မတ်မလီု-ဂျာန္နဝါရဳ(၁၄)
ပ္ဍဲကဵုပယျဵုအိန္ဒိယ-ဗၟာ ပ္ဍဲပွိုၚ်ဍုၚ်ထာန်တလာန်ဂှ် ကံၚ်ဇြဳပၞာန်သီအဝဵု သုၚ်စောဲက္ၜၚ်ကျာတုဲ ပန်ပှော်ဂြာတ်ထောံဖျေံလဝ်ဗုမ် ဗ္ဒပ်ဗေတ်တိုဝ်ရဳယာ ဌာန်ဂအုပ် ဒပ်ကောန်ဂကူချေၚ် (CNF)) မၞုံဒၟံၚ်ဂှ် ဒၟာနူကလိလောန်သုၚ်စောဲလဝ် ပယျဵုဒၞက်ကျာ ကၟိန်ဍုၚ်ပွဳပွူဝုတ်ဒိုဟ်ပိုၚ်ပြဳလဝ်ဂှ်ရ သွက်ဂွံကေတ်ကဵုအရေဝ်ဂှ် NUG ဗတိုက်ဖ္အောဝ်လဝ်ရ။
နကဵုကၟိန်ဍုၚ် ပွဳပွူဝိုဒိုဟ်ဂမၠိုၚ် လောန်ၜက်ပယျဵုဒၞက်ကျာဇကုတုဲ သ္အာၚ်နူပြိုက်ဂစိုတ်ဒၟံၚ် ကောန်ညးဍုၚ်ကွာန်ကၟိန်ဍုၚ်ဗၟာဂှ် ကမၠောန်ပြဝကံၚ်ဇြဳပၞာန် ဘပဠဒၟံၚ် လမျီုပိုန်ဒြပ် ကောန်ညးဍုၚ်ကွာန် ကၟိန်ဍုၚ်ပွဳပွူဝုတ်ဒိုဟ်တအ်ဂှ် သွက်ဂွံကေတ်အာအရေဝ်သ္ကာတ်တ်မြဟ်ဟ်ဂှ် NUG အာတ်မိက်လဝ်ရ။
စတမ်နူ ဂိတုဂျာန္နဝါရဳ တုဲကၠုၚ် စၟတ်တ္ၚဲ (၁၀) အခိၚ်သဝ်တ္ၚဲတုဲ ဒၟာနူကံၚ်ဇြဳပၞာန် ကၠောန်ကၠုၚ်ပရေၚ်ပန်ပှ်ော ဗ္ဒပ်ဗေတ်တိုဝ်ရဳယာ ဒၞာဲဌာန်ဂအုပ် CNF မၞုံဒၟံၚ်ဂှ်တုဲ ကောန်ဒပ် CNF (၅) တၠ ဒးချိုတ်အာလဝ်တုဲ ညးဒးလဝ်ဘဲဝပ်၊ သ္ၚိဒၟံၚ်မၞိဟ်ဂမၠိုၚ် ဒးလီုလာ်လဝ်ရ။
အခိၚ်ကံၚ်ဇြဳပၞာန် သုၚ်စောဲက္ၜၚ်ကျာပၞာန်တုဲ ပန်ဗတိုက်ဒၟံၚ် ဌာန်ဂအုပ် CNF ဂှ် ဗုမ်ဒတုမ်ပြဟ်စှ်ေလဝ် ပ္ဍဲလပါ်ပယျဵုဒၞက်အိန္ဒိယ နွံဒၟံၚ်ရဂှ် ဓမံက်ထ္ၜးလဝ်ပ္ဍဲတၚ်လလောၚ်တြး NUG ရ။
ကမၠောန်ပြဝကံၚ်ဇြဳပၞာန်ဂှ် ဖံက်ပ္ကဝ်ဒၟံၚ် တၚ်သ္ဂုတ်သွာတ်ကံၚ်ဇြဳပရေၚ်ဂီုကၠီု အာတ်မိက်လဝ် သွက်ဂွံဒေါံတန်ကဵု ပွပ္ကီုပရာပ် မံက်က်ထေၚ်ၚ်ကီု သ္ပဒၟံၚ်မဇ္ဇျဟ်ကဵု ပရေၚ်ပ္တိတ်ဇြဟတ်ကၟိန်ဍုၚ်နာနာ ရီုဗၚ်ရေၚ်တၠုၚ်ဒၟံၚ် သွက်ပရေၚ်ကၟိန်ဍုၚ်ဗၟာ ဂွံညိၚ်ဝတ်ပြေပြံၚ်ဂှ်ရ နကဵုတွဳဗွိုၚ် ကၟိန်ဍုၚ်နာနာဂမၠိုၚ် သွက်ဂွံသောၚ်ကလးကဵု ပရေၚ်ကၟိန်ဍုၚ်ဗၟာဂှ် ပံၚ်တောဲကဵု ဂကောံဇြဟတ်ပၠန်ဂတး သ္ပစၞးကဵုညးဍုၚ်ကွာန် မပါလုပ်သီု NUG၊CRPH၊NUCC တအ်ညိဂှ် ဟီုဗတိုက်ဖ္အောဝ်လဝ်ရ။
ကံၚ်ဇြဳပၞာန်ဂှ် ဒၟာနူကၠောန်သ္ပဒၟံၚ် ပရေၚ်ပန်ပှော် တွဵုရးကရေၚ်၊ တွဵုရးကချေၚ်၊ ရးသေတ်ဂါၚ် ကေုာံ ရးမဂွေတအ် နကဵုက္ၜၚ်ကျာ ခြာဟွံလအ်ဟွံဂှ်ရ ကောန်အရာပ်ညးဒေသဂမၠိုၚ် ဒးချိုတ်ကၠုၚ်လဝ်ဒၟံၚ်မၞုံတုဲ ဟိုတ်နူပရေၚ်ပန်ပှော် ကဵုက္ၜၚ်ကျာတုဲ မၞိဟ်(၄၆၀) တၠ ဒးချိုတ်လဝ်တုဲ ပ္ဍဲကဵုဂှ် ညးဍုၚ်ကွာန်ကောန်အရာပ်၊ သၟတ်ကောန်ၚာ်တအ်ပါလုပ်ဒၟံၚ်လၟိဟ်ဂၠိုၚ်အိုတ်ရဂှ် ဂွံတီကေတ်ရ။
နကဵု NUG ဂှ် ဟိုတ်နူပရေၚ်ပြိုက်ဂစိုတ်ကံၚ်ဇြဳပၞာန် ဓဇန်ကြာန်ဂှ်တုဲ သွက်ကောန်ဍုၚ်အရၚ် ညးဍုၚ်ကွာန် ဒးဒုၚ်ချိုတ်အာလဝ်တအ်ဂှ် ညံၚ်ဂွံကလေၚ်က္လိဂွံ အတိုၚ်ဗဗွဲဓဝ်မာန်ဂှ် ရေၚ်တၠုၚ်အာ အတိုၚ်သၞောဝ်ဥပဒေ ပ္ဍဲဍုၚ်ကေုာံကၟိန်ဍုၚ်နာနာရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပရိုၚ်-သြၚ်လောန်တိုၚ်(မ်)