တၚ်ဆက်စၠောံသၟာန်သွဟ်လဝ်ကဵု ညးအုပ်ကာနာနာ ဗော်ဒဳမဝ်ကရေဇြဳကောန်ဂကူသေံ (SNLD) သိုၚ်လုက်။
ပ္ဍဲကာလပၞာန်သီအဝဵု ဗ္ဒာဲကရပ် ၂ သၞာံဂှ် ပ္ဍဲကၟိန်ဍုၚ်ဗၟာ ကဏ္ဍနာနာ ဟုတ်ယုတ်စှ်ေဒၟံၚ်တုဲ ပ္ဍဲအကာဲအရာ စိုတ်ဓာတ်ကာယ ညးဍုၚ်ကွာန် တၠဆန္ဒမာဲစိုပ်ဒၟံၚ်ဒဒိုက်ဂှ် ကံၚ်ဇြဳပၞာန် သုၚ်စောဲသၞောတ် (PR)သ္ပစၞးဗ္ၜတ်စှ်ေစှ်ေတုဲ သွက်ဂွံကၠောန်ဗဒှ် ပေါဲရုဲမာဲဂှ် ဂစာန်လွဳပရာကၠုၚ်ရ။ ဟိုတ်ဂှ်ရ ပ္ဍဲလတူပေါဲရုဲမာဲ ကံၚ်ဇြဳပၞာန်ကၠောန်ဗဒှ်ဂှ် သာ်လဵုညာတ်ကေတ်ရော။ ပ္ဍဲအခိၚ် ပဋိပက္ခပရေၚ်ပၞာန် သ္ကာတ်မြဟ်ကြံၚ်မ္ၚိုဟ်ဒၟံၚ်ဂှ် ယဝ်ရကၠောန်ဗဒှ်ပေါဲရုမာဲမ္ဂး အကာဲအရာဗီုလဵု က္တဵုဒှ်ကၠုၚ်မာန်ရော။ ပ္ဍဲလတူသၞောတ် PR ကံၚ်ဇြဳပၞာန်ဂှ် လစွံစိုတ်ဗီုပြၚ်လဵု နွံရော။ စပ်ကဵု အကာဲအရာဏံတုဲ သၟာန်သွဟ်လဝ်ကဵု ညးအုပ်ကာနာနာ ဗော်ဒဳမဝ်ကရေဇြဳကောန်ဂကူသေံ (SNLD) သိုၚ်လုက်ရ။
-ကိုပ်ကၠာအိုတ်ဏံ ပ္ဍဲလတူပေါဲရုဲမာဲကံၚ်ဇြဳပၞာန်ဒေါံဟွံဂွံ ပ္တိတ်ကၠုၚ်ဒၟံၚ်ဇြဟတ် သွက်ဂွံကၠောန်ဗဒှ်ဂှ် ဗီုလဵုညာတ်ကေတ်ရော။
ကံၚ်ဇြဳပၞာန်ဂှ် ကၠောန်ဗဒှ်ပေါဲရုဲမာဲ အလုံမွဲကၟိန်ဍုၚ်ဏောၚ်ဂှ် ဟီုလဝ်ရ။ ဆဂး အရာဏံဂှ် အကာဲအရာ ဒှ်မာန်ဟာဟီုတှ်ေ တၚ်အဲသ္ၚဳဂၠိပ် ညာတ်ကေတ်ဂှ်တှ်ေ ဇၟာပ်ဇၟာပ်ဒၞာဲ ဂွံဒှ်ဂှ် ဍေံဟွံလောဲပုဟ်။ ဒှ်ဟွံမာန်ပုဟ်ဂှ် သ္ၚဳဂၠိပ်ညာတ်ကေတ်ရ။ တုဲမွဲပၠန်ဂှ် ယဝ်ရရံၚ်ကဵုအကာဲအရာ အခိၚ်အခါတုဲ တော်ရံၚ်အာဏောၚ်တှ်ေ ပေါဲရုဲမာဲဂှ် သွက်ဂွံဒှ်အာလောဲလောဲ ဒှ်ဟွံမာန်ပုဟ်ဂှ် ညာတ်ကေတ်ရ။
