ပေကျေန်၊ အဝ်ဂါတ် (၉)
ကလုတ်တမာန်ကၟိန်ဍုၚ်ဗၟာ စပ်ကဵုဍုၚ်ကြုက် ဥူမျဵုတပဳဝွံ ပ္ဍဲဂိတုအဝ်ဂါတ် (၇) ဂှ် စုတိပြဟ်လလုဲအာလဝ်ရောၚ် တမ်ရိုဟ်ပရိုၚ်ကလုတ်တမာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကၠာကလုတ်တမာန်ကၟိန်ဍုၚ်ဗၟာ ဥူမျဵုတပဳ ဂွိုအ်စုတိအာဂှ် တုဲကၠုၚ် ပ္ဍဲတ္ၚဲသ္ၚိသဝ်ဂှ် ဂွံဆဵုကေတ်လဝ် ပ္ဍဲကောံဓရီု ကဵုသၟိၚ်တၠအဝဵုဂမၠိုၚ် ပ္ဍဲကဵုယူနာန် လ္ပာ်ခရိုၚ်ဒိုဟ်နေရတိ (ပလိုတ်သၠုၚ်ကျာ) ဍုၚ်ကြုက်၊ ပယျဵုဍုၚ်ဗၟာဂှ်ဏီရ။
စပ်ကဵုပူဂဵုဏံ မစုတိအာဂှ်တုဲ ကလုတ်တမာန်တၞဟ်သ္အာၚ် (၃) တၠ ဟီုဂးလဝ်ဂှ်မ္ဂး အဃောမတိတ်ဒၟံၚ်တရဴယူနာန် ပ္ဍဲတ္ၚဲအဒိုတ်ဂှ် စုတိပြဟ်လလုဲအာလဝ်တုဲ အတိုၚ်ပရိုၚ်တမ်ရိုဟ် ဗွိုၚ်မဳဒဳယျာ ဍုၚ်ဗၟာတံဂှ်မ္ဂး မဒးပြဟ်လလုဲအာသာ်ဏံဂှ်ဝွံ ဟိုတ်ဒၟါနူယဲကောန်တၟံလေဝ် ဒှ်မာန်ဂှ် သ္ဂးလဝ်ရ။
သွက်ဂွံကဵု တၚ်စၟတ်မွဲမွဲသာ်မာန်တုဲ နူကဵုဌာန်ပရိုၚ်ရိုက်တာ ဆက်စၠောံရံၚ် ရုၚ်ကလုတ်ဍုၚ်ဗၟာဂှ်ကီုလေဝ် ကလေၚ်သွဟ်ကဵုလဝ်ဂှ် ဟွံမွဲရ။
ပ္ဍဲကၞောတ်သၞာံ ၂၀၁၉ ဂှ် ခါန်ကၞက်လဝ် ဥူမျဵုတပဳ နဒဒှ်ကလုတ်တမာန် ကၟိန်ဍုၚ်ဗၟာတုဲ အခိၚ်သီအဝဵု က္တဵုဒှ် ပ္ဍဲသၞာံ ၂၀၂၁ ဂှ်လေဝ် ဒှ်ညးမဆက်ကေမ်ဇျှာပ်လဝ် ကဆံၚ်ဒၞါဲဂှ် မွဲတၠရ။
ပ္ဍဲကၟိန်ဍုၚ်ကြုက်ဂှ် အပ္ဍဲသၞာံတုဲကၠုၚ်တေံလေဝ် ကလုတ်တမာန်ဍုၚ်သ္အာၚ်ကဆံၚ်လ္တူ တၞဟ်ဟ် (၃) တၠ ကေၚ်ပြဟ်လလုဲစုတိအာလဝ် နွံရ။
ကလုတ်တမာန် ဂျာမာန် ဂျာန်ဟက်ကာ မစိုပ်ကၠုၚ် ပေကျေန် အပ္ဍဲဂိတုသေပ်တေမ်ဗာ သွက်ဂွံယိုက်ဂၠေၚ်တာလျိုၚ်ဂှ်ဝွံ ပ္ဍဲပွိုၚ် (၂) သတ္တာဟ ဟွံလအ်ဏီဂှ် ဒးပြဟ်လလုဲအာလဝ်တုဲ ကလုတ်တမာန် ယူကရုၚ် အာယုက် (၆၅) သၞာံဝွံလေဝ် ဗွဲကြဴစိုပ် ပေါဲသ္ဘၚ်အဵုလာမ်ပေတ်ဂိတုၜိုဟ်ဂံက်ပေကျေန်ဂှ်တုဲ လအ်ညိမွဲအံၚ် အပ္ဍဲဂိတုဖေဖဝ်ဝါရဳဂှ် ဒးစုတိပြဟ်လလုဲအာလဝ်ရ။
ကလုတ်တမာန် ဖဳလေတ်ဖေန် စပ်ကဵုဍုၚ်ကြုက် အာယုက် (၇၄) သၞာံဂှ်လေဝ် အဃောမလုပ်ဒၟံၚ် ကွာရာန်တေန် ပ္ဍဲဍုၚ်အာန်ဟွိုၚ် ခရိုၚ်ဗၟံက်ဍုၚ်ကြုက်ဂှ် အပ္ဍဲဂိတုဨပရဴဂှ် စုတိပြဟ်လလုဲအာလဝ်ကီုရ။
Ref: Reuters