“လၟုဟ်ဂှ်တှ်ေ အကာဲအရာဒှ်မာန်နွံမံၚ်မွဲဂှ် နကဵုဂကောံအာဇြဳယာန် တၚ်သ္ဂုတ်သွာတ်အာဇြဳယာန်မသုန်တၚ် မေန်အံၚ်လှာၚ်တုပ်လဝ်စိုတ်ဖိုဟ် ဟွံဓမံက်ကၠုၚ်ရုပ်ရဴ ပေၚ်ပွိုၚ် ၂ သၞာံဂှ်ရ ပရေၚ်ပိုၚ်ခြာ ကဵုကၠုၚ်အခိၚ် နွံကၠုၚ်မာန်ဒၟံၚ်ရ”

တၚ်ဆက်စၠောံ သၟာန်သွဟ်လဝ်ကဵု ဥူတာန်သိုဝ်နိုၚ် ညးသ္ၚဳဂၠိပ်ပါ်ပါဲပရေၚ်ဍုၚ်ကွာန်

ဝန်ဇၞော်ပရေၚ်ဍုၚ်သ္အာၚ် အေန်ဒိုဝ်နဳယှာ ရေတ်နိုဝ်မာဇြူဒဳ  မဒှ်ညးစၞးတၟေၚ်အာဇြဳယာန်ဂှ် သွက်ဂွံသောၚ်ကလး ပရေၚ်ကၟိန်ဍုၚ်ဗၟာဂှ် ဒက်ပ္တန်အာ ဂကောံညးစၞးတၟေၚ်တုဲ သဳကၠဳပ္ညဳပ္ညပ်အာ ကုညးမဆေၚ်စပ်တအ် သီုဖအိုတ်ရောၚ်ဂှ် ဟီုဂးလဝ်ပ္ဍဲဂလာန်လၟိၚ် ပ္ဍဲဂိတုဂျာန္နဝါရဳ တုဲကၠုၚ်စၟတ်တ္ၚဲ (၁၁) ဂှ်ရ။ ကြဴနူရေတ်နိုဝ်မာြဇူဒဳ ညးစၞးတၟေၚ်အာဇြဳယာန် ဟီုဂးလဝ်သာ်ဏံတုဲဂှ် နကဵုကံၚ်ဇြဳပၞာန် လလောၚ်တြးလဝ် တၚ်လစွံစိုတ် (၃) တၚ် မပါလုပ်သီုတၚ် သွက်ဂွံဟွံဂွံကၠောန်သ္ပ ပရေၚ်ဆက်ဆောံ ကေုာံဂကောံညးတအ်စၟတ်သမ္တီလဝ် ဂကောံပ္ကီုပရာပ် ပ္ဍဲဂိတုဂျာန္နဝါရဳ စၟတ်တ္ၚဲ ၁၃ ဂှ်ရ။ ဟိုတ်ဂှ်ရ ပရေၚ်ညးစၞးတၟေၚ်အာဇြဳယာန်ပြံၚ်သၠာဲဂှ် မုက္တဵုဒှ်ကၠုၚ် သွက်ပရေၚ်ကၟိန်ဍုၚ်ဗၟာမာန်ရော။ ပရေၚ်ကံၚ်ဇြဳပၞာန် ဟီုသ္ဂးလဝ်တအ်ဂှ် နူလပါ်အာဇြဳယာန် မုမွဲ ကၠောန်သ္ပကၠုၚ်မာန်ရော။ နုက်ပ္တိတ်ထောံ ကၟိန်ဍုၚ်ဗၟာ နူဂကောံအာဇြဳယာန် မာန်ဟာ။ စပ်ကဵုအကာဲအရာဏံတုဲ သၟာန်သွဟ်လဝ်ကဵု ညးသ္ၚဳဂၠိပ်လ္ၚတ်ပါ်ပါဲပရေၚ်ဍုၚ်ကွာန် ဥူတာန်သိုဝ်နိုၚ်ရ။

