လွိုၚ်ကဝ် – ဂျာန္နဝါရဳ(၁၅)
ဒပ်ကံၚ်ဇြဳပၞာန် ဖျေံလဝ်ဗ္ဒပ် ပ္ဍဲတွဵုရးကရေၚ်ဍာဲဂှ် ဂကောံဇြဟတ်ပရေၚ်ပၠန်ဂတးဂမၠိုၚ် ပ္ဍဲပွိုၚ်မွဲသၞာံ ကၠောန်သ္ပကၠုၚ်လဝ် ပရေၚ်ပန်ဗတိုက် ပ္ဍဲဗလးကျာ နကဵုဒရုမ်စဵုကဵု (၁၂၅) ဝါ မာန်ကၠုၚ်လဝ်ရဂှ် ဂကောံပရေၚ်စဵုဒၞာဂမၠိုၚ် ဟီုသ္ဂးလဝ်ရ။
ဟိုတ်နူပရေၚ်ပန်ဗတိုက် နကဵုဒရုမ်တုဲ သၞာဲဒဴဒပ်ကံၚ်ဇြဳပၞာန်ကဵု ကောန်ဒပ်ကံၚ်ဇြဳပၞာန်ဂမၠိုၚ် ဒးဇီုကပိုက်ချိုတ်ကၠုၚ်လဝ် ဗွဲမဂၠိုၚ်တုဲ ပလီုပလာ်လဝ် လွဟ်လက်နက်မကမ်၊ စမြိုၚ် ကေုာံယာဉ်ထံက်ပလံၚ်တအ် ဗွဲမဂၠိုၚ်မာန်ကၠုၚ်ရဂှ် ဂွံတီကေတ်ရ။
နူလပါ်ကံၚ်ဇြဳပၞာန်လေဝ် ကလေၚ်ပလန်တဲဗတိုက်ကၠုၚ် ပရေၚ်ပန်ဗတိုက် နကဵုဒရုမ်တအ်ဂှ် နကဵုလွဟ်ဇၞော် Anti- Drone Guns ၊Jammer တအ်ရ။
ပရေၚ်ပန်ပှော်ဂမၠိုၚ်ဂှ် ဂကောံဇြဟတ်ပရေၚ်ပၠန်ဂတးကရေၚ်ဍာဲ မပါလုပ်သီု PDF လွိုၚ်ကဝ် ကေုာံ ဂကောံ Falcon Wingsတအ် ပံၚ်တောဲတုဲ ကၠောန်သ္ပကၠုၚ်လဝ်ရဂှ် ဂွံတီကေတ်ရ။
ပ္ဍဲဂိတုဂျာန္နဝါရဳ တုဲကၠုၚ်ပထမသတ္တာဟဂှ်လေဝ် ဂကောံ Falcon Wings ကေုာံ PDF လွိုၚ်ကဝ်တအ် ပံၚ်တောဲတုဲ ပ္တဝ်လဝ်က္ဍိုပ်ကဵု ပရေၚ်ပၞာန်ကံၚ်ဇြဳမွဲတုဲ ပန်ပှော်ဗတိုက်ကၠုၚ်လဝ်ဂှ်ရ နူလပါ်ကံၚ်ဇြဳပၞာန် ပရေၚ်ဇီုကပိုက်ချိုတ်ဂျိုၚ်လဝ်နွံဒၟံၚ်ရဂှ် ဂွံတီကေတ်ရ။
သ္အာၚ်နူဂှ်ပၠန် ပ္ဍဲသ္ကုတ်သၞာံ ၂၀၂၂ တေံအိုတ်ဂှ် ပ္ဍဲကဵုပေါဲဗတိုက် ကွာန်တေဇြူဠေဝ် ပွိုၚ်ဍုၚ်ဒဳမအ်ဇြောဂှ် ကၠောန်ကၠုၚ်လဝ် ပရေၚ်ပန်ပှော်ဗလးကျာ အဆက်ဆက်ရဂှ် ဂွံတီကေတ်ရ။
ဒပ်ဒရုမ် Falcon Wings ဂှ် ပ္ဍဲကဵုက္ဍုတ်သၞေဝ်မကမ်ဒရုမ် ပ္တဝ်လဝ်ကဵုကံၚ်ဇြဳပၞာန်တအ်ဂှ် ကၠောန်သ္ပရေၚ်တၠုၚ်ဒၟံၚ် အစဳဇန် ယၟုညးဍုၚ်ကွာန်တအ်မိက်ဂွံစုတ်တုဲ ပန်ဗတိုက်ဂွံ မွဲအစဳဇန်ရဂှ် ဂွံတီကေတ်ရ။
ပ္ဍဲတွဵုရးကရေၚ်ဍာဲ ပ္ဍဲပွိုၚ်မွဲသၞာံ ကံၚ်ဇြဳပၞာန်ကဵု ဂကောံပရေၚ်စဵုဒၞာဒေသဂမၠိုၚ် ပေါဲဗတိုက်က္တဵုဒှ်လဝ် အပံၚ်လၟိဟ် (၃၄၁)ဝါတုဲ နူလပါ်ကံၚ်ဇြဳပၞာန် (၇၉၇) တၠ ဒးချိုတ်ကၠုၚ်လဝ်တုဲ (၉၃) တၠ ဂွံကၠုၚ်လဝ်ဘဲဝပ်ရဂှ် ဒပ်ပရေၚ်စဵုဒၞာကောန်ဂကူကရေၚ်ဍာဲ (KNDF) ဓမံက်ထ္ၜးလဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – Falcon Wings