ပဠဝ်၊ ဂျာန္နဝါရဳ(၁၈)
ရးဒေသဇၞော်တၞၚ်သဳ၊ ပွိုၚ်ဍုၚ်ပဠဝ်၊ ဗ္ဒပ်ကံၚ်ဇြဳပၞာန် ဖျေံလဝ်ဗ္ဒပ် ပ္ဍဲကွာန်ယှာတ်ပုမ်ဂှ် ပ္ဍဲဂိတုဂျာန္နဝါရဳ စၟတ်တ္ၚဲ (၁၆ ) ပ္ဍဲအခိၚ်ဒေါဝ်တ္ၚဲဂှ် ဟိုတ်နူဒးဒုၚ်ဗတိုက်လဝ်ဂှ်ရ (၄) တၠဒးချိုတ်အာတုဲ သီကေတ်ဂွံလဝ် သီုလွဟ်လက်နက်တအ်ရဂှ် ညးမၞုံတာလျိုၚ်လလောၚ်ပရိုၚ် ခရိုၚ်ဗိက် တံဒပ်လၟိဟ်(၁) ဟီုသ္ဂးလဝ်ရ။
အခိၚ်ၜိုတ် (၁) နာဍဳ ပ္ဍဲတ္ၚဲဂှ် ဗ္ဒပ်ကံၚ်ဇြဳပၞာန် ပျူ ဖျေံလဝ်ဗ္ဒပ် ပ္ဍဲကွာန်ယှာတ်ပုမ် ဇြဟတ်မၞုံၜိုတ် (၃၀) တၠဂှ် ဒပ်မဟာမိတ်ပံၚ်ကောံ ကေုာံတံဒပ်ခရိုၚ်ဗိက် လၟိဟ်(၁)တအ် အာစိုပ်ပန်ပှော် ဗတိုက်လဝ်ရ။
“ပေါဲဗတိုက်ဂှ် နူကဵုအခိၚ်ၜိုတ် (၁) နာဍဳဒေါဝ်တ္ၚဲ စဒှ်ကၠုၚ်ရ။ သဝ်တ္ၚဲ ၜိုတ် (၅) နာဍဳပြၚ်ၚ်ဂှ်မှ ဂွံတုဲအာ။ ပျူတအ် ပံၚ်ကဵုစကစ ပ္ဍဲကွာန်ဂှ်တုဲ ကြာန်ဒမာန်ဒၟံၚ်ရ ဂုဏ်နူတေၚ်စိုပ်တုဲ အာပန်ပှော်လဝ်ရ၊ ပသောၚ်သအးထောံလဝ် က္ဍိုပ်သ္ကိုပ်ပျူ ညုၚ်ချာန်အံၚ်ဂှ်ရ။ စကစတအ်လေဝ် ချိုတ်လဝ် နွံရ” ရဂှ် ညးမၞုံတာလျိုၚ်လလောၚ်ပရိုၚ် ခရိုၚ်ဗိက် တံဒပ်လၟိဟ် (၁)ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲကဵုပေါဲဗတိုက်ဂှ် ကောန်ဒပ်ကံၚ်ဇြဳပၞာန် (၂) တၠ၊ က္ဍိုပ်သ္ကိုပ်ပျူ ကွာန်ယှာတ်ပုမ် (၂) တၠ၊ ပံၚ် (၄) တၠ ချိုတ်အာလဝ်တုဲ လွဟ် (၃) ဒကိုအ်၊ မကမ် ၄၀ မမ (၆) မ၊ သီကေတ်လဝ် မကမ် သီုကဵုကပေါတ် အရပ်စပ်ပၞာန်လ္ၚဵုတအ်ရဂှ် ဟီုလဝ်ရ။
ပ္ဍဲအခိၚ်ၜါလပါ်ပန်ပှော်ဒၟံၚ်ဂှ် လပါ်ကံၚ်ဇြဳပၞာန် စံၚ်ပလီုလဝ် သ္ၚိဒၟံၚ် (၂) မတုဲ ဒၟာနူပန်ဒၟံၚ် နကဵုလွဟ်ဇၞော်တုဲ ညးဒေသလ္ၚဵုတအ် ဂြိပ်ဒဴဒၟံၚ် ပ္ဍဲဒၞာဲဗၠးဘဲတုဲ လ္ၚဵုဂှ်မ္ဂး ဒးအောပ်မာဒၟံၚ် ပ္ဍဲသ္ၚိရဂှ် ဂွံတီလဝ်ရ။
ပ္ဍဲကွာန်ယှာတ်ပုမ်ဂှ် ဒှ်ကွာန်ဇၞော် လၟိဟ်သ္ၚိမၞုံ (၁၀၀၀) ပြၚ်တုဲ ပေါဲဗတိုက်ဒှ်ပ္ဍဲကွာန်အလန်ဏံ ဒှ်အလန်ကိုပ်ကၠာအိုတ်ရဂှ် ဂွံတီကေတ်လဝ်ရ။
ပ္ဍဲဂိတုဂျာန္နဝါရဳ စၟတ်တ္ၚဲ (၁) ဂှ် ကွဳစက်ကံၚ်ဇြဳပၞာန် စှ်ေကၠုၚ်လပါ်ဗိက် နူလပါ်ပဠဝ် (၄) ဖ္ဍိုက်ကီု ကွဳစက်ပၞာန် နူကဵုကွာန်ကဒါကဵုပုလဝ် တိုန်ကၠုၚ်ထဝါဲ (၁၄) ဖ္ဍိုက်ကီုတအ်ဂှ် ဒၟာနူဒးဒုၚ်တံၚ်ခတိုဟ်လဝ်မာၚ် ပ္ဍဲဗ္ဒာဲကွာန်နာန်ပရုပ်ဂှ်တုဲ ကောန်ဒပ်ကံၚ်ဇြဳပၞာန် ဟွံအောန်နူ (၅) တၠ ဒးချိုတ်လဝ်ရ။
ပ္ဍဲဂိတုဒဳဇြေမ်ဗာ စၟတ်တ္ၚဲ (၃၁) ဂှ်လေဝ် ပ္ဍဲဍုၚ်ပဠ ကွာန်တိုဝ်ယွာ၊ ကွာန်တာန်ယှေန်ကဵု ကွာန်တေန်ကာန်တဝ်၊ ပွိုၚ်ဍုၚ်ပုဠဝ်ဂှ် အကြာဒပ်ကံၚ်ဇြဳပၞာန်ကဵု ဒပ်ပရေၚ်စဵုဒၞာတအ် ပေါဲဗတိုက်က္တဵုဒှ်လဝ်တုဲ နူလပါ်ကံၚ်ဇြဳပၞာန် စံၚ်ပလီုလဝ် သ္ၚိဒၟံၚ် (၃၀) မပြၚ်ဏီရ။
ပရိုၚ်-သြၚ်လောန်တိုၚ်(မ်)