-လၟုဟ်တှ်ေ ပဋိပက္ခပရေၚ်ပၞာန် သ္ကာတ်မြဟ်တိုန်ကၠုၚ်ဒၟံၚ် အလုံမွဲကၟိန်ဍုၚ်ရ။ ညးဍုၚ်ကွာန်တအ် ကဵုစှ်ောကိုတ် ထောံသ္ၚိဌာန်တုဲ ဒးဂြိပ်ဒဴဒၟံၚ်ရ။ ယဝ်ရကံၚ်ဇြဳပၞာန် ကၠောန်ဗဒှ်ကၠုၚ် ပေါဲရုဲမာဲအတေၚ်တှ်ေ မုဆက်ဒှ်ကၠုၚ်မာန်ရော။
ဟွံဒှ်ညံၚ်ဂွံဒှ် ယဝ်ရကၠောန်ကေတ်အတေၚ်ဏောၚ်တှ်ေ လဍေံဒှ်လေဝ် ဒှ်မာန်မံၚ်ကီုရ။ ဆဂး နကဵုဗီုပြၚ် ဍေံတအ်မိက်ဂွံကဵုဒှ်ဂှ် အတိုၚ်တၚ် သၞောဝ်သ္ဇိုၚ်ဒက်ပ္တန် ကဵုကၠုၚ်လဝ်ဂှ်တှ်ေ ညးစုတ်မာဲ မူစိတၟံကၠံနွံမှ တုဲပၠန် ရးဆန္ဒမာဲဂၠိုၚ်အိုတ် ၜိုတ်ဂလိုၚ်လဵု ဒးကၠောန်ဗဒှ်ဏောၚ်ဟီုဂှ်ရ။ အောန်အိုတ်ၜိုတ်ဂလိုၚ်လဵု ဒးကၠောန်ဗဒှ်ပေါဲရုဲမာဲဟီုဂှ် ဟိုတ်နူပျးဌာန်လဝ်ဟၟဲဂှ်ရ ၜိုတ်ဍေံတအ်နွံပၟိက်ဂှ် တက်ပြံက်စုတ်တုဲ ယဝ်ကၠောန်အာဏောၚ်တှ်ေ ဍေံဒှ်အာမာန်ရ။ ဆ္ဂး မွဲလပါ်ပၠန်ဂှ်လေဝ် ပရေၚ်ညးဍုၚ်ကွာန်တအ် ပတှ်ေစှ်ေစိုတ်၊ ပရေၚ်ကၟိန်ဍုၚ်နာနာ သ္ပစၟတ်သမ္တီ၊ ပရေၚ်အလဵုအသဳတိုန်တၟိ ဂွံလုပ်ကဵုသၞောဝ် အရာမပ္တံဗီုဏံ ဒးစၟဳစၟတ်နွံဒၟံၚ်တၟာဂလိုၚ်ဏီရ။ ယဝ်ရဒးဟီုကၠးကၠးတှ်ေ အတိုၚ်ပရေၚ်လုပ်သၞောဝ် ဗီုလဵုသ္ပလေဝ် နွံကၠုၚ်ဟွံမာန်ပုဟ် ဟီုစဂွံရ။
-တုဲပၠန် ပ္ဍဲပေါဲရုဲမာဲကၠုၚ်စိုပ်ဏံဂှ် သုၚ်စောဲအာသၞောတ် (PR) သ္ပစၞးဗ္ၜတ်စှ်ေစှ်ေဏောၚ်ဂှ် ကံၚ်ဇြဳပၞာန်ဟီုကၠုၚ်လဝ် ဂွံဆဵုကေတ်ရ။ ပ္ဍဲလတူဏံ လစွံစိုတ်ဗီုလဵုနွံရော။
အတိုၚ်တၚ်လလောၚ်တြး ဍေံတအ်ဟီုတှ်ေ သၞောတ် PR ဍေံတအ်သုၚ်စောဲဂှ် ဒှ် CLOSE SYSTEM ရလေဝ်ဏး။ CLOSE SYSTEM ဟီုဂှ် ဓမံက်ထ္ၜး ယၟုဗော်ဟေၚ်တုဲ ပရေၚ်ဓမံက်ထ္ၜး ယၟုညးစၞးကၠတ်ထဝ်တအ်ဟၟဲပုဟ်။ ရံၚ်ယၟုဗော်တုဲ ဒးရုဲစှ်အာဏောၚ်တှ်ေ အရာဏံဂှ် ကၠောန်ဒၟံၚ် သီုကဵုတၚ်ရန်တၟအ်နွံနွံရ။ ဆဂးဂှ် ပ္ဍဲမတ်ပိုဲတှ်ေ သၞောတ် PR မိက်ဂွံသုၚ်စောဲ သုၚ်စောဲ၊ သၞောတ်ညးဇၞးဂွံဖအိုတ် အတိုၚ်သုၚ်စောဲကၠုၚ်လဝ် အခိၚ်တုဲတေံ မိက်ဂွံအာတှ်ေ အာ အဓိကဍေံဂှ် လုကဴဒပ်ပၞာန်ပါလုပ်ဒၟံၚ် ပ္ဍဲပရေၚ်ဍုၚ်ကွာန်ဏီဏောၚ်တှ်ေ ပရေၚ်ထံက်ဂလာန်ညးဍုၚ်ကွာန်၊ အကာဲအရာညးဍုၚ်ကွာန်ထံက်ဂလာန်ဂှ် တော်ကဵုအခိၚ်ကၠာတေံတှ်ေ သာတုဲ အကာဲအရာ ပရေံကၠုၚ်ဏောၚ်။ ယဝ်ရဒးဟီုကၠးကၠးတှ်ေ ကမၠောန်ဒပ်ပၞာန် ကၠောန်လဝ် ပ္ဍဲပွိုၚ် (၂) သၞာံဏံဂှ် သွက်ညးဍုၚ်ကွာန်တအ်ဂွံဒုၚ်တဲမာန် ဟၟဲပုဟ်။ ပ္ဍဲကဵုကာလ ညးဍုၚ်ကွာန်တအ်လေဝ် စိုပ်ဒၟံၚ်ဒဒိုက်ကဵုစှော်ကိုတ်ဂှ် ကၠောန်ဗဒှ်ပေါဲရုဲမာဲဟီုတှ်ေ အကာဲအရာထေက်ကဵုဒှ် ဟွံသေၚ်ဂှ်ရ သၞောတ်လဵုမိက်ဂွံသုၚ်စောဲ သုၚ်စောဲ သွက်ညးဍုၚ်ကွာန်တအ် ဂွံညာတ်လပါ်ခိုဟ်ဂှ် ဒှ်ဟွံမာန်ပုဟ်ဂှ် ညာတ်ကေတ်ရ။
-အလန်လကြဴအိုတ်ဏံ စပ်ကဵုပေါဲရုဲမာဲကံၚ်ဇြဳပၞာန်သီအဝဵု ကၠောန်ဗဒှ်တုဲ မုမိက်ဂွံထပ်ဟီုဗပေၚ်ရော။ ဟီုဗပေၚ်ကဵုညိ။
အဓိကဂှ် ကၟိန်ဍုၚ် ညိၚ်ဝတ်ၜိုဟ်သြိုဟ်တုဲမှ RULE OF LAW တအ်နွံဏောၚ်။ နကဵုဒပ်ပၞာန်ဂှ် ယဝ်ရသ္ပအာရီုကဵု ကမၠောန်မူလတၞံဍေံ သွက်ဂွံစဵုဒၞာကၟိန်ဍုၚ်ဓဝ်ရတှ်ေ ပိုဲတအ်ကလေၚ်ဂတးကၠုၚ် လပါ်ခိုဟ်ဏောၚ်ဂှ် ညာတ်ကေတ်။ ဗီုဂှ်ဟွံသေၚ် အရၚ်အဝဵု သွက်မွဲဂအုမ်မွဲဂကောံဓဝ် သွက်အရၚ်ပၟိက်ဆန္ဒပရေၚ်ဍုၚ်ကွာန် မွဲဂကောံဓဝ် ယဝ်ရကၠောန်မံၚ်ဏောၚ်တှ်ေ စိုပ်အာအကာဲအရာ ဒးသ္ၚောဲတိတ်အာ နူကဵုညးဍုၚ်ကွာန်မာန်ရ။ ဟိုတ်ဂှ်ရ ပေါဲရုဲမာဲဂှ်လေဝ် စိုပ်အာအကာဲအရာ ဟၟဲကဵုဂုဏ်ဖိုလ်မာန်ဏောၚ်ဂှ် သ္ၚဳဂၠိပ်ညာတ်ကေတ်ရ။