-ကိုပ်ကၠာအိုတ်ဏံ အေန်ဒိုဝ်နဳယှာဂှ် ကေတ်ကၠုၚ်တာလျိုၚ် နဒဒှ်ဥက္ကဋ္ဌအလန်ယျဏောၚ်ဟီုတှ်ေ စပ်ကဵုပရေၚ်ကၟိန်ဍုၚ်ဗၟာ အေန်ဒိုဝ်နဳယှာက္ဍိုက်တုဲ ဗီုလဵုညာတ်ကေတ်ရော။

ပြံၚ်သၠာဲကၠုၚ်လဝ် ညးစၞးအာဇြဳယာန် ဂွံအာၜါအလန်ယျ။ အလန်ပထမဂှ်တှ်ေ ဝန်ဇၞော်ပရေၚ်ဍုၚ်သ္အာၚ် ဗရူနိုၚ်ပိုဲဂှ် သ္ပလဝ်ညးစၞးရ။ ဆဂးဂှ်ပရေၚ်ဆက်ဆောံ ဗရူနိုၚ်ကဵုကံၚ်ဇြဳပၞာန်ဂှ် ဟွံပြေပြံၚ်ကွေံကွေံပုဟ်။ မုဒှ်ရောတှ်ေ ကိစ္စညးစၞးအာဇြဳယာန်တၟေၚ်တအ် သွက်ဂွံကၠုၚ်စိုပ်ဍုၚ်ဗၟာ ပ္တိတ်လဝ်ဇြဟတ်ပိဝါဂှ် မွဲဝါလေဝ် ဟွံအံၚ်ဇၞးလဝ်တုဲ ညးစၞးအာဇြဳယာန် သီုဟွံဂွံအခေါၚ်ကၠုၚ်စိုပ်ဍုၚ်ဗၟာမွဲသာ် တုဲဒှ်အာရ။ နူဂှ်ပၠန် ညးစၞးကမ္ဘောဒဳယာ စိုပ်ကၠုၚ်ရ။ အခိၚ်ညးစၞးကမ္ဘောဒဳယာ စိုပ်ကၠုၚ်ဂှ် ရေၚ်တၠုၚ်လဝ် လပါ်ခိုဟ်ဗွဲမဂၠိုၚ်ရ။ ညံၚ်ပရေၚ်ဆက်ဆောံကဵုဍုၚ်ဗၟာဂွံခိုဟ် ညးတအ်ပ္တိတ်လဝ်ဇြဟတ်ကဵု စကစရ။ ဆဂးဂှ် ၜိုန်ရပ္တိတ်ဇြဟတ်ကီုလေဝ် မုလေဝ်ဟွံစိုပ်တရဴပုဟ်။ တုဲပၠန် ပ္ဍဲလက်ထက်ညးစၞးကမ္ဘောဒဳယာဂှ် စပ်ကဵုတၚ်သ္ဂုတ်သွာတ်အာဇြဳယာန်တုဲ လစွံစိုတ် စကစပြံၚ်သၠာဲကၠုၚ်ရ။ ကၠာတေံဂှ်တှ်ေ ဒုၚ်အာတဲ တၚ်သ္ဂုတ်သွာတ်အာဇြဳယာန်ဏောၚ်ဂှ် မေန်အံၚ်လှာၚ် သ္ပလဝ်စၟတ်သမ္တီ ဟီုဂးလဝ်ရ။ဆဂးအခိၚ်ဆဵုဂဗကဵု ညးစၞးကမ္ဘောဒဳယာဂှ် လစွံစိုတ်ကံၚ်ဇြဳပၞာန် ပြံၚ်သၠာဲကၠုၚ်ရ။ လစွံစိုတ်ဒ္တန်အာဇြဳယာန်မသုန်တၚ်ဏံဂှ် ဒၟာနူဖံက်ပ္ကဝ်ဒၟံၚ် တၚ်ဂၞၚ်ပါလုပ် ပ္ဍဲပဋိဉာဏ်အာဇြဳယာန်ဂှ်ရ ညးတအ်ဟွံဒုၚ်တဲရဂှ် ပလေဝ်အရေဝ်တုဲ က္လေၚ်ဟီုကၠုၚ်ရ။

