“ပ္ဍဲဍုၚ်ကဵုဒှ်၊ ပ္ဍဲဒၞာဲပံၚ်တောဲအုပ်ဓုပ်ကဵုဒှ် ရပ်ကေတ်ဒၟံၚ် သၟတ်ကရေၚ်ပိုဲကီု၊ စံၚ်ဏာလဝ်ကီု၊ ဒးသၠးဏာလဝ်လမျီုကီု သၟတ်ဂကူကရေၚ်ချဳဒရာၚ်ဒၟံၚ် အလုံမွဲကၟိန်ဍုၚ်ဂှ် ဒးဒုၚ်ရပ်ဒၟံၚ်ကီု ပ္ဍဲကမၠောန်ပရေၚ်ကောန်ဂကူလ္ၚဵုဂှ်တှ်ေ ညံၚ်ပိုဲတအ် ဂွံလုပ်ကၠောန် သီုစိုတ်သီုစရိုတ်ကီု၊ သွက်ဂွံကၠောန်မံက်က်ထေၚ်ၚ်ကီု အရာဏံဂှ် ဒှ်တၚ်ကော်ချဴ မွဲတၚ်ရဂှ် အဲညာတ်ကေတ်ရ”

တၚ်ဆက်စၠောံသၟာန်သွဟ်လဝ်ကဵု သဝ်အေဝ်ထဳကဝ် ဖက်ဆောညးအုပ်ကာ (၂) ဗော်သွးသၟတ်ကရေၚ် (KYO)

ကောံဓရီုသဳကၠဳကောန်ကရေတ် ဗော်သွးသၟတ်ကရေၚ် (KYO) မရနုက်ကဵု(၆)ဝါ ကၠောန်ဗဒှ်လဝ် ပ္ဍဲဂိတုဂျာန္နဝါရဳ နူစၟတ်တ္ၚဲ(၃) စဵုကဵုစၟတ်တ္ၚဲ (၈) ပွိုၚ် (၆)တ္ၚဲရ။ ပ္ဍဲကောန်ဂရေတ်ဏံဂှ် လးဖျေံကၠုၚ် လၟေၚ်ကမၠောန်ရေၚ်တၠုၚ်အဓာန်ဂတ(၁၂)တၚ်ကီု ကဝ်မတဳရေၚ်တၠုၚ် ကေၚ်ကာဗဟဵု (၁၁)တၠဂှ်လေဝ် ကဵုမာဲရုဲစှ်လဝ်ရ။ ဟိုတ်ဂှ်ရ ပ္ဍဲကောံဓရီုကောန်ဂရေတ် ဗော်သွးသၟတ်ကရေၚ် (KYO)ဂှ် မုဒှ်သဳကၠဳကၠုၚ်လဝ် နွံရော။ လၟေၚ်ကမၠောန်ကၠောန်ရေၚ်တၠုၚ်အာ ဓာန်ဂတတအ်၊ တၚ်ခက်ခုဲ ဒးဆေၚ်မုက်ဆဵုဂဗဒၟံၚ် ပြဟ်ဟ်ဏံ၊ စပ်ကဵုအကာဲအရာ ပါလုပ်ရေၚ်တၠုၚ်ဒၟံၚ် ပ္ဍဲပၠန်ဂတးက္ညၚ်တအ်တုဲ ဆက်စၠောံသၟာန်သွဟ်လဝ်ကဵု သဝ်အေဝ်ထဳကဝ် ဖက်ဆောညးအုပ်ကာ(၂) ဗော်သွးသၟတ်ကရေၚ် (KYO)ရ။

-ကိုပ်ကၠာအိုတ်ဏံ ပ္ဍဲပေါသဳကၠဳကောံဓရီုကောန်ဂရေတ် ဗော်သွးသၟတ်ကရေၚ်ဂှ် မုဒှ်သဳကၠဳကၠုၚ်လဝ်ညးသ္ကအ် နွံရော။ နူကောံဓရီုဂှ် တၚ်သ္ဂုတ်သွာတ်ဗီုလဵု ဖျေံကၠုၚ်လဝ်ကီုရော။

