ကိယေဗ်၊ အဝ်ဂါတ် (၆)
ဂကောံခေါၚ်အဝဵုဗလးနူဒုဟ်ဒန်ဂၠးကဝ် (AI) မဒှ်ဂကောံအခေါၚ်အရာမၞိဟ်မွဲဂှ် အပ္ဍဲပၞာန်သၠိုၚ်လုပ်ၜက်ၜေတ်ရုယှာဂှ် ယူကရုၚ်ဝွံ ဟိုတ်နူဖျေံလဝ်ဒပ် ပ္ဍဲအရာပ်မၞိဟ်ဒၟံၚ်တံဂှ်တုဲ သ္ကဵုဒှ်ကၠေံ အန္တရာယ် ကုကောန်အရာပ်တံရောၚ်ဂှ် စောတ်စောဲလဝ် ပ္ဍဲလိက်ဒုၚ်စဳရေၚ် မလလောၚ်ပ္တိတ်လဝ် ပ္ဍဲတ္ၚဲဗြဴဗ္တိဂှ်ရ။
သမ္မတဇြဳလာန်သကဳဂှ် တၚ်စောတ်စောဲ ဂကောံ AI လ္တူကောန်ဍုၚ်ယူကရုၚ်တံဂှ် ဟီုဗျိလဝ် သ္ကာတ်တ်မြဟ်ဟ်တုဲ ပွမဗတိုက်ရုယှာ လ္တူယူကရုၚ်တံဂှ် ဒက်ဂကောံတုဲ ကဵုဒၟံၚ်အရီုဗၚ်ရောၚ်ဂှ် ခၠေဝ်ပလန်လဝ်ရ။
ဂကောံအခေါၚ်အရာမၞိဟ်ဂှ်ဝွံ “ ဂ္စါန်ဒၟံၚ် သွက်ဂွံပြံၚ်လှာဲထ္မံက်ထ္ၜး ကုမၞိဟ်ဂၠါဲသၞတံ ညံၚ်ဂွံဒှ်မၞိဟ်ဒးဒုၚ်သ္ပဒၞန်ဂှ်ရောၚ်” သမ္မတဇြဳလာန်သကဳ ဟီုခၠေဝ်လဝ်ရ။
ညးမၞုံတာလျိုၚ် ပ္ဍဲဂကောံအခေါၚ်အရာမၞိဟ်တံဝွံ နူဂိတုဨပရဴ စဵုကဵု ဂိတုဂျူလာၚ် အဃောအာစိုပ် တိဍာ်မုက်ပၞာန် ဗွဲမဂၠိုၚ်ဂၠေၚ် မၞုံလ္ပာ်ဗၟံက်ကဵု သၠုၚ်ကျာ ယူကရုၚ်တံဂှ် ပ္ဍဲကဵုအရာပ်သတီုမၞိဟ်မံၚ်ဂၠိုၚ်လ္ၚဵုတံဂှ် ဂွံဆဵုလဝ် ဗ္ဒိုပ်ဖျေံသ္ဇိုၚ် ကောန်ဒပ်ယူကရုၚ်တံကဵု သၞောတ်လွဟ်လက်နက်တံရဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
“အခါမကၠောန်ပရေၚ်ပြုပြေၚ်ပၞာန် ပ္ဍဲဒၞါဲမၞိဟ်မံၚ်ဂၠိုၚ်တံဂှ် ဗီုပြၚ်ကောန်ဒပ်ယူကရုၚ် မဝးပ္ကဝ်ဒၟံၚ် သၞောဝ်ဥပဒေပၞာန် မသကဵုဒှ်ကၠေံ အန္တရာယ် ကုကောန်အရာပ်တံဂှ် စၟတ်သမ္တီလဝ်ရ” ရဴဝွံ နိဿဲကေတ် ဂလာန်ညးအုပ်ကာနာနာ ဂကောံအခေါၚ်အဝဵုဗလးနူဒုဟ်ဒန်ဂှ်တုဲ ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
သဒၚ်ဂြာဝန်ဇၞော်ကာစဵုဒၞါ ယူကရုၚ် ဟာန်နာမာလဳယာဂှ် လိက်ဒုၚ်စဳရေၚ်ဏံ ဒဒှ်မလီုလာ်လဝ် သ္ဂောံပါ်ပါဲ လ္တူပြဝရုယှာဂှ်ဝွံ ဟွံချပ်ဗ္စာ ပြဝရဲရပ်လွဟ် မပလီုကောန်သမ္ဘာတံဂှ်မွဲသာ် တုပ်တဴညံၚ်ရဴ လ္ၚတ်ဒၟံၚ် ပြဝညးဒးဒုၚ်လုတ်လောန်လဝ်ဒုဟ်တံသၟးရောၚ်ဂှ် ခၠေဝ်ဟီုဂးလဝ်ရ။
ဝန်ဇၞော်ကာဍုၚ်သ္အာၚ် ဒဳမဳထရိုဝ် ခူလဳဗာဂှ် သွက်လိက်ဒုၚ်စဳရေၚ်ဂှ် ဒေါသတိတ်ဒၟံၚ်တုဲ သွက်ဂွံဒေါအ်ကဵု နူပွမဖန်ဗဒှ်ဒၟံၚ် ပရူဒဒှ်မဗၠေတ်မှာတံဂှ် ဖ္တိုက်ဖ္အောဝ်လဝ် ဂကောံ Amnesty ဂှ်ရ။
ညးတာလျိုၚ်ယူကရုၚ်ဂမၠိုၚ် သွက်ဂွံပဆုဲပြံၚ် ကောန်အရာပ် မၞုံဒေသမုက်ပၞာန်တံတုဲ ဇၟာပ်ဗၞတ်ဗ္ၜတ်မဒှ်မာန်တံဂှ် ကၠောန်ၜိုတ်ဒၟံၚ်လၟိုန်ရဂှ် သ္ဂးလဝ်ရ။
ပ္ဍဲပၞာန်သၠိုၚ်လုပ်ၜက်ၜေတ် မထ္မံက်ထ္ၜးလဝ် နဒဒှ် “ပရေၚ်ပြုပြေၚ်ပၞာန်တၟေၚ်” ဂှ် ဟွံစွံပွန် လ္တူ ကောန်အရာပ်တံပုဟ်ဂှ် လ္ပာ်ရုယှာ ဂယျာန်ပါဲလဝ်ရ။
Ref: Reuters