ဟီုတှ်ေ လစွံစိုတ်အာဇြဳယာန်လတူကံၚ်ဇြဳပၞာန်ဂှ် သာတုဲကြံၚ်မ္ၚိုဟ်မံၚ်ရ။ ပ္ဍဲအခိၚ်ဂှ် ပ္ဍဲဂကောံအာဇြဳယာန်တှ်ေ ဒှ်အခိၚ် ကၟိန်ဍုၚ်မလေဝ်ယှာကဵု အေန်ဒိုဝ်နဳယှာတအ် ဟီုဂးဒၟံၚ် စပ်ကဵုပရေၚ်ကၟိန်ဍုၚ်ဗၟာ သ္ကာတ်တ်မြဟ်ဟ်ဗွဲတၟေၚ်တအ်ဂှ် လၟုဟ်ဏံတှ်ေ တုဲကၠုၚ်မွဲၜါတ္ၚဲဏံရ ဆဵုဂဗလဝ်ညးသ္ကအ် ပ္ညဳပ္ညပ်လဝ်ညးသ္ကအ်ဂှ် ဂွံညာတ်ကေတ်လဝ်ဂှ်ရ စပ်ကဵုပရေၚ်ဍုၚ်ဗၟာတုဲ အဆုဲပြံၚ်မွဲမွဲ စိုပ်ကၠုၚ်မာန်ဏောၚ် စၟဳပတှ်ေစဂွံရ။ ပရေၚ်ဆုဲပြံၚ်ဗၟာဂှ် တၟေၚ်တၟဟ်ကၠုၚ် မွဲနဲမွဲဗီုမာန်ဏောၚ်။ ဆဂး အခိၚ်လဵုမှ ဆုဲပြံၚ်ရောဂှ် ဗွဲတၟေၚ်တှ်ေ အကာဲအရာဒှ်ကၠုၚ် ပ္ဍဲဒၞာဲဏံမွဲမာန်ဂှ် တၚ်တုပ်စိုတ်အာဇြဳယာန်မသုန်တၚ်ဂှ် ဗီုကဵုကၠုၚ် တ္ၚဲအပိုၚ်အခြာတအ် ဒှ်ကၠုၚ်မာန်ရ။ ပ္ဍဲလတူကဵုကၠုၚ် တ္ၚဲအပိုၚ်ခြာဂှ် ယဝ်ရကံၚ်ဇြဳပၞာန်ဟွံဒ္ဂေတ်ဗက်ပုဟ်တှ်ေ မုဆက်ကၠောန်အာရောဟီုဂှ် ပိုဲဒးမၚ်ဗဵုရံၚ်ရ။ ဟိုတ်ဂှ်ရ ပ္ဍဲကၟိန်ဍုၚ်အာဇြဳယာန် လၟုဟ်တှ်ေ ကၟိန်ဍုၚ်အေန်ဒိုဝ်နဳယှာပါလုပ်ကၠုၚ် နဒဒှ်ကၟိန်ဍုၚ်ညးစၞးဂှ်ရ စပ်ကဵုပရေၚ်ကၟိန်ဍုၚ်ဗၟာတုဲ နကဵုဂကောံဇြဟတ် မၞုံကဵုလစွံစိုတ်ဍာံပြ နူလပါ်အာဇြဳယာန်တအ်ဂှ် ဂွံကၠုၚ်အခေါၚ်ခိုဟ်ဂှ်ရ စပ်ကဵုပရေၚ်ဍုၚ်ဗၟာတုဲ ကၠောန်ကၠုၚ်ၚုဟ်ဟ်က္တဵုက္တဵုမာန်ဏောၚ်။ ဆဂးတၚ်ပၟိက်ဇၞော်မွဲဂှ်တှ်ေ သွက်ကံၚ်ဇြဳပၞာန် ဂွံဗက်စမာန်ဂှ် ဒှ်ဟွံလောဲပုဟ်။ တၚ်ပၟိက်ဇၞော်ဟီုဂှ် ပ္ဍဲဍုၚ်ဗၟာဂှ် သွက်ပရေၚ်ပ္ကီုပရာပ် ဂွံတန်ဒေါံအာဂးတုဲ ကိစ္စတအ်ဂးတုဲ သွက်ဂွံဒှ်ကၠုၚ်ကိစ္စစဵုကဵုပေါဲသဳကၠဳဝိုၚ်ခုၚ်ဂှ် စိုပ်ကၠုၚ်မာန်ဏောၚ် ဟၟဲဏီရဂှ် သ္ၚဳဂၠိပ်ညာတ်ကေတ်ရ။

-တၚ်တုပ်စိုတ်ဒ္တန်အာဇြဳယာန် က္ဍိုပ်သ္ကိုပ်ကဆံၚ်လတူအာဇြဳယာန်တအ်တုပ်လဝ်စိုတ် (၅)တၚ်ဂှ် ယဝ်ရကံၚ်ဇြဳပၞာန် ဟွံဓမံက်ရုပ်ရဴပုဟ်ဟီုတှ်ေ နုက်ပတိတ်ထောံ ကၟိန်ဍုၚ်ဗၟာ နူအာဇြဳယာန်မာန်ဟာ၊ လတူဏံဗီုလဵုညာတ်ကေတ်ရော။

ဒှ်မာန်ဒၟံၚ်ရ။ သွက်ဂွံဒှ်ကၠုၚ်ဗီုဏံဂှ် နကဵုအာဇြဳယာန် ကိစ္စဒးကဵုဇြဟတ်ဓရိုဟ် ချိုတ်တ်ပၠိုတ်တ်ဏောၚ် မုဒှ်ရောတှ်ေ ယဝ်ရကံၚ်ဇြဳပၞာန် ဒ္ဂေတ်ဗက်တၚ်သ္ဂုတ်သွာတ်အာဇြဳယာန်ဟွံမာန်မ္ဂး၊ ဓမံက်ရုပ်ရဴဟွံမာန်ပုဟ်ဟီုတှ်ေ NUG ဂှ် အာဇြဳယာန်သ္ပစၟတ်သမ္တီ နဒဒှ်အလဵုအသဳဗၟာတုဲ ဆက်ဆောံဏောၚ် ယဝ်ရပိုဲကဵုအာဇြဟတ်ဓရိုဟ် အတိုၚ်ပရေၚ်ဍုၚ်ကွာန်မ္ဂး စိုပ်အာအကာဲအရာနူကၠၚ်ဏံ မာန်မံၚ်ရဂှ် အဲပတှ်ေကေတ်လဝ်ရ။

-ကံၚ်ဇြဳပၞာန်ဂှ် ညံၚ်အာဇြဳယာန် ဟွံဂွံကၠောန်သ္ပ ပရေၚ်လုက်စုက်ဆက်ဆောံကဵု ဂကောံဍေံတအ်စၟတ်သမ္တီလဝ် ဂကောံပ္ကီုပရာပ်ဂှ် လလောၚ်တြးကၠုၚ်လဝ် တၚ်လစွံစိုတ် ပ္ဍဲဂိတုဂျာန္နဝါရဳ စၟတ်တ္ၚဲ (၁၃) ဂှ် ဂွံဆဵုကေတ်လဝ်ရ။ အကာဲအရာဏံဂှ် မုက္တဵုဗဒှ်ကဵု ပရေၚ်ဍုၚ်ကွာန် ကၟိန်ဍုၚ်ဗၟာမာန်ရော။