ပ္ဍဲကောန်ဂရေတ်ပိုဲဏံဂှ်တှ်ေ စပ်ကဵုပရေၚ် ဒပ်ပၞာန်သီအဝဵုတုဲ သဳကၠဳလဝ်ညးသ္ကအ်အဓိကနွံတုဲ စပ်ကဵုတၚ်ကော်ချဴ ကၟိန်ဍုၚ်ဗၟာ လၟုဟ်ဏံတုဲ သဳကၠဳလဝ်ညးသ္ကအ်နွံကီု ကဵုဂကောံ EC တိုန်စိုပ်ကၠုၚ် ပ္ဍဲကောန်ဂရေတ်ပိုဲ မရနုက်ကဵု (၆)ဝါဏံ လးဖျေံကၠုၚ်လဝ် လၟေၚ်ကမၠောန် (၂၁)တၚ်တုဲ သဳကၠဳကၠုၚ်လဝ်ညးသ္ကအ် ဗီုပြၚ်လဵု ဂွံဓမံက်အာရုပ်ရဴ ဗွဲအပြောံဂှ် နွံရ။ ဟီုတှ်ေ ပ္ဍဲပေါဲသဳကၠဳဏံတှ်ေ ပိုဲလလောၚ်တြးလဝ် အဓိကဂှ် သၞောတ်တၠအဝဵုပၞာန်ဂှ် ပိုဲဒတူလာၚ်အာမွဲကရောံကဵု ကောန်ဍုၚ်အရၚ် ညးဍုၚ်ကွာန်ဒးဒုၚ်ဍဵုဍိုက်မွဲစွံတုဲ ဒစဵုဒစးပၠန်ဂတးအာ စဵုကဵုသၞောတ်တၠအဝဵုပၞာန် ဒတုံပြဟ်စှ်ေဏောၚ် မပ္တံဗီုဏံ ပိုဲလလောၚ်တြးကၠုၚ်လဝ်နွံဒၟံၚ်ကီု ကဵုသၟတ်ကရေၚ်ပိုဲ နွံဒၟံၚ်ပ္ဍဲဍုၚ် မ္ၚးဍုၚ်ကီု၊ ကဵုကောဒေံကောန်ဍုၚ်အရၚ်တအ် နွံပ္ဍဲဍုၚ် မ္ၚးဍုၚ်ကီု ပံၚ်တောဲတုဲဟေၚ်မှ ဆက်လုပ်အာ ပေါဲဗတိုက် ပရေၚ်ပၠန်ဂတးဏံဏောၚ်ဂှ် ပိုဲလလောၚ်တြးကၠုၚ်လဝ် နွံရ။

-အတိုၚ်ကောံဓရီုကောန်ဂရေတ်ဗော်သွးသၟတ်ကရေၚ်ဂှ် လၟေၚ်ကမၠောန်လဵု ကဵုအာဖျုန် အဓိကတုဲ သွက်ဂွံရေၚ်တၠုၚ်အာ နွံရော။

ပိုဲဂှ် ပ္ဍဲပရေၚ်ပၠန်ဂတးက္ညၚ်ဂှ် ညံၚ်တၠအဝဵုပၞာန် ဂွံပြဟ်ဒတုံစှ်ေဂှ် နကဵုသၟတ်ပိုဲတအ် ပတဝ်လဝ်က္ဍိုပ်က္ဍိုက် ကၠောန်အာအဓိကတုဲ သွက်ဂွံကဵုအာဖျုန် ကၠောန်ရေၚ်တၠုၚ်အာဂှ် နကဵုအဲဟီုဂးမာန်ရ။

-တုဲမွဲပၠန်ဂှ် ပ္ဍဲကောံဓရီုဏံ စပ်ကဵုပရေၚ်ပါဲဒဴပၞာန်တုဲ သဳကၠဳကၠုၚ်လဝ်နွံဒၟံၚ် ဂွံမိၚ်လဝ်ရ။ ပြဟ်ဟ်ဏံ ဗီုလဵုရေၚ်တၠုၚ်ကဵုဒၟံၚ် ညးပါဲဒဴပၞာန်တအ် နွံဒၟံၚ်ကီုရော။

