ဝဝ်လေဝ်၊ အဝ်ဂါတ် (၇)
ကောန်သ္ဂံၚ် (၄) တၠ နူကဵုဒပ်ကံၚ်ဇြဳပၞာန် ပေါဲဗ္တိုက် မသ္ကာတ်မြဟ်ဒၟံၚ်ကဵု ကရောၚ်ပၞာန်ကဝ်ဗရာ ပ္ဍဲ (သုံးထပ်ကွေ့) ဂၠံၚ်ဇၞော် မြဝတဳ−ဝဝ်လေဝ်ဂှ်ဝွံ သ္ပ CDM တုဲ လုပ်စ္ၜုဲစ္ၜော်ကၠုၚ် လ္ပာ်ညးဍုၚ်ကွာန်တံရဂှ် ကရောၚ်ပၞာန်ကဝ်ဗရာ လလောၚ်ပ္တိတ်လဝ်ရ။
ကောန်သ္ဂံၚ် (၄) တၠ နူကဵု ခမရ (၂) သၟဝ်ၝောံဒပ် (၄၄) ကံၚ်ဇြဳပၞာန် မက္တဵုဒှ်ဒၟံၚ် ပေါဲဗ္တိုက် ကဵုကရောၚ်ပၞာန်ကဝ်ဗရာ လလအ်ပွိုၚ်မွဲဂိတုပြၚ် ပ္ဍဲဗဒါဲ (သုံးထပ်ကွေ့ ) ဂှ်ဝွံ တုဲကၠုၚ် ပ္ဍဲဂိတုအဝ်ဂါတ် (၃) ဂှ် ဆက်စၠောံကဵု ကရောၚ်ပၞာန်ကဝ်ဗရာတုဲ လုပ်စ္ၜုဲစ္ၜော်ကၠုၚ် လ္ပာ်ညးဍုၚ်ကွာန်တံရဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ကုကောန်ဒပ်ကံၚ်ဇြဳပၞာန် (၄) တၠ သ္ပ CDM တုဲ မစ္ၜုဲစ္ၜော်ကၠုၚ်တံဂှ် နူကဵုကရောၚ်ပၞာန်ကဝ်ဗရာတံ ပ္ဍဲဒၞါဲမဂီုကၠီုဗၠးဘဲဂှ် ညံၚ်ပရေၚ်ဂီုကၠီု၊ ပရေၚ်စသုၚ်မံၚ်စံၚ်၊ ပရေၚ်အာကၠုၚ် သ္ဂောံပြေပြံၚ်ဂှ် စွံဖန်ဖန်လဝ်ကဵု ခိုဟ်ဟ်မိုဟ်ဟ်ရောၚ်ဂှ် သ္ဂးရ။
သ္အာၚ်နူဂှ်ပၠန် နကဵုကောန်ဒပ်ကံၚ်ဇြဳပၞာန် ထပ်တုဲ မိက်ဂွံသ္ပ CDM လုပ်စ္ၜုဲစ္ၜော်တံဂှ် ကေတ်အဆက်ကဵု Cobra column Facebook Page မာန်ဂှ် ကရောၚ်ပၞာန်ကဝ်ဗရ သ္ဂးလဝ်ရ။
ပ္ဍဲကဵု (သုံးထပ်ကွေ့ ) ဂၠံၚ်ဇၞော် မြဝတဳ−ဝဝ်လေဝ်ဂှ် ကဵု ပ္ဍဲဗွိုၚ်ဒေသပွဳပွူတံဂှ် အကြာဒပ်ကံၚ်ဇြဳပၞာန်ကဵု ကရောၚ်ပၞာန်ကဝ်ဗရာတံဂှ် စနူဂိတုဂျူလာၚ် (၃) တုဲကၠုၚ်တေံ စဵုကဵု တ္ၚဲဏံ အကြာဂကောံဒပ်ၜါလ္ပာ်တံဂှ် ပေါဲဗ္တိုက်ဇီုမုက်တံ ဆက်သ္ကာတ်မြဟ်ဒၟံၚ်ရ။
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် နူဂိတုအဝ်ဂါတ် (၅) တုဲကၠုၚ်တေံဂှ် လ္ပာ်ကံၚ်ဇြဳပၞာန် (၁) တၠ ချိုတ်တုဲ ဟွံအောန်နူကဵု (၄) တၠ ဂွံဝပ်သ္ကာတ်မြဟ်တုဲ လ္ပာ်ကရောၚ်ပၞာန်ကဝ်ဗရာ (၃) တၠ ဒးအာဝပ်ဇီုကပိုက်လဝ်ညိညရောၚ်ဂှ် လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)