠုၚ် စဵုကဵုပွဳပွူ ၇၈ ကိုဋ်ဒ္ကေဝ်တုဲ ယဝ်ဒးၜတ်ကၞာတ်ကဵု ၚုဟ်ထဝ်စၞောန် ကံၚ်ဇြဳပၞာန် မခုတ်ပ္တန်လဝ်ဂှ်မ္ဂး မွဲဒ္ကေဝ်ဂှ် ၚုဟ်ဍေံ တၞဟ်ခြာဒၟံၚ် ပွဳပွူ ၂၀ ကိုဋ်ဒ္ကေဝ်ရ။
ၚုဟ်ထဝ်အပ္ဍဲဍုၚ်ဝွံ အကြာၚုဟ်ထဝ်ဂၠးတိ သၠုၚ်တိုန်ကၠုၚ်ဂှ် တၠကမၠောန်လ္ၚဵုတံ ဟိုတ်နူတံၚ်ပ္တိုန်ၚုဟ်တုဲ ဍေံဆက်သၠုၚ်တိုန်ကၠုၚ်ဒၟံၚ်ဂှ် တၠကမၠောန်ထဝ်မွဲတၠ ဟီုရ။
“အကာဲအရာ ၚုဟ်ထဝ် ထပ်တိုန်ကၠုၚ်ဂှ်တှ်ေ ဟွံဆေၚ်စပ်ကဵုပရေၚ်ဍုၚ်ကွာန်တုဲ တၠကမၠောန်လ္ၚဵုဂှ် ဖေက်ၚုဟ်ထဝ်စှ်ေအာကွေံကွေံဏောၚ်။ မူဟိုတ်ရောတှ်ေ တၠကမၠောန်လ္ၚဵုတံဂှ် ဖေက်ဒးမှာရာတုဲ တံၚ်ပ္တိုန်ၚုဟ်ဂှ်လေဝ် ပါမံၚ်ကီုရ။ မွဲပၠန်ဂှ် ဟိုတ်နူၚုဟ်ထဝ်ဂၠးတိတုဲလေဝ် ပါရ” သာ်ဝွံ သ္ဂးရ။
ၚုဟ်ထဝ်ဂၠးတိဝွံ ပ္ဍဲဂိတုမေ သတ္တာဟလက္ကရဴအိုတ်တုဲကၠုၚ်တေံ ထဝ်မွဲအံက်သ နူကဵုၚုဟ်မၞုံ ၃၂၈၀ ဒဝ်ဠာအမေရိကာန်ဂှ် ပ္ဍဲဂိတုမေ ၃ တေံ ၚုဟ်သၠုၚ်တိုန်ကၠုၚ်လဝ် စဵုကဵုဗ္ဒါဲ ၃၃၆၀ ဒဝ်ဠာရ။
ပေါဲရုဲမာဲကီု ဟိုတ်နူအကာဲအရာပရေၚ်ဍုၚ်ကွာန်တုဲ ၚုဟ်ထဝ်အပ္ဍဲဍုၚ် အခိၚ်ဒှ်ဒၟံၚ်တိုန်စှ်ေ ဟွံညိၚ်ဒၟံၚ်ဂှ် နကဵုညးဍုၚ်ကွာန်ဂမၠိုၚ် ဟွံမွဲပၟိက်မွဲသာ် ယဝ်ရာန်မ္ဂး ပရေၚ်ဆောံလေၚ် နွံကၠုၚ်မာန်ရောၚ် တၠကမၠောန်ထဝ်ဂမၠိုၚ် ကဵုလဝ်သတိရ။
ပ္ဍဲဗွဝ်ဖျာထဝ်ဂှ်တှ်ေ ဟိုတ်နူၚုဟ်ထဝ်အပ္ဍဲဍုၚ် ထပ်သၠုၚ်တိုန်ကၠုၚ်ဂှ်တုဲ လ္တူနူဇြဟတ်ရာန်ဂှ် ဇြဟတ်သွံဏောၚ် ဂၠိုၚ်ဒၟံၚ်တုဲ နကဵုဆေၚ်ထဝ်ဂမၠိုၚ် ခြာကၠေံၚုဟ် မွဲဒ္ကေဝ် ဗ္ဒါဲ ၅ ဠက်တုဲ ရာန်ကေတ်ဒၟံၚ်နွံရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− CJ