ဗွဲအပြောံတှ်ေ စပ်ကဵုပိုဲ ရီုဗၚ်ကဵုဒၟံၚ်ညးပါဲဒဴပၞာန်တအ်တုဲ ပ္ဍဲကဵုဗော်သွးသၟတ်ကရေၚ် (KYO) ဂှ်တှ်ေ ခရိုၚ်ဆေၚ်စပ် ထပှ်ခရိုၚ်ဂှ် နွံဒၟံၚ်ရ။ ပ္ဍဲခရိုၚ်တအ်ဂှ်တှ်ေ သ္ဇိုၚ်သၞောဝ်ဒက်ပ္တန်တအ် နွံဒၟံၚ်ရ။ ဗွဲမဂၠိုၚ် ဒှ်ဒၟံၚ်ပၞာန်ဂှ်တှ်ေ ပ္ဍဲကဵုခရိုၚ်ဆေၚ်စပ်တအ်ရ ဂၠိုၚ်ဒၟံၚ်ကီု ဗွဲမဗဗွဲကဵုခရိုၚ် KYO တအ် ရေၚ်တၠုၚ် ကဵုဒၟံၚ်ရီုဗၚ်ရ။ ဟီုတှ်ေ KYO ပိုဲတအ်လေဝ် (၄)သၞာံမွဲဝါ ရေၚ်တၠုၚ်ဒၟံၚ်ကောန်ဂရေတ်ဂှ် နွံဒၟံၚ်ရ။

ပ္ဍဲကဵုကောန်ဂရေတ်မရနုက်ကဵု (၅)ဝါဂှ် အခိၚ်ဒးဓမံက်ရုပ်ရဴ လၟေၚ်ကမၠောန် လးဖျေံလဝ်တအ်ဂှ်လေဝ်နွံရ။ ပ္ဍဲကဵုကောန်ဂရေတ် မရနုက်ကဵု (၅)ဝါ ကၠာတေံဂှ်တှ်ေ ပ္ဍဲကဵုလၟေၚ်ကမၠောန်ဂတတအ်ဂှ် ညးတအ်ကၠောန်ရေၚ်တၠုၚ်လဝ် နွံဒၟံၚ်ကီု စပ်ကဵုပရေၚ်ရီုဗၚ်မၚ်မွဲ ညးပါဲဘဲပၞာန်တုဲ ခရိုၚ်ညးကဵုညး KYO တအ် ကၠောန်သ္ပရေၚ်တၠုၚ်ဒၟံၚ် နွံရ။ နကဵုဗဟဵုပိုဲတအ်ဂှ်တှ်ေ ပ္ဍဲကဵုကောန်ဂရေတ် မရနုက်ကဵု (၆)ဝါဂှ် စပ်ကဵုပရေၚ်ညးပါဲပၞာန်တုဲ ကၠောန်ဏောၚ်ဟီုလဝ်ဂှ် ပိုဲပၠုပ် ပ္ဍဲကဵုလၟေၚ်ကမၠောန်(၂၁)ဂှ်တုဲဟေၚ်မှ ဂွံဓမံက်အာရုပ်ရဴ နဒဒှ်လၟေၚ်ကမၠောန်မွဲတုဲ ချူဓဇက်သမ္တီလဝ် နွံဒၟံၚ်ရ။

-တုဲပၠန် နကဵုအကာဲအရာညးပါဲပၞာန်အခိၚ်လၟုဟ်ဏံ စပ်ကဵုပရေၚ်ပရော ဖျေဴံကၠုၚ်လဝ်သ္ဂုတ်သွာတ် ပ္ဍဲကောံဓရီုဂှ်တုဲ ဟီုထ္ၜးကဵုညိ။

ပ္ဍဲကဵုကောန်ဂရေတ်ပိုဲ မရနုက်ကဵု (၆)ဝါဏံဂှ် ပရေၚ်ပၠတရဴစၟဳစၟတ်ဂှ် ဟၟဲဏီရ။ ပ္ဍဲကဵုကောန်ဂရေတ် မရနုက်ကဵု (၆)ဝါဏံဂှ် ပရေၚ်ပါဲပၞာန်ဂှ် KYO ဗဟဵု ချူဓဇက်လဝ် နဒဒှ်လၟေၚ်ကမၠောန် သွက်ဂွံဓမံက်အာရုပ်ရဴဏောၚ်ဂှ် ချူဓဇက်လဝ်တုဲ တုဲတဴကဵု လၟေၚ်ကမၠောန်တအ်တုဲ ပ္ဍဲကဵုအာယုက် EC တိုန်စိုပ်ကၠုၚ် ကောန်ဂရေတ်မရနုက်ကဵု (၆)ဝါဏံဂှ် အရာဏံဗီုပြၚ်လဵုရပ်စပ်တုဲ ရေၚ်တၠုၚ်အာရောဟီုတှ်ေ ဗွဲအပြောံဂှ် ဆဵုဂဗကဵု ခရိုၚ်ဆေၚ်စပ်တအ်တုဲဟေၚ်မှ ဗီုပြၚ်လဵု ဂွံဓမံက်အာရုပ်ရုပ်ဟီုဂှ် ပိုဲဒးထပ်သဳကၠဳအာ တၚ်သောဲသောဲဗြောဲဗြောဲတအ်ပၠန်ဏီရ။

-နကဵုဗော်သွးသၟတ်ကရေၚ်ဂှ် ပ္ဍဲပရေၚ်ပၠန်ဂတးက္ညၚ် ပါလုပ်ပံၚ်တောဲဒၟံၚ် ပ္ဍဲအခန်ကဏ္ဍလဵုရော။ ပ္ဍဲဒၞာဲအခန်ကဏ္ဍ သၟတ်ကရေၚ်ပါလုပ်ဒၟံၚ် ပ္ဍဲပရေၚ်ပၠန်ဂတးက္ညၚ်ဂှ် ဒးဆေၚ်ဒၟံၚ်မုက်ကဵု တၚ်ခက်ခုဲ ဗီုပြၚ်လဵုရော။

ဗွဲအပြောံ ပိုဲဟီုဂွံဂှ်တှ်ေ ပ္ဍဲကဵုပရေၚ်ပၠန်ဂတးက္ညၚ်လၟုဟ်ဏံဂှ်တှ်ေ နကဵုဗော်သွးသၟတ်ကရေၚ်(KYO)ကဵုဒှ်၊ သၟတ်ကရေၚ်နွံဒၟံၚ် အလုံမွဲကၟိန်ဍုၚ်ဗၟာလၟုဟ်ဏံဂှ် ပါလုပ်ဒၟံၚ် ပ္ဍဲကဏ္ဍဇကုဒတုံဂှ်တုဲ ပ္ဍဲပရေၚ်ပၠန်ဂတးက္ညၚ်ဂှ် သၞောတ်တၠအဝဵုပၞာန် ဆောံဗြီုရိုဟ်ကၞက်ပိုတ်သ္ကုတ်ဂှ် ပါလုပ်ဒၟံၚ် ပ္ဍဲကဏ္ဍမဆေၚ်စပ်တအ်တုဲ ကၠောန်သ္ပဒၟံၚ်ရဂှ် ဟီုစမာန်ရ။

-ပြဟ်ဟ်ဏံ ဒးဆေၚ်ဒၟံၚ်မုက်ကဵု တၚ်ကော်ချဴ ဗီုပြၚ်လဵုရော။

အကာဲအရာကၠာတေံကဵု ဒပ်ပၞာန်သီအဝဵုတုဲ အခိၚ်လၟုဟ်ဏံ နွံဒၟံၚ်ၜါဒကုတ်ရ။ ကၠာတေံဂှ်တှ်ေ ပ္ဍဲအခိၚ်ကၠးတၟးမံၚ်ဂှ် အာကၠုၚ်စ ၜိုန်ရပြေပြံၚ်ဒၟံၚ်ကီုလေဝ် ကြဴနူဒပ်ပၞာန်သီအဝဵုတုဲဂှ် အတိုၚ်တီဒၟံၚ် သီုညးဖအိုတ်ဂှ်ရ ပရေၚ်ရပ်စပ်တအ်၊ ဒးဆဵုဂဗဒၟံၚ် တၚ်ကော်ချဴဗွဲမဂၠိုၚ်ရ။ ပ္ဍဲဍုၚ်ကဵုဒှ်၊ ပ္ဍဲဒၞာဲပံၚ်တောဲအုပ်ဓုပ်ကဵုဒှ် သၟတ်ကရေၚ်ပိုဲဂှ် ပရေၚ်ဒးဒုၚ်ရပ်တအ်၊ စံၚ်ပလီုဏာတအ်၊ ဒးသၠးကဵုဏာလမျီုတအ် ဗီုတအ်ဏံ ဒးဆေၚ်ဒၟံၚ်မုက်ဂှ် နွံဒၟံၚ်ရ။ အရာဏံဂှ်လေဝ် ဒှ်တၚ်ကော်ချဴ တၚ်ခက်ခုဲမွဲတၚ်ရ။ သၟတ်ကရေၚ်ချဳဒရာၚ်ဒၟံၚ် ပ္ဍဲကဵုမွဲအလုံကၟိန်ဍုၚ်ဗၟာပိုဲတအ်ဂှ်လေဝ် ဒးဒုၚ်ရပ်ကၠုၚ်ဒၟံၚ်ကီု ပ္ဍဲကဵုကမၠောန်ပရေၚ်ကောန်ဂကူလ္ၚဵုတအ်ဂှ်လေဝ် သွက်ပိုဲဂွံလုပ်ကၠောန် သီုစိုတ်သီုစရိုတ်ကီု၊ သွက်ဂွံကၠောန်မံက်က် ဂတဝ်ဂတဝ်မာန်ကီု အရာဏံဂှ် ဒှ်တၚ်ကော်ချဴမွဲတၚ်ရဂှ် အဲညာတ်ကေတ်ရ။