ပရေၚ်လညာတ်ဒကးပရး နွံဒၟံၚ်အကြာအာဇြဳယာန်ကဵု ကံၚ်ဇြဳပၞာန်ဂှ် ကိစ္စဒှ်ကၠုၚ်လဝ်ကၠာအိုတ်ဂှ်တှ်ေ ပ္ဍဲသၞာံ ၂၀၂၁ ဂှ် ပ္ဍဲပေါဲကောံဓရီုအာဇြဳယာန် အလဵုမေန်အံၚ်လှာၚ်တိုန်စိုပ်လဝ်ဂှ် ဖျေံကၠုၚ်လဝ် တၚ်သ္ဂုတ်သွာတ်မသုန်တၚ်ရ။ တၚ်သ္ဂုတ်သွာတ်မသုန်တၚ်ဂှ် အလဵုညး ဓမံက်ကဵုရုပ်ရဴဏောၚ်ဂှ် မေန်အံၚ်လှာဒုၚ်ကေတ်လဝ်လျိုၚ်ရ။ ဆဂး တၚ်ဒုၚ်လျိုၚ်ဏံဂှ် စဵုကဵုသၞာံ ၂၀၂၁ အိုတ်ဂှ် နူလပါ်ကံၚ်ဇြဳပၞာန်ပိုဲ ပၞောဝ်ကဵုတၚ်သ္ဂုတ်သွာတ် မသုန်တၚ်ဂှ် မွဲတၚ်လေဝ် ဓမံက်ကၠုၚ်လဝ် ရုပ်ရဴဟွံမာန်ရ။ စပ်ကဵုဟွံဓမံက်ရုပ်ရဴဂှ်တုဲ ပ္ဍဲစိုပ်ကၠုၚ်အခိၚ် သၞာံ၂၀၂၂ ဂှ်တှ်ေ လစွံစိုတ် နူလပါ်ကံၚ်ဇြဳပၞာန်ဂှ် ပြံၚ်သၠာဲကၠုၚ်တုဲ ဓမံက်ထ္ၜးဒၟံၚ် တၚ်ဒတူလာၚ်ဍေံတအ်ရ။ တၚ်ဒတူလာၚ်ဍေံတအ်ဂှ်တှ်ေ တၚ်သ္ဂုတ်သွာတ်အာဇြဳယာန်မသုန်တၚ်ဟီုဂှ် ဖံက်ပ္ကဝ်ဒၟံၚ် ပဋိဉာဏ်အာဇြဳယာန်ဂှ်ရ သွက်ဂွံဓမံက်ရုပ်ရဴဂှ် နကဵုကံၚ်ဇြဳပၞာန် လစွံစိုတ်ညိဟၟဲလးလးရဂှ် ပတိုန်ထ္ၜးကၠုၚ်ရ။ အဓိပ္ပါယ်ဍေံဂှ်တှ်ေ တၚ်သ္ဂုတ်သွာတ်အာဇြဳယာန်မသုန်တၚ်ဏံဂှ် နကဵုကံၚ်ဇြဳပၞာန် ဒုၚ်တဲချပ်စန်စာအာ ဟွံသေၚ်ရဂှ် ဟီုကၠုၚ်တၚ်လစွံစိုတ်ဍေံတအ်ရ။ ဒှ်ကၠုၚ်ဗီုပြၚ်ဏံဂှ်တှ်ေ လၟုဟ်ဏံ အေန်ဒိုဝ်နဳယှာဂှ်  သွက်ဂွံဓမံက်ရုပ်ရဴ တၚ်သ္ဂုတ်သွာတ်ဏံမသုန်တၚ်ဏံ တော်ကဵုကၠာတေံတှ်ေ သာတုဲကတိုၚ်ကၟဟ် ပ္တိတ်ဇြဟတ်လွဳပရာကၠုၚ်ဏောၚ်။ ဆဂးဂှ် ကိစ္စဏံလေဝ် ဂွံကၠောန်နဇိုၚ်နတဲဂှ် ဟၟဲရ။ မုဒှ်ရောတှ်ေ ကံၚ်ဇြဳပၞာန်ဂှ် စၟတ်သမ္တီလဝ် ပရေၚ်ချဳဒရာၚ် ဂကောံဇြဟတ်ဒဳမဝ်ကရေဇြဳ ပ္ဍဲဍုၚ်ဗၟာပိုဲဂှ် ဂကောံဇြဟတ်ပ္ကီုပရာပ်တုဲတှ်ေ လစွံစိုတ်ဟွံမိက်သဳကၠဳကဵု ဂကောံဇြဟတ်ဏံဂှ် ဖျေံကၠုၚ်ဒၟံၚ်မွဲဒမြိပ်ရ။ ဆဂးဂှ် ပဋိပက္ခပၞာန်၊ ပဋိပက္ခပရေၚ်ဍုၚ်ကွာန်၊ ဂၠိုၚ်တိုန်ကၠုၚ်ဒၟံၚ် ပ္ဍဲဍုၚ်ဗၟာဂှ် ယဝ်ရ သရောပ်ရံၚ်လစွံစိုတ် လပါ်ကံၚ်ဇြဳပၞာန် ဗီုဏံဏောၚ်တှ်ေ နူလပါ်ကံၚ်ဇြဳပၞာန်ဂှ် နကဵုလစွံစိုတ်ဟွံဒုၚ်တဲ ပရေၚ်ပ္ကီုပရာပ်ဗီုဏံတုဲ ဟွံသဳကၠဳပုဟ်။ ဟွံပ္ညဳပ္ညပ်ပုဟ်ဟီုကီုလေဝ် ဍာံဍာံတေံဂှ် စတမ်နူ ပ္ကီုပရာပ်ဒှ်ကၠုၚ်ဒၟံၚ် ပ္ဍဲအလုမ်မွဲဍုၚ် စဵုကဵုလၟုဟ်ဏံဂှ် ရပ်ဒၟံၚ်၊ ဖျေံဒၟံၚ်ထံၚ်၊ ဂစိုတ်ဒၟံၚ် ဂကောံဇြဟတ်ဒဳမဝ်ကရေဇြဳတအ်ကီု၊ ဂစိုတ်ဒၟံၚ် ရပ်ဒၟံၚ်ညးဍုၚ်ကွာန်တအ်ကီု၊ စံၚ်မံၚ်သ္ၚိဌာန် ညးဍုၚ်ကွာန်တအ်ကီု၊ ကမၠောန်ပ္ကီုပရာပ် သီုဖအိုတ်ဂှ် ကံၚ်ဇြဳပၞာန်ရ ကၠောန်သ္ပဒၟံၚ်ဂှ် ပ္ဍဲဍုၚ်ကီုမ္ၚးဍုၚ်ကီု သီုကဵုဂၠးတိကီု တီဒၟံၚ်ရ။ သက်သဳလေဝ် နွံမံၚ်ဂၠိုၚ်ဂၠေၚ်ရ။ ကံၚ်ဇြဳပၞာန်ဂှ် ကၠောန်ဒၟံၚ် ကမၠောန်ပ္ကီုပရာပ်တုဲတှ်ေ ဂကောံဇြဟတ်ဒစဵုဒစးကဵု ကံၚ်ဇြဳပၞာန်သှ်ေမံၚ်တအ်ဂှ် ဂကောံပ္ကီုပရာပ်ဏောၚ်၊ ကဵုဂကောံတအ်ဏံဂှ် ပိုဲပ္ညဳပ္ညပ်ဟွံမာန်၊ သဳကၠဳဟွံမာန်ပုဟ်တှ်ေ သွက်ဂွံဓမံက်ရုရဴ တၚ်သ္ဂုတ်သွာတ်အာဇြဳယာန်ဟီုဂှ် ဗီုလဵုသ္ပလေဝ် ဒှ်ဟွံမာန်ရ။ နကဵုအာဇြဳယာန် ဗီုလဵုဆက်တုဲ ကဵုအာဇြဟတ်ဓရိုဟ်ရောဟီုဂှ် ဒးမံၚ်ရံၚ်ဏောၚ်။ လၟုဟ်ဂှ်တှ်ေ အကာဲအရာဲဒှ်မာန်မွဲဂှ်တှ်ေ နကဵုအာဇြဳယာန် တၚ်သ္ဂုတ်သွာတ်အာဇြဳယာန်မသုန်တၚ် သီုကဵုမေန်အံၚ်လှာၚ်တုပ်လဝ်စိုတ်ဖိုဟ်ဂှ် ဟွံဓမံက်ရုပ်ရဴဂွံကၠုၚ်ပွိုၚ် ၂ သၞာံဂှ်ရ ပိုၚ်ခြာကဵုအခေါၚ် နွံကၠုၚ်မာန်ရ။ ဥပမာ – ပ္ဍဲသၞာံ၂၀၂၃ ဏံ သွက်ဂွံဓမံက်ရုပ်ရဴ တၚ်သ္ဂုတ်သွာတ်ဏံ၊ ယဝ်ဟွံဓမံက်ရုပ်ရဴမ္ဂး မုသ္ပဗီုလဵု။ သွက်ဂွံဓဇက်ဖျေံ အလဵုအသဳကံၚ်ဇြဳပၞာန် နူစၚ်အာဇြဳယာန်ဂှ် နွံဒၟံၚ်ပၟိက်ရ။ ဓဇက်ဖျေံဗီုဏံတုဲ ညးဂှ်ဂွံစုတ်စၞးရော ဂကောံဇြဟတ် မပ္တံကဵု NUG,CRPH တအ် နကဵုအာဇြဳယာန် ကဵုဒၞာဲဗွဲမလုပ်သၞောဝ်ဏောၚ်။ ပံၚ်တောဲဆက်စၠောံ ရေၚ်တၠုၚ်အာကဵု ဂကောံဇြဟတ်တအ်ဏံဏောၚ် ဂးတုဲ ယဝ်ရဇြဟတ်ဓရိုတ် စိုပ်ကၠုၚ်စိုပ်ကၠုၚ်ၜိုတ်ကဆံၚ်ဏံတှ်ေ နကဵုကံၚ်ဇြဳပၞာန် ကလေၚ်စၟဳစၟတ် ပရေၚ်ဒတူလာၚ်ကၟိန်ဍုၚ်နာနာဍေံဏောၚ်၊ အရာပိုဲဗက်ကဵုအလိုက် နွံကၠုၚ်မာန်ဏောၚ်ဂှ် ထေၚ်ကေတ်ရ။ ဆဂးဂှ် ဒဵုကဵုကဆံၚ်ဏံလေဝ် ကၟိန်ဍုၚ်အေန်ဒိုဝ်နဳယှာ ကၠောန်ကၠုၚ်မာန်ဟာ၊ ကၠောန်ညိရဟာဂှ် နကဵုညးတအ် လစွံစိုတ်ဗီုဏံ နွံမာန်ဒၟံၚ်ရ။ ဆဂး ဇေတ်ဇေတ်တေံ ပ္ဍဲအာဇြဳယာန်ဂှ် ဂကောံဇြဟတ်နွံပၟိက်ဒၟံၚ်ကဵု ကံၚ်ဇြဳပၞာန် နွံမံၚ်လ္ၚဵုတံဂှ် ညံၚ်အကာဲအရာ ဂွံစိုပ်ကၠုၚ်ဗီုဏံမာန် အေန်ဒိုဝ်နဳယှာ ဗတိုက်ဖ္အောဝ်မာန်ဟာဂှ် ဒှ်အကာဲအရာ ပိုဲဒးမၚ်ရံၚ်ဒၟံၚ်ရဂှ် အဲမိက်ဂွံဟီုရ။

-အလန်လကြဴအိုတ်ဏံ ပရေၚ်ကၟိန်ဍုၚ်ဗၟာ အေန်ဒိုဝ်နဳယှာက္ဍိုက်က္ဍိုပ်ဂှ် အပြံၚ်သၠာဲဗီုလဵု က္တဵုဒှ်ကၠုၚ်မာန်ရော။ စဵုကဆံၚ်လဵု ဂွံစၟဳပတှ်ေစဂွံမာန်ရော။ သ္ၚဳဂၠိပ်ကဵုညိ။