-အလန်လကြဴအိုတ်ဏံ မုမိက်ဂွံထပ်ဟီုဗပေၚ် နွံဏီရော။

ပ္ဍဲကြဴနူ ပရေၚ်ဒပ်ပၞာန်သီ က္တဵုဒှ်လဝ်ပ္ဍဲ ၂၀၂၁ တုဲဂှ် မွဲကရောံကဵု ပရေၚ်ညးဍုၚ်ကွာန်ပိုဲတအ် ချဳဒရာၚ်ကၠုၚ်ဂှ် ပ္ဍဲပရေၚ်ညးဍုၚ်ကွာန်ကလိုက်ကၟဵုတအ် က္တဵုဒှ်ကၠုၚ်လဝ်ဂှ် ဒၟာနူဒပ်ပၞာန် ကၠောန်သ္ပကၠုၚ်ပရေၚ်ပါ်ကရေက်ပ္ကီုပရာပ်ဂှ်ရ နကဵုညးဍုၚ်ကွာန်တအ်ကီု နကဵုသၟတ်တအ်ကီု၊ ပြသၞာပရေၚ်ဍုၚ်ကွာန်ဂှ်သောၚ်ကလးကေတ် နကဵုပရေၚ်ဍုၚ်ကွာန်ဟွံဂွံတုဲ သွက်ပိုဲဂွံစဵုဒၞာပၠန်ဂတးဂှ် ကၠောန်ကၠုၚ်ပရေၚ်ပၠန်ဂတးရပ်လွဟ်တုဲ ညံၚ်တၠအဝဵုပၞာ်ဂွံပြဟ်ဒတုံစှ်ေမာန်ဂှ် စဵုအကာဲအရာပရေၚ်ပၠန်ဂတးရပ်လွဟ် က္တဵုဒှ်ကၠုၚ်ရ။ ပ္ဍဲလတူဏံဂှ် ပ္ဍဲကာလပွိုၚ်ၜါသၞာံဂှ် နကဵုညးဍုၚ်ကွာန်ဂမၠိုၚ် ညံၚ်သၞောတ်တၠအဝဵုပၞာန် ရိုဟ်ကၞက်ဂွံပိုတ်သ္ကုတ်အာဂှ် နူကဵုကဏ္ဍကၠုၚ်စိုပ်ဇကုဂှ် ညးဍုၚ်ကွာန်ရီုဗၚ်ရေၚ်တၠုၚ်ကဵုဒၟံၚ်ဂှ်လေဝ် နွံရ။ ပ္ဍဲလတူဏံ ပ္ဍဲမွဲကာလပွိုၚ်ၜါသၞာံဏံဂှ် အခက်ခုဲတအ်နွံဒၟံၚ်ဗွဲမဂၠိုၚ်မာန်ရ။ တၠအဝဵုပၞာန်ဂှ် ပ္ဍဲအာယုက် ၂၁ ဗွဲကၠံသၞာံပိုဲဏံ သွက်သၞောတ်တၠအဝဵုပၞာန် ရိုဟ်ကၞက်ဂွံပိုတ်ဒကုတ်အာဂှ် နွံဒၟံၚ်ပၟိက်ဏောၚ်။ ရိုဟ်ကၞက်ဟွံပိုတ် ဟွံဂွံပုဟ်။ ယဝ်ရရိုဟ်ကၞက် ဟွံပိုတ်တှ်ေ အဆက်ကောန်ဗွဲကြဴပိုဲလေဝ် ဆက်တုဲ ဒးဒုၚ်သ္ပဍိက် သၟဝ်သၞောတ်တၠအဝဵုပၞာန်ပၠန်ဏောၚ်။ ချိုတ်ပၠိုတ်ရ။ နွံမွဲဂှ် အဆက်ကောန်မွဲအဆက်၊ စဵုကဵုမွဲအဆက် ဗပိုတ်ဟွံမာန်တှ်ေ ပ္ဍဲကၟိန်ဍုၚ်ဝါတ်ခါဲပိုဲဏံ ပ္ဍဲကဵုကၟိန်ဍုၚ်တြေံတြဟ်ပိုဲဏံ အကာဲအရာဒးဒတူလာၚ်အာ ဆက်တုဲဒှ်အာ ဗီုပြၚ်ဍုၚ်ဟၟဲကဵုသၟိၚ်တၠဏောၚ်။ ပ္ဍဲကဵုလတူဏံ လ္ပယှအ်ထောံစိုတ်ဓာတ်တုဲ စဵုကဵုသၞောတ်တၠအဝဵုပၞာန် အိုတ်အးတေံ ပိုဲဒးပၠန်ဂတးဏောၚ်။ အရာဏံ ဒးစုတ်လဝ်ပ္ဍဲစိုတ်ဏောၚ်။ ယဝ်ရစုတ်စွံလဝ် ဟွံမာန်ပုဟ်တှ်ေ မုဒှ်ရောဟီုတှ်ေ ကောန်ဗွဲကြဴ စဴဗွဲဂတမွဲအဆက်တုဲမွဲအဆက် ဒးဆက်မံၚ်အာ သၟဝ်သၞောတ်ယုတ်ပရေံဏောၚ်ဂှ် အဲမိက်ဂွံဟီုသ္ဂးဂလာန်လကြဴအိုတ်ဂှ် ညံၚ်သၞောတ်တၠအဝဵုပၞာန် ရိုဟ်ကၞက်ဂွံပိုတ်အာ နူကဵုကဏ္ဍကၠုၚ်စိုပ်ပိုဲဂှ် ဟွံယှအ်ဇဲတုဲ ဆက်ကၠောန်သ္ပအာညိဂှ် နကဵုအဲ မိက်ဂွံဗတိုက်ဖ္အောဝ်ဏာရ။