အရာဏံဂှ်တှ်ေ စၟဳပတှ်ေစဂွံဒၟံၚ်ရ။ ဆဂးဂှ် ညးစၞးအာဇြဳယာန် မွဲတၠဓဝ် စပ်ကဵုပရေၚ်ကၟိန်ဍုၚ်ဗၟာတုဲ စၞးဒးသဳကၠဳဏောၚ်တှ်ေ ဒက်ပ္တန်တိုန် ဗီုကဵု ရုၚ်ဂကောံညးစၞးအာဇြဳယာန် ဂကောံညးစၞးအာဇြဳယာန်သီုဖအိုတ်ပါလုပ်တုဲ ပြသၞာစပ်ကဵု ကၟိန်ဍုၚ်ဗၟာတအ်၊ လၟေၚ်ကမၠောန် ကၠောန်သ္ပအာအဆက်ဆက်တအ် ရေၚ်တၠုၚ်အာဏောၚ်။ ကဵုအာဇြဟတ်ဓရိုဟ်မာန်ဏောၚ်တှ်ေ နကဵုကံၚ်ဇြဳပၞာန် လကိုတ်တ္ၚဵုအာ အကာဲအရာဏံတုဲ နူလပါ်ဍေံတအ် ပရေၚ်ယှအ်ဖျေံ နွံလေဝ်နွံကၠုၚ်မာန်ဏောၚ်။ ဆဂး ဂွံစိုပ်အကာဲအရာဏံဟီုဂှ်  ပ္ဍဲကဵုရုၚ် ဂကောံအာဇြဳယာန်ဂှ် ဂကောံဇြဟတ်နွံပၟိက်ကဵု ဒဳမဝ်ကရေဇြဳဇေတ်တ်တအ် ပါလုပ်ဒၟံၚ်ဟွံသေၚ်မ္ဂး ဂကောံဇြဟတ်ဟွံမွဲပၟိက်ကဵု ဒဳမဝ်ကရေဇြဳတအ် ပၞာန်သီအဝဵုတုဲ ဂကောံဇြဟတ်ဂွံလဝ်အဝဵုတအ်။ ဥပမာဍေံ သေံတအ်၊ ကမ္ဘောဒဳယာတအ်၊ ဗဳယာတ်နာမ်တအ်လေဝ် ပါလုပ်ဒၟံၚ်ဂှ်ရ သွက်ဂွံပ္ညဳပ္ညပ် တၚ်လစွံစိုတ် ဂကောံဇြဟတ်တအ်ဂှ်လေဝ် အခက်ခုဲ နွံမာန်ဏောၚ်ဂှ် ချိၚ်ခယျကေတ်ရ။ ဆဂးဂှ်မုဒှ်ဒှ်ရ ပရေၚ်ချဳဒရာၚ်ဏံ ယဝ်ရအေန်ဒိုဝ်နဳယှာ က္ဍိုက်က္ဍိုပ်တုဲ ကၠောန်ကၠုၚ်ဏောၚ်တှ်ေ မုဒှ်ဒှ်ရ နကဵုကံၚ်ဇြဳပၞာန်မေန်အံၚ်လှာၚ်တအ် ပ္ဍဲလတူဇြဟတ်ဓရိုဟ် ဂကောံအာဇြဳယာန် မမိက်ကဵုမွဲမွဲ စွံကၠုၚ်အာရီုမာန်ဏောၚ်။ ပရေၚ်သဳကၠဳပ္ညဳပ္ညပ်တအ် နွံကၠုၚ်မာန်ဏောၚ်ဂှ် ပိုဲစၟဳပတှ်ေလဝ်မာန